قال.............. وقلت .........!

[عجمي وربي الله]

بسم الله الرحمن الرحيم

ما اطول عليكم الموضوع :

قلت : حرام سقوط الحبيني والله نحن بحاجه لمثل هؤلاء في المجلس اصحاب مواقف حازمه ويتصدون للتجاوزات الحكوميه

قال : لا بالله مو حرام الا جعل ربي الزين فيهم السعدون وربعه ويا جعل مسلم البراك والسعدون يسقطون بعد عشان يستمر المجلس بهدوء ويطوف عليه 4 سنين كامله !!!

قلت : يا اخي خاف ربك انت تدعي على ناس فيهم خير نواب امه بحق اصحاب مواقف شعبيه يطالبون بحقوق المواطن كامله ويمنعون عن المواطن الظلم اللي قاعد تطبقه الحكومه والله يا لو لاهم انك انت وشاكلتك رايحين في خرايطها
اذا مثل هؤلاء تدعي عليهم يسقطون اجل من تبغيه ينجح ؟! انت شكلك تبغي ناس بصامه !

قال : اصحاب مواقف شعبيه ؟! هات لي مواقفهم واعرضها امامي وقلي وش فادوني فيه !
ايه ابغي ناس بصامه على الاقل لا مرضت امي والا شايبي ودقيت عليه تالي الليل قال ابشر ما يجي علي الصبح الا شايبي مسفر للعلاج في الخارج
يا حبيبي خلك واقعي ولا تنخدع بالشعارات الرنانه اصحاب مواقف ومصلحة مواطن وبلد ! انا ابغي من يخدمني في ساعة تضيق علي الدنيا وش ابغي بواحد يصادم الحكومه وكل معاملاته مرجعه من مواقفه ذي اللي تقول عنها !

قلت : يا اخي بوجود نائب المواقف الشعبيه يصلح البلد بدال ما تودي شايبك للعلاج للخارج ليه ما تفكر يكون عندك افضل المستشفيات في الداخل وهذا يكون عن طريق النائب صاحب المطالب الشعبيه والمواقف الشعبيه يصلح البلد بافضل المستشفيات و افضل الجامعات و .....

(قاطعني بصوت قوي ...)

قال : اقول انت تعيش في حلم خلك واقعي الحكومه اللي تبغيه بتسويه مهما كان عدد اصحاب المواقف ربعك ذولا وبتمشي كل اللي تبيه برضا والا غصب عن ربعك

قلت : بس الافضل للكويت ....

قال : الافضل لي ....

يا ترى من فينا الصح ومن فينا الخطأ ؟ من على صواب ومن على خطأ ؟

من يتكلم بواقعية اكثر ؟

يا ريت كل واحد يبدي رايه في الموضوع ويعلق على هالقصه الواقعيه

[شايب العيينه]

يامرحبا يا عجمي

يعني شراايك من الصح ومن الخطا واحد يبي مصلحته بس ومايبي مصلحت ديرته أكيد أنه على خطاا

سلمني عليه وقله مو كل يوم بتطيح مريض لكن غيرك واجد بيطيحون مرضى ولا يلقون مستشفى عدل في الكويت يعالجهم وغيرها اشياء واجد

تحيتي لك

[m7amad]

يارب افوز الي ابالي عشان اتشوفونه بالتكتل الشعبي او على الاقل نفس طرحهم مابي اقول اسامي عن التلميع

[العود الأزرق]

السلام عليكم ورحمة الله وبركاته

انا بالنسبه لي في الوقت الحالي كلهم نفس الشي من ناحية

البصام ماراح ينفع البلد بس يمكن ينفع المواطن

والمعارض مع حقوق المواطن ما راح يجبر الحكومه على

التطوير ودفع عجلة التنميه لانهم ما راح يسوون شي

لان الحكومه ضعيفه وتمشي بدون خطط مستقبله

والميزانيه والفوائض الماليه صرفت من غير اي تطوير في البلد



الله يرزقنا بحكومه قويه واعضاء يخافون الله ويحبون وطنهم وشعبهم

شعارهم الله الوطن الامير قلوبهم مليئه بالصدق والاخلاص

وعملهم جد و جهد وعطاء وتعاون بين السلطتين

الله يحفظ الكويت اميرا وشعبا

[بن سريعة]

