صوت المطر

[مترك العمره]

السلام عليكم ورحمة الله وبركاته

اسعد الله اوقاتكم بكل خير ,,, قصيده متواضعه آمل ان تنال على اعجابكم ورضاكم

ياما حلى صوت المطر بالغماره=لاصار وجهك في طريقن جنوبي
قبل الفجر والصبح غايب نهاره=على وميض البرق اسلك ادروبي
مزن الغمام السود هلت ابشاره=اجبال البرد والسيل منها يجوبي
وصوت الرعد يدوي كما صوت غاره=مدافعن تقصف بداية إحروبي
معاي قرمن ماتغير مساره=الراس دايم للمعال امعصوبي
يامر يمينه مايشاور يساره=يضحك إحجاجه للخوي ومحبوبي
ياصاحبي شرف براس الزباره=النايفه,, اللي اتكود الجيوبي
اطلق عنان اشوف مد انتشاره=شوف الخباري يجلي هم القلوبي
شب الغضا ياصاحبي شب ناره=انفوسنا تطرب بشوف الشبوبي
قرب علي البن قرب ابهاره=قبل نزول الشمس وقت الغروبي
اشبح هذاك الروض زاهي خضاره=بيت الشعر باين بوسط العشوبي
العشب زاهي تعتلي به ازهاره=ريح النفل ياتيك من كل صوبي
والجو,, يسواله بلندن عماره=بعيد عن وجه الردي والكذوبي
ترى الردي خوته خوة خساره=لاجار ليلك زاد فيها الهبوبي
نقل الحكي في وسط عينه شطاره=بين العرب دايم تشوفه يلوبي
اتعب على اللي طيب الصيت كاره=اللي على الطولات شهم امحسوبي
يمناه ماشحت لضيفه وجاره=نفسه نزيهه عن جميع العيوبي

وسلامتكم ورضاكم