من لا يقلّط شذرة السيف والكيس::: تصبح عليـه مـن الليالي ثلومي

[المناجي]

السلام عليكم ورحمة الله وبركاته


قصيدة من أشهر قصائد الحكمه للفارس الشاعر ( تركي بن حميد ) شيخ قبيلة عتيبه

والشيخ تركي غني عن التعريف فارس لا يشق له غبار تعرفه الصحراء والمعارك

كما يعرفه الشــــــــــــــــــــــعـر ....

تلعب طرب وانا بنومي هواجيـس =ما ساهرك بالليـل كثـر الهمومـي
أسهر اليا نامت عيون الهداريـس =بالليل اساهر ساريـات النجومـي
أونس بقلبي مثل صلي المحاميـس =الله يلـوم اللـي لحالـي يلومـي
قالوا جهلت وقلت جهلٍ بـلا قيـس =الجاهل اللي مـا يعـرف اليمومـي
أشوف عـدلات الليالـي معابيـس =ولا احدٍ من الدنيا عظامـه سلـومي
ِ البني ما يصلح على غير تأسيـس =ومن لا تعلّـم مـا تسـر العلـومِي
ولا خير في كثر الحكي والتماليـس =هرج ٍ بـلا فعـلٍ يجيبـه وهـومِي
من لايدوس الراي من قبل لاديـس =عليـه داسـوه العيـال القرومـي
واليا ركبت معالجـات المضاريـس =يبدا على كبـدي لهيـب السمـومي
بالليل أصالي حاميـات المحاميـس =والصبح أصالي كـل قبّـا وكومـي
واقفن بنا مثل النعـام المماريـس =ليا خف عجلٍ مـع رفيـع الحـزومي
نستلحق اللي يطلبـون النواميـس =اللي مع الاقصيـن وادنـا اللحـومي
ِ ولومي على اللي ينقلون العبابيـس =صنع الفرنج وكـل رامـي لحـومي
وشلف ٍ تركّب بالرماح المناسيـس =وسلت المهار وكـل قبّـا قحومـي
والعز فوق معسكـرات السواديـس =اليا قصدت اللـي بالاشيـا رحـومي
ِ قـب ٍ تنـازا بالنشامـا كراديـس =والطيـر فـي روجاتهنّـه يحـومي
ِ إن جن بالميدان مثـل الدواويـس =وتعاقبـوا مـن فوقهـن السهـومي
ِ عرج باهلهـن كنهـنّ القرانيـس =على الطريح مصوبـرات ٍ كظـومي
حتى يزين لنا المثـل والتوانيـس =والكيف طاب لمـن يفـكّ القحـومي
ومن لا يقلّط شذرة السيف والكيس =تصبح عليـه مـن الليالـي ثلـومي
ِ ومن لا خذا الدنيا بميـز ٍ وتقييـس =مثل الذي يسبـح ببحـر ٍ يعـومي
كلّ القلم مـن كتبنـا بالقراطيـس =والخيل من كثـر الدلاليـج تومـي
وشيخ ٍ لنا يعطى الفقارا المفاليـس =عسـاه بالدنيـا بـعـز ٍ يــدومي
حر ٍ ليـا دبّـت عليـه النواميـس =اليا اعترض جول الحباري صرومي
اليا اكترب من بعض الاشيا سبابيس =أعـزم ولا بـد الفـرج للـعـزومي
ثوب الفرح لبسك نظيف الملابيـس =إن قيـل بايـام الكـرب والزحـومي
واعمل وتلقا وافهم العلـم بالقيـس =ودنياك لـو زانـت تراهـا نقـومي
تضحك وتخفي لك خفي الهناديـس =تفطر لنـا يـوم ٍ ويـوم ٍ تصـومي
أربع سنين ودمع عينـي أماريـس =العين تسهـر كـن فيهـا هـزومي
يجلي صدا قلبي ضبيح المهاريـس =ليا جاك شـرّاب الحشايـش يعـومي
ودلال فوق النـار دايـم محابيـس =إكرامهـن حـق ٍ علينـا لــزومي
من صنعة الصبّة وخمس ٍ تخاميس =وبريّـة ٍ تعمـل بهـن كـل يـومي
وابهارهـا عشـر ٍ بليـا دنافيـس =كيـف ٍ يعـدّا للنشامـا الـقـرومي
عدّه لحمّـاي الجيـاد المراويـس =والا الحصان اللـي بقينـه وهـومي
وصلوا على سيد البريـة بتدريـس =صفوة قريش اللي مشـى باليمـومي
عدّ النبات وعّـد ذاري الطعاميـس =واعداد ما يمطـر سحـاب الغيـومي

المنــــــــــــــــاجي

[راشد المري]

صح لسانك ولسان راعيها تركي بن حميد معروف والله لايهينك على القصيد اعجبني ذا البيت
من لايدوس الراي من قبل لاديس
عليه داسوه العيال القرومي
تحياتى لك اخيك راشد المري

[monamora]

أسهر اليا نامت عيون الهداريس
بالليل اساهر ساريات النجومي
أونس بقلبي مثل صلي المحاميس
الله يلوم اللي لحالي يلومي
قالوا جهلت وقلت جهلٍ بلا قيس
الجاهل اللي ما يعرف اليمومي

صح السانك والسام من قالها يالمناجي

[المناجي]

Tiger...

صح بدنك يالمري ..أشهد أنه بيت عجيب وفيه من الحكمه..

ويدل على أن بن حميد يمتلك صفات كثيره رحمة الله عليه..

تقبل تحياتي

[المناجي]

monamora...

صح بدنك ..والله يرحم بن حميد فارس مقدام بمعنى الكلمه..شكرأ لمرورك

تقبلي تحياتي

[ابومحمد الشامري]

لا هنت يا المناجي على القصيدة الرائعة للشيخ تركي ابن حميد شيخ عتيبة فهو غني عن التعريف.

صح لسانك على النقل المميز

[عبدالله الوعيلي]

يعطيك العافيه يا المناجي

تسلم على النقل

[أبو محمد]

لاهنت يالمناجي على النقل المتميز

[المناجي]

ابوحمد الشامري..

ولاانت يالغالي ...وشكرأ على المرور..

تقبل تحياتي

[المناجي]

تايه الغربه..

الله يعافيك ومن قال يسلم ..أشكرك على المرور

تقبل تحياتي