بعيد عن دار الحبايب

[مترك العمره]

السلام عليكم ورحمة الله وبركاته

اسعد الله اوقاتكم بكل خير

قصيدة متواضعة من ربوع جمهورية التشيك آمل ان تنال على رضاكم واعجابكم

.
.
.
.
.

بعيد من دار الحبايب بعيدي=ياطول مشوار الحبايب وبعده
مالي خوين كود بدع القصيدي=ينطق بحزني واكتبه ثم اعده
احاول انسى وابتسم مايفيدي=والصبر فيني جااوز اليوم حده
كني سجينن خلف باب الحديدي=حظه رفيقه وانقلب صار ضده
الهم يومي والحزن صار قيدي=والليل في حربه ....تجهز بجنده
غريب عن داري ولالي عضيدي=يشين فرقى من تحبه توده
ياصاحبي بعطيك علمن وكيدي=صاحبك وافي ماخلف البعد وعده
تجري مع دمي وسط الوريدي=وانت الذي بالقلب عالم بسده
مشتاق لك والشوق دايم يزيدي=وقلبي على حبك صدوقن بعهده
وادري انا جور المفارق شديدي=حكم القدر نافذ..وصعبن نصده

.
.
.


وسلامتكم



وتحياتي لكم وتقديري

[الصمت]

صح السانك ياشاعرنا مترك العمره

مبدع على هذه الابيات الجزله.. اعجابي ومتابعتي..

تقبل مروري

[مترك العمره]

المشاركة الأصلية كتبت بواسطة الصمت

صح السانك ياشاعرنا مترك العمره

مبدع على هذه الابيات الجزله.. اعجابي ومتابعتي..

تقبل مروري

الاخ القدير/ الصمت

يامرحبا والله ومسهلا

سعيد بحضورك العطر .. وصح الله ابدنك ... ومتبعتك شرف ...

تحياتي لك وتقديري

[ابو منيف]

يا سلام على القصيدة الرائعه والجزله صح لسانك يا القرم

[هادي بن فهاد]

الله الله

صح الله السانك على ذالقصيدة الرائع

ياصاحبي بعطيك علمن وكيـدي=صاحبك وافي ماخلف البعد وعده
تجري مع دمي وسط الوريـدي=وانت الذي بالقلب عالم بسـده

ياااااسلاااام ياااااسلااااام

مبدع دائماًً يابو محمد بارك الله فيك

[مترك العمره]

المشاركة الأصلية كتبت بواسطة ابو منيف

يا سلام على القصيدة الرائعه والجزله صح لسانك يا القرم

الاخ العزيز/ ابو منيف

يامرحبا والله ومسهلا

سعيد بحضورك العذب ... وصح الله ابدنك يالسنافي ... حضورك شرف لي ... لاعدمتك


تحياتي لك وتقديري

[نيَـة فراق ..!]

عزآآه

ترجع لـ / الحبايب ، بـ / السلامه ان شاء الله

لكن القصيده هذي لازم يجي لها رد يا مترك >> ما احد توهّق

صح لسانك ، ولاهنت

[بندر العجمي]

الله الله



صح الله لسانك يامترك والله يرجعكم سالمين غانمين



والله لايشينكم على القصيده الطيبه

[أســـيــر الــقوافــي]

صح لسانك مليون ولا يكفون يا مترك جزل

[قضى ليل الهوى طلابه]

مترك العمره ( السهل الممتنع )


صح لسانك مدد لاهنت / كتبت وابدعت وامتعت


نص فآآآآآآآخر وموجع


الله يردكم سالمين / وتقر عين الحبايب بشوفتك