عيون الليل

[عبدالله ال مجحود]

عيون الليل ملتني ولو مالليالي عين
عجز هالليل يجمعني وانا باقي شتات انسان

سقاك الله زمان اول تغير حالك بهالحين
ورود اوصال اهديها اراها تذبل بحرمان

بعد ماكان في قربك مشاعر نبعها قلبين
اشوف ان منبعك قد جف ولا كن شي ابد قد كان

تعلمتي الهوى منّي واشوفك يا الغلا تجفين
وانا اللي ما بعد فكّر يسطّر بالورق نسيان

سهرتك ليل آهاتي غفيتك حلم لا تصحين
رسمتك للفجر طله ياعطر الورد والريحان

حكمتي مملكة قلبي وكنت مقيّد الكفين
تقيدت بغلاك اشعار وكنتي للشعر اوزان

سكنتي محجر عيوني ويضمك بالامل رمشين
اباهي بالسما نورك اباهي بالزهور ألوان

ذكرتيني لو بصدفه ولحظه بعدها تنسين
تعبت اقاسي اسبابك تعبت اواسي الاحزان

من اول لا ذكروا اسمي تفزي مرحبا واهلين
مثل شيخ ٍ اذا رحب وقام بواجب الضيفان

واشوف انك تغيرتي وكنتي حالفه تبقين
على عهدي على حبي على ما دارت الازمان

كفايه ما جرا والله وشوله انتظر بعدين
وانا كل ماحترق لهفه تزيد بصدك النيران

صدودك وشهي اسبابه؟.. كأنك ناويه تسلين
اذا ما كنتي في اصله سليتي وانتهى العنوان

سليتي وابعدت طرقك عن ادروبي وين انتي وين
عسى دربك سهاله سمح ولا مكروه ولا عدوان

ملاحة قلبك احساسه على ما يتجه تنصين
وادري ما اتجه نحوي وفعلا ً كنت انا الغلطان

رحلتي .. ابعدي بكيفك انا ما طارد المقفِين
تحريتك عجزت اصبر باسم العاشق الولهان

الا ياللاسف حبك توفى بك ولو تدرين
جريح وقلبي الوافي رثاك باجمل الالحان

وسلاااااامتكم