كفـــــــــــــــــاح مهندس ...

[m!ss-83]

قبل 10 ساعات من الامتحان ..

محمد :: اسمعني باجر ماراح اقدم لأمتحان ! ..

:: من صجك ليش !! ..

محمد :: مو مستعد عدل حق المادة واحس إني راح ازفت ..

:: حرام المادة مو صعبةوايد ! ..

محمد :: ماني قادر اتحملها ولاني قادر ابلعها ! ..

:: تعال عندي انا اشرح لك ! ..

محمد :: انسى الموضوع ما يمدي ..

:: صدقني يمدي إذا واصلنا ! ..

محمد :: خلاص قررت ماراح امتحن ..

:: قلت حق احد ؟؟..

محمد :: لأ ماقلت حق احد .. شوف إذا سألك باجر احد عني ..
قول مادري عنه ..

:: خلاص يعني منت مقدم ..

محمد :: إيي بس اتخذت قراري ..

( نرجع حق وقتنا .. وقت الأمتحان) ..

:: إنزيين دق على بيتهم !! ..

:: محد يرد بعد !! ..

:: شنو ويين اختفى يعني ! ..

:: مادري عنه ! .. خله يمكن يتأخر يالله اشوف الشباب قاعدين يدشون لكلاس بيبتدي لأمتحان ..

(ثاني يوم بعد الامتحان (

محمد :: الوو ..

:: انت ليش ماترد ؟ ..

محمد :: بس مالي خلق احد ..

:: ليش ماقدمت لأمتحان ! ..

محمد :: كاره المادة ! ..

:: يا أخي اكو ماده احنا حبيناها ! .. وبعدين نسيت الفيزيا ! ..
وين إلي شاد حيله ! ..

محمد :: صدقني مو ناقصك ! ..

:: شنو مو ناقصك هذا جزاي قاعد انصحك ! ..
وين كلامك الحياة تجارب نجاح وفشل ! ..
ولا خقييت ؟ .. وين إلي يقوول راح اتخرج يعني راح اتخرج ! ..
هذا حدك ؟ ..

محمد :: (ساكت) ..

:: شفيك ساكت ؟ ..

محمد :: من قالك إني يأست وهذا حدي ..

:: أجل شبتسوي ؟ ..

محمد :: راح آخذها الكورس الجاي ..

:: مو قلت راح تتأخر ! ..

محمد :: لأ .. حاط لي Backup حق خطتي ..

:: مافهمت ! ..

محمد :: الكورس الجاي باخذ 17 وحده .. بدل 15 ! .. والصيفي 10وحدات ! بدل 9 ..

:: راح يصير ضغط عليك ! ..

محمد :: راح اتحمل انشاالله ..

:: ومعدلك ؟ ..

محمد :: راح ينزلي انذار هل كورس مره ثانية ..

و راح ارفعه انشاالله الكورس الجاي ..

الكورس الثاني ..

:: عرفت منو مرشدك اي دكتور ؟ ..

محمد :: إيي الدكتور فيصل ..مريته قبل شوي ..

:: شقالك ؟؟ ..

محمد :: قالي لو انا مكانك وعلى هل درجات اطلع من الهندسة !

:: لا والله ! .. شقتله ؟؟ ..

محمد :: ماقتله شي .. بس قلت داخل نفسي شي ..

:: شنو ؟ .. راح اقولك بعدين ! ..

(وتمر الأيام .. ويطوف شهر ونص) ..

:: حموود .. بسئلك سؤال جاوبني عليه بصراحة ! ..

محمد :: شنو ؟ ..

:: تخيل إن باجر آخر يوم امتحان في الجامعة وراح تتخرج شراح اتسوي !؟

محمد :: هممم .. راح آخذ نسم عمييييييق ...

:: حمود .. حمود .. ها .. وين رحت ..

محمد :: تخيلت الموقف صج ! ..

:: لاصج قولي شبتسوي ! ..

محمد :: هذا إلي انشاالله راح اسوي ! ..

:: بس ؟ ..

محمد :: إيي ! ..

:: شمعنا !؟..

محمد :: تعرف ليمن يكون الواحد بسباق .. و قاعد يركض بأسرع ماعنده

عشان يوصل حق النهاية ويفوز ! .. شنو تتوقع يسوي اول مايوصل ! ..

:: ياخذ نسم ويرتاح ! ..

محمد :: بالضبط ! .. انا ابي آخذ نسم وأرتاح ..

بعدها راح افكر شراح اسوي ..

:: تصدق ! ... اعجبتني حركتك ! ..

محمد ::لاتصدق إنها حركتي شايفها بفلم !

:: إنت خبل ! ..

محمد :: اشكرك ! ..

تمر الأيام والضغط يزييد خصوصا إنه كان ماخذ 17 وحده ومواد مو سهله ..

كل ماده يبيلها كورس ابروحها دراسة .. وطبعا اليأس والإحباط كان يجيه

بين فترة والثانية بالكورس .. بس خطة الإصرار لازم تنجح ! ..

لازم يخلص بالوقت إلي حدده .. ولا راح تخترب الخطةومايتخرج ! ..

(بالمكتبة) ..

شوفو شباب هذا الهوم ورك اكزام ..

راح انقسم المسائل علينه إحنا الثلاثة ..

إنته تحل مسئله وتشرحها لنا ! ..

وانا أحل مسئله واشرحها لكم ..

وانت نفس الشي .. عشان نستفيد من الوقت

وناخذ كلنا درجة زينه ! .. مانبي كوبي شباب ok ! ..

الوعد الساعة 11 بليل عندي في البيت ! ..

(بعد يوم .. بالجامعة .. عند مكتب الدكتور) ..

الدكتور :: شباب إلي انادي إسمه راح يدش عشان إشوف درجته

وبعدين اقعد وياه عشان اسئله ..

الدكتور :: محمد تعال .. شوف درجتك .. انته خذت 68 من 75 ..

و ال 15 درجه الباجية راح تكون شفوي اسئلك بالامتحان نفسه .. يعني شلون حلييت المسأله هذي واذا جاوبتهم صح .. راح تاخذ ال 15 درجة ..

بعد المقابله ..

:: ها بشر !! ..

<<< وللإصرار بقية !

[ناصر الحميداني]

قصه رائعه

ومتابعين للاجزاء

[أميرة الإحساس]

مشكوووره M!ss-83

نخدمج بالافراح إنشالله ..


ناصر الحميداني

تسعدني متابعتك ..

[أميرة الإحساس]

بسم الله الرحمن الرحيم ...

محمد :: خذت 83 ..

:: صج ! عاد تدري انه درجاتنا احسن درجات بالكلاس ! ..

محمد :: صج ليي قالو ربعن تعاونو ماذلوا..

تفكرت يوما بمعنى الصديق ..

وارسلت طرفي بفكر عميق ..

ترى من سيرسو عليه إختياري ..
ومن ذا سيغدو كظلي رفيقي ..
كما الليل إذ صاحب النجم دهرا ..
فهل كان يحلو بغير البريقي ..

( صيف 2003) ..

:: حموود .. حموود .. شفيك سرحان؟؟ ..

محمد :: لا ولا شي ..

:: شفيك شقاعد تفكر فيه ؟ ..

محمد :: اشياء وايد ..
تصدق ماني قادرا صدق إني لحد الحين بالهندسة ! ..

:: حموود إلي سويته لحد الحين انجاز ماني قادر اصدق شلون سويتها !!
والشباب يشهدون بهل شي .. كمل راح تقدر اتخرج انشاالله ! ..

محمد :: آميين ..

::رفعت معدلك ؟ ..

محمد :: إيي رفعته شوية ..

:: والأنذار شلته ؟ ..

محمد :: لأ نزلي انذار ثاني ..

:: ليش ! ..

محمد :: الكورس إلي طاف خذيت 17 وحده وكنت عايد الستاتك ..
وهم طلعت فيها D ! ..

:: هممم .. عندك الصيفي الحين حاول ترفعه ..

محمد :: انشاالله ..

:: بس في شغله ملاحظها !.. ماحس انه ضايق خلقك مثل كل مره ! ..

محمد :: ليش يضيق خلقي .. شراح اتفيدني ضيقت الخلق ..

:: شلون يعني ..

محمد :: ماسمعت (إن مع العسر يسرا إن مع العسر يسرا) ..
أول سنتين لي بالجامعة كنت مو مسوي زين وكنت متشتت ..
وبلشت بالسنة الثالثة الحمدالله اعدل وضعي ومشت اموري
بالشكل إلي ابييه .. وهذا يدل على توفيج من الله..

:: مشاالله عليك .. بس شراحتسوي عيل الفترة الثانية وشلون راح تشيل الأنذار الثاني ..

محمد :: ودك اتعرف .. إيي .. هممم .. تعال وياي بوريك شي ..

:: وين ؟! ..

محمد :: شايف هل لوحة ..

:: إيه مالت المتفوقين ! ..

محمد :: شرايك إذا اسمي صار فيها ..

:: نعم ! .. قاعد اتغشمر صح ؟! ..

محمد :: لأ ليش ؟ ..

:: احب إلي يعيشون الدور ! ..

محمد :: اي دور ! .. قاعد اتكلم من صجي !! ..
ليش مافي متفوقين عل معدل الفصلي ! .. مو إلي ياخذ 15 وحدة
بالفصل وياخذ 3.5 يحطون اسمه ! ..

:: بلى .. بس صعبه عليك ! .. يعني لازم يتكون اغلب درجاتك بالA ..
ومواد الهندسة إنت شايف مستواك فيها ! ..

محمد :: خلاص خل الأيام بينا ..

(بعد التخرج بعام ونصف ...) ...

جدام المنظرة .. (محمد قاعد ينسف غترته ويعدلها) ..

(التلفون قاعد يرن) .. (موقاعد يرد ) .. (يرن مره ثانية) ..

محمد :: الو ..

:: انت ويييينك !! .. ياالله عشان يمدينا .. مابقى شي عل حفل !! ..

محمد :: ok الحين نازلك ..

(داخل السيارة.. ) ..

محمد :: السلام عليكم ..

:: وعليكم السلام .. شفيك تأخرت ! ..

محمد :: كنت قاعد اعدل غترتي ..

:: دقت عليك المهندسة ؟؟ ..

محمد :: إيه قلت لها إني جاي بالطريج ..

:: شكلها قاعد تحاتي ..

محمد :: إي حدها اكثر مني ! ..

:: ها مستعد عدل ! ..

محمد :: انشاالله ..

:: مرتبك ؟ ..

محمد :: شوي ..

:: ابيك تبدع اليوم حمود ..

محمد :: انشاالله .. إدعي لي ..

:: راح ادعيلك .. وانا واثق تماما إنك راح تبهرهم اليوم ..

محمد :: قول انشاالله ..

(داخل قاعة الحفل) ..

:: محمد ..

محمد :: هلا مهندسة ..

:: مستعد؟؟ ..

محمد :: إيي نعم ..

:: ويين الكلمة ..

محمد :: موجوده بمخباي لا تحاتيين ..

::::::::::::::

:: ها حموود كلمتك المهندسة ؟؟ ..

محمد :: إيه .. سألتني عن الكلمة .. قلتلها معاي .. هاك إخذها ..

:: ليش ! ...

محمد :: ماراح اقرى منها ..

:: نعم ! .. حموود ! لا تجن ! .. مو وقتا تتوهق ! ..

محمد :: شلون اتوهقوانا إلي كاتب الكلمة ..
الكلمة موجودة افبالي وماراح اتوهق انشاالله ..

(ويبدأ الحفل ) ..

<< للكفاح بقية ..

[أميرة الإحساس]

بسم الله الرحمن الرحيم ..

والآن مع كلمة عميد كلية الهندسة والبترول ..

:: زهب نفسك انت وراه ..

محمد :: ok ..

:::::::::::::

:: بالنيابة عن المهندسين .. يتقدم الآن المهندس محمد بإلقاء كلمة الخريجين ..

من بين الحضور :: هذا مو جنه محمد إلي ويانا بالكلية ..

:: إيي امبله إهوا ..

:: شلون جذي ؟! ...

:: اسكت الحين خلنا نسمع

محمد ::بسم الله الرحمن الرحيم والصلاة والسلام على اشرف الخلق
سيد المرسلين نبينامحمد وعلى آله وصحبه اجمعين .. اعزائي الحضور الكريم .. السلام عليكم ورحمت اللهوبركاته .. بدايةً لا يسعني إلى ان اتقدم بالشكر الجزيل نيابةً عن اخواني واخواتي المهندسين .. إلى كل المؤسسات والشركات التي ساهمت اسهام كبيرا في دعمنا ونصحناوتوفير فرص لنا للأطلاع على سير عملها وتوفير المناخ المناسب لتطبيق ما تعلمناه فيحياتنا العملية .. فكل الشكر والتقدير إليكم .. وعساكم عل قوة

اخواني واخواتي .. لا يخفى عليكم اننا نقف اليوم امام بوابة من التحدياتالتي تتطلب منا الجد والأجتهاد في العلم والعمل .. حتى نكمل مسيرة قدمها لنا آبائناواجدادنا في شعلة تعاقبو على حملها والمحافظة عليها حتى تصل إلينا بأبها حلة ..

اخواني واخواتي .. إن كويتنا اليوم تحتاج إلى سواعدنا.. فالنعاهد الله اولا ثم انفسنا على حملها عاليا حتى تكون في مصاف الدول المتقدمة .. ولنعمل معا على التحلي بروح التحدي ونظرة التفاؤل حتى نكون إلهاما لأبنائناواحفادنا من بعدنا ..
وختاما .. نسأل الله العلي القدير انيحفظ بلدنا آمنن مطمئنن وسائر بلاد المسلمين .. اللهم آمين .. والسلام عليك ورحمةالله وبركاته) ...

(تصفيق حار !) ..

:: شنو هذا انت شسوييت !! ..

محمد ::بشر شلون لأداء ؟ ..

:: ممتاز مشاالله عليك ! .. إلي جمبي اول ماخلصت قاعد يدعيلك ..

محمد :: شقال ! ..

:: قال(ربنا يفتح عليك يبني) ..
كاهو الدكتور إلي كان مرشدك بالجامعة ! ..

محمد :: إيي ادري شفته وسلمت عليه ..

:: شقالك ؟ ..

محمد :: احسه مو مستوعب إني قدرت أتخرجت من الهندسة .. قالي مشاالله كل مره اكتشف فيك شي جديد ابهرتني ...

( نرجع حق وقتنا .. مرحلة الجامعة) ..

:: حموود ..

محمد ::أهليين ! ..

:: عاش من شافك ..

محمد :: عاشت ايامك ..

:: وين وصلت الحين متى تتخرج !! ..

محمد :: صيفي انشاالله =) ! ..

:: مشاالله .. كفو والله ! .. قولي بسشلون قدرت تتحمل إلي صار ! ..

محمد :: تعال خلنا نقعد اول .. عشان نسولف على راحتنا ...

:: وهذي قعده .. يلا تكلم اسمعك ..

محمد ::تذكر قبل جم كورس يوم كنا عند مكتب الدكتور ..

:: إيي مرشدك مغيره ..

محمد ::إيي .. تذكر شقلتلك ؟ ..

:: إي جنه قالك لو انا مكانك .. اطلع من الهندسة احسن لي ! ..

محمد :: وتذكر شرديت عليك وقتها ! ..

:: لأ ! ..

محمد ::قلت لك في شي قلتا بيني وبين نفسي راح تعرفه بعدين ! ..

:: إيي صح صح !! ذكرت ! .. شقلت وقتها بينك وبين نفسك ! ..

محمد ::قلت راح يجي اليوم إلي راح اخليك توقف تصفقلي ! ..

:: مافهمت ! ..

محمد :: انا اقولك ! ..

(في البيت) ...

محمد :: السلام عليكم ..

ابو محمد :: وعليكم السلام .. محمد ..

محمد :: هلا يبه ..

:: تدري إن ولد عمك تخرج ..

محمد :: إيي ادري باركتله ...

:: محمد ولد عمك اصغر منك وكاهو تخرج .. وانت لحد الحين

قاعد بهالهندسة منت عارف شتسوي ! ..

محمد :: يبه ليش هل تحبيط ..انت شايفني اني قاعد اشد حيلي وقاعد احاول .. انشاالله راح اتخرج ! ..

:: محمد من متى وانا اسمع هل حجي ! .