لاتوردني على ميراد طايح سوقه=وأنت خابرني وعارف طرقتي وأسناعي
أحبابي أعتذر منكم على الغياب
وأصااافحكم بهذه المتواضعه علّها تحوز على رضاااكم
\
/
\
/
\
بتحدا الشوق فيني وأكسره وأعوقه=وأذبح القلب الرهيّـف وأبـْـدِلـَـه بصناعي
والعيون الدّمع منها أغسله من موقه=لين يجف الريق فيها والغلا يرتاعي
والحنان يموت قسوه يابسات عروقه=والهشيم اللي بصدري مقبرته أضلاعي
لا بغيت أكون قاسي جملتي المنطوقه=الغلا وشهو الغلا شــيّ ٍ وما له داعي
الجفا بانيه طابوقه على طابوقه=وإن هجرت أعلّقك بين السما والقاعي
شفت نومك من عيونك والله إن أبوقه=لذة الغفوه تخونك ساهرن ملتاعي
والبعاد أفل حبله وأطلقه من طوقه=مايرده كسر خاطر والفجوج وساعي
لا تقول يحن قلبي ينثني من شوقه=والجفا والهجر مايركب على أطباعي
وإن قلبي وسط صدرك قافلن صندوقه=وإن مفتاحه مضيّـعه الزمان وضاعي
لين غنـّـالك على موّالـه وطاروقه=يطربك مرّه .....ومرّه يبكي الأسماعي
لد لي شوفك وفكرك لا تلوح بروقه=واكتبه بيت القصيده يختصر الأوضاعي
لاتوردني على ميراد طايح سوقه=وأنت خابرني وعارف طرقتي وأسناعي
وسلاااامة قلوووبكم
التعديل الأخير تم بواسطة : فهد بن محسن بتاريخ 04-06-2007 الساعة 04:29 PM.
|