يجي من آخر الدنيا صَدَى صوتٍ خَفِيْ مَكْبوت
يصيح يقول : وين الحب ؟ ومثلك خانقٍ صوته . .
ولكنْ صوته الخافِتْ .بَنَىْ وسْطْ القلوب بيوت
تِطِيح بيوت هالدّنيا وهو ماطاحت بْيُوته . .
تِذَكّرْ صاحِبك وارْجَع.تقرّب له وَلَو بالصّوت
حرام تْضَحّك الدنيا عليه وتَطْلب سكوته !
على آخِرْ نِفَسْ واقف تِجِيْ وَلاّ يجِيه الموت
واشوف الموت أَحْرَصْ مِنْك وأشوف انّك تِبي موته . .
وأخاف إنّك بَعَد موته تِحِنّ وتفتَح التابوت
وأخاف مْنْ القهر يَقْفُل بْوجهك باب تابوته . .
بْتَبْكِي والنّدم قاتِل مَعَادْ يْفيد .فاتْ الفوت
تِبي تَفْسيرْ لحْروفٍ على التّابوت مَنحوته . .
حُروفٍ خَطّها بِيْدَه قبِل تَجْفَى وقَبْل يْموت
لَحَنْ غامِض لْمَعْزوفَه يِتيمَه مالَها نوتَه . .
بْتَرْجَعْ لآخِر الدنيا لْمَصدَرْ صوته المَكْبوت
تبِي تَلْحَق بِقَايا الصّوت تِطَمّنْ ماهُوْ بْصوته . .
بَروحْ لآخِر الدّنيا .عسى ماينْقِطع ذا الصوت
أحِسّ إنّه يناديني وأحِسّ إنّه صَدى صوته . .
رجوعي كان مِتْأخّر. سبقني قبل أجيه الموت
عسى ربّي يسامحني مَدَام إنّي سِبَبْ موته . .
وَبَدْخل في قلوب الناس وْلَهْ في كلّ قلب بيوت
بَعَوّض حُبّه بْحُبّ القلوب وْبَسْكن بيوته . .
وَبَصْرخ فوق تابوته بصوتٍ خافتٍ مكبوت
ولكنْ . . من يِفَسّر لي حروفٍ فيه منحوته ؟
يعيش الناس ماعاشوا وتبقى قصّة التابوت
قِفَلْ في وجهي العالم بْقَفْلَةْ باب تابوته . .
بصيح وبَخْتِنق وابكي ولكن بَعْدْ فوت الفوت
عرَفْتْ اللحين ليه ؟ آخر رساله كانت النوته . .
أنا بالهجر عذّبته وَلاَ حنّيت قبل يموت
هو بالموت عذّبني عذابي كلّه سْكُوته