مقتــــرح حـــــل للمشكلـــــة الإسكانيــــة‏ في دولــــة الكويــــت

[عبدالله بن شيبان]

السلام عليكم,,



اليوم ودي اوريكم احد الأماكن الممتازه لحل جزء كبير من المشكله الإسكانية بالكويت





اول شي خلنا نشوف خريطة الكويت الحبيبة و شوفوا معاي موقع المطار:









طبعاً موقعه ممتاز لانه قريب من كل مناطق الكويت (العاصمة, الجهراء, والمناطق الجنوبيه)

يعني افضل مكان يكون لك بيت فيه.





مو هذا الموضوع .....



الموضوع ان لو هالمنطقه صارت سكنيه شكثر نقدر نحط فيها....



تفضلوا معاي نشوف







المنطقه تقريبا 80 كيلو متر مربع... شنو معنى هالشي؟



الحين راح ناخذ جنوب السره بكل مناطقها و بنفس مقياس الرسم (2.37 ميل) و نحطها بهالمنطقه... شوفو معاي







شفتو شلون؟؟ بس لحظه خل ناخذ القرين بجميع مناطقها (العدان و مبارك الكبير والقصور والقرين) لا و فوقهم بعد صباح السالم !

نحطهم و نشوف يبقى مكان ولا لا؟







شفتو شلون؟؟؟ اوكي ..



انا ابي اخربها .... بحط وياهم الجابريه ... و اليرموك



و الظهر ..... تدرون شلون ... السره كلها بعد .... وفوقهم زياده بحط غرب مشرف



نشوف مع بعض,,







وفوق هذا ... بعد باقي مساحات فاضيه ....



ياجماعه ... حوالي 14 منطقة سكنيه !!! والمكان موجود لهم ...



شيلو هالمطار ودوه المقوع ودوه بوبيان او العبدلي أي مكان مو مهم ...



المهم خلونا نتنفس ... شيلو هالطلبات الاسكانيه ... و على طاري الطلبات الاسكانيه



اللي اعرفه ان الطلبات وصلت 70 الف طلب؟ في احد يقدر يتكرم و يعرف يطلع مجموع هالمناطق كم وحده سكنيه؟ ونشوف شكثر حلينا من المشكله؟





زين تدرون شنو الطامة الكبرى و المشكلة الاكبر؟



ان في مشروع ضخم لتوسعة المطار!!





زين المسؤولين في الحكومه و في الاسكان تعتقدون مافكرو بهالشي؟؟؟

انا اتمنى نوصل هالفكره لكل شخص قادر انه يساهم في تحقيقها





وتحياتي لكم جميعا و من هني لي هذاك الوقت ادفعوا ايجاراتكم بوقتها وخلكم خوش ناس

[عبدالرحمن آل ضبان]

ياسلامي عليك يا بومحمد أنا الصراحة لو بيدي سلمتك حقيبتين وزاريتين الأشغال والاسكان وتصير وزير المنتدى
الصراحة اقتراح في مكانه والله غريبه ما طرت على المسؤوليين والله طلع مو هين المطار لو يخلوون مكانه بيووت ومساكن كان صار محافظه سابعه مو منطقه لاهنت أخي عبدالله آل شيبان وانشاءالله يلتفتون له المسؤوليين في وزارتي الأشغال والأسكان تقبل مروري ســــــعــــــــادة الـــــــوزيـــــر

[ابونايف الوعيلي]

اقوووول اخوووي عبدالله مالك الا الوزاره


بصراحه تصلح وزير

ولاهنت

وصدقت عزالله مساحة كبيرة



ابونايف الوعيلي

[السهم]

فعلا مناطق شاسعه و صالحه للسكن ... و لو أن الحكومه أخذت الأمور بجديه لأمكن حل المشكله

الإسكانيه منذ فتره طويله ... فالأراضي المستغله للسكن لا تتجاوز العشره بالميه من أراضي الدوله

أما البقيه فبين إمتيازات نفطيه و مواقع عسكريه و مناطق محميه و صناعيه ... و السكن في آخر الأولويات ..

و لا هنت يا عبدالله على نقل هذه الصور التي تثبت أن الأراضي ليست المشكله ... و لكن التخطيط هو المشكله

[فهيد الكفيف]

الله يعيطيك العافيه اخي عبدالله ال شيبان على ماقدمت

نسبة الاراضي المؤهوله في الكويت 4.7 % على ما اذكر

اما عن مقترحك فهو اجتهاد لم يقم به فطاحلت الوزارات المتتاليه لانهم وبكل بساطه يستلمون الوزاره ليزيدوا ارصدتهم او ليوظفوا اقاربهم فقط..


المقترح مميز ولكن ما نريده هو فك رموز الكثافه السكانيه التي بدات تتزايد في الكيلو متر المربع في الكويت اي ان اغلب المناطق متقاربه جدا مما يسبب اختناقات مروريه اذا حلينا مشكله وزدنا مشكله اخرى..
وتعال اخي الكريم نحسب تكاليف ازالة المطار وترتيب الارضيه وتسويتها لكي تصلح للبناء وتكاليف بناء مطار جديد وكما قلت في بوبيان اي بعد عناء السفر سيكون هناك مشقه اخرى وهي العودة للمنزل ..
دعنا ناخذ هذا المقترح المميز الذي اشكرك عليه ولكن بان يكون التمدد الاسكاني خارجيا والا تستحدث مناطق جديده بين مناطق مقامه سابقا حتى لا نزيد مشاكلنا التي ابتلينا فيها بسبب ان المخططين باين عليهم كانوا نايمين يوم ما كانوا يخططون للبلد هذا اذا كانوا هم اللي خططوا..


اقتراح جدا مميز ولكن من رايي المتواضع يريد بعض التعديلات البسيطه واذا تمت هذه التعديلات يمكنك اخي الكريم ان تقدمه للصحف لكي تعلن ان الشباب قد ضاقوا ذرعا بالحكومات النائمه ويسعملون بانفسهم لتطوير وحل مشكلات هذا البلد الذي غرق بها...

اتمنى لك التوفيق...

[الخليفه]

الله يسامحك بومحمد باقي منطقة الرقه هههه

لاهنت يابومحمد على الاقتراح لكن على العكس وددنا أن تكون المناطقه السكنيه بعيده

بسبب الاختناقات المروريه أصبح لايطاق فعند الساعه 7ونص تجد جميع الشوارع مغلقه بسبب

توجه المواطنين إلى أعمالهم وهذا المقترح سيزيدها الامر يحتاج إلى تخطيط دقيق

طيب ليش مايخلون المطارات والمناطق الجديد في الخارج بحيث تبتعد عن المناطق الداخليه

ويكون لديهم بعض الوزارات فتكون نسبه وتناسب