قصيدة مرحه ،، لأبن مطرود الشراري ومعاناته بالطائرة ،، ومجارات العنزي والرشيدي لها،،
السلام عليكم ورحمة الله ،،
الشاعر أبن مطرود الشراري ،، شاعر جزل ،، ومن كبار فحول شعراء الشرارات بالقريات
له نادره شعريه مرحه حينما ركب الطائره يوماً ،، وعانى الأمرين من المطبات الجويه ،، فنظم هذه القصيدة ،،
وادعت ناجح من مطار القريات ** يوم اركبونا الطايره واشلعتنا
لفت ودارت وامرجت بين لحظات ** لولا الكراسي والمحازم رمتنا
طاروا بنا حمرالعلابي خواجات ** زغل العيون وجيههم هولتنا
تكفي تشهد يافهد واقر الايات ** الموت جانا والضروف اجبرتنا
جانا المظيف قال وشفيه خدمات ** قلت نزلونا ابطّونا موجعتنا
من قبل اشوف الغيم دون السموات ** واليوم اشوفه يافهد من تحتنا
عزالله اني ماحسبت الحسابات ** والا ترى سيارتي موصلتنا
يازين ممشى الارض لوهي مسافات ** النا بشعيب مجهزين قهوتنا
وش جابني للطايره والمطارات ** والله ماعود اركوبها ان نزلتنا
لوتنفجر قامت تذيع المحطات *** رح عاد دور قشنا مع جثثنا
ورد عليه الشاعر الوايلي وقال ،،
يامودع ناجح بمطار القريات ** قصتك لو تضحك ترا حيرتنا
ياليت ماقالو ترانا شرارات ** ليت الخوي قال لخويه سكتنا
هذي قبيله تنعرف بالشجاعات ** كلن تقول من القبايل غزتنا
بالطايرة لو مت من عرض من مات ** ولا قلت ان الطايرة خوفتنا
بالطايرة خايف وبالقلب دقات ** قلت العيون اللي تبينا بكتنا
لاتفتخر بالخوف وتسجل ابيات ** ولو انت ماسجلتها ماشمتنا
الناس يابن الناس ترقا درجات ** هذي تجارب وقتنا علمتنا
شف الشجاع اللي رقا بالطويلات ** فوق القمر يحمل علم مملكتنا
سلطان ابن سلمان زبن الونيات ** اللي فعوله بالدول شرفتنا
هذا كلام الوايلي بالاشارات ** يوم الشمالي قصته زعلتنا
والختم صلوا بسم رب السموات ** على الرسول المصطفى خاتمتنا
فرد عليه الشراري وقال ،،
هذا حديد مايعرف الشجاعات ** ولاهو آدمي وتخوفه مرجلتنا
عنتر بلش بالثور صابه مخافات ** لما سلم من بلشته وسلمتنا
يالوايلي لاتشك مابنا مشكات ** ولا الاوادم كلها عارفتنا
حنا نحب الضحك بالشعر وابيات ** لو قلت خوف الناس ماصدقتنا
كل ماسمعته بالقصيده دعايات ** لايصيبك شك الطايره خوفتنا
المرجله معنا عليها شهادات ** ان ماشريناها تراها شرتنا
لو ندعي بالخوف مزح وخرافات ** والحرب خطه للجيوش اجهلتنا
اللي انسحب يرجع بقوة وهجمات ** لين العدو ينحاش من منطقتنا
وإن كان سلطان ارتفع في المجرات ** قبله امريكا وروسيا سابقتنا
خل المحاور بيني وبينك بالذات ** لا تدخل الأمار في سالفتنا
ونظم الشاعر عويض ابن عائض الرشيدي ( أبو شرف ) ،، هذه القصيدة مجارات لقصيدة الشراري ،،
حي الجواب وحي كل الشرارات ** معربين جدود في مملكتنا
من كل قلبي للشراري تحيات ** اللي نظم جزل القوافي وجتنا
عبر الهواتف وأعجبت كل فئات ** المجتمع كله يقول أعجبتنا
قصيدة بالطائرة والخواجات ** اللي صفتهم غير ماهي صفتنا
يقول كنه صار بالأرض هزات ** يوم الخواجة تلها روعتنا
لحظة وداع الأرض شاف المتاهات ** فوق الغيوم الطائرة دوختنا
لحظة سكوت وصمت مابه حركات ** على الكراسي رابطين أحزمتنا
وسيطر عليه الخوف مامن سلامات ** ويقول عن إركوبها توبتنا
قصة حقيقية ولاهي خيالات ** وما قال كله صدق في مصلحتنا
والخوف ماهو من صفات الشرارت ** إلا من الله تكده معرفتنا
أكيد يمزح يوم شاف المضيفات ** يقول شفت الموت في طائرتنا
والحي ماينفع بشيء إليافات ** وبعض المواقف خارجه عن لغتنا
والخوف وارد والمشاكل كثيرات ** وقصيدته بالطائرة ذكرانتا
بالخوف عند إقلاعها صدق بالذات ** والله مالومه معجزة عجزتنا
سريعة تطوي بعيد المسافات ** ولو يختلف مسارها زعزعنتا
بين السماء والأرض مالها محطات ** صنع الخواجة كلنا خوفتنا
الصدق واضح ماعليه اعترضات ** وقصيدتة بالطائرة شجعتنا
على اختيار الرد في الجملة أبيات ** ومنه المسوحه كان ماجملتنا
والموت لا جانا يجينا مفاجآت ** بالطائرة والا على الأرض متنا
21-09-2011, 10:41 PM
العرض العادي
المواضيع المتشابهه