نحتاج الامين الحكيم .....ذو الرؤية الشالملة ويقدم برنامج للاصلاح وفق الاطر الدستورية

التي تحرج الحكومة بعدم تطبقيها .....والله الموفق

[شبااابي]

أعتقــد أننا غيرنــا مفهوم عضــو مجلس الأمه من مراقب للتنميه
ومشرع قوانين ومحاسب في حال التقصير
إلى مخلص معاملات بدرجة نائب في البرلمان

أتمنى أن يقوم العضو بدوره كنائب وليس كشئ آخـــر

تحياتي لك .

[ديمقراطي]

[frame="10 98"]اولا موضوعك على انه بينك وبين خويك الا انه موضوع خطير جدا وحساس ويحمل قضيه كبيره مازالت غير واضحه عند الجميع واكبر تساؤل تطرحه ماهو دور عضو مجلس الامه؟؟؟ أن دور عضو مجلس الأمة الرئيسي هو دور تشريعي ورقابي حيث يشرع القوانين لتطوير المجتمع، ويراقب السلطة التنفيذية في تطبيق هذه القوانين وتطبيق الديمقراطية التي من أجلها تتحقق التنمية التي لن تتحقق إلا من خلال العدالة والمساواة والشفافية، وإذا ما قصر العضو في هذين الدورين الرئيسيين، نجد أن دوره وممارسة أدائه في المجلس قد اختلا·.....
أن الأسباب التي تعيق عمل النائب في مجلس الأمة كثيرة منها: طبيعة العلاقة بين السلطتين في المجلس وتعطيل الحياة الديمقراطية، وكذلك تحول النائب من نائب طرح إلى نائب خدمات<< يعني واسطات ومثل صاحبك يبي يودي شايبه يعالج
مانبي عضو يخدمني انا وانت وخويك بس نبي عضو يخدم الشعب كافه بجيمع فئاته هذا العضو اللي يطور ويغير وينمي المجتمع ..
اتمنى ان يكون شبابنا اكثر وعي بمفهوم الديمقراطيه تراك لما تستخدم الواسطه تنتهك حقووق غيرك وتخسر الديمقراطيه ..
ولكم مني كل الشكر والاحترام[/frame]

[عجمي وربي الله]

----------- الاخ ديمقراطي --------

طرحك جيد فعلا وسؤالك فعلا جدا مهم ما هو دور عضو مجلس الامة ؟
وماذا نريد منه ؟

شكرا لك على مرورك وطرحك المشرف




--------------- شباااابي -------------

شكرا لك على مرورك وطرحك الراقي




---------------- بن سريعة ------------


شكرا لك على المرور والرد فعلا هذا ما نطمح من نواب المجلس


-------------------- العود الأزرق ------------

شكرا لك على مرور واللهم امين


------------------- m7amad --------------

شكرا لك على مرورك وعسى الله يوفق الجميع واللي تم تزكيتهم من ابناء القبيله هم خير من يمثلنا


-----------------شايب العيينه ---------------

بارك الله فيك وشكرا لك على التفاعل مع الموضوع وفعلا وجهة نظرك مطابقه لوجهة نظري

[ابو راكان *]

انا اقول انك على صواب

وانا عن اقول بنفقد الحبيني

لاني قلبا وقالبا مع التكتل الشعبي

ولكن انشالله اخونا خالد الطاحوس يعوضنا

لانه ان لم يكن من التكتل الشعبي فطرحه قريب جدا لطرحهم

شكرا ياعجمي على الموضوع

تقبل مروري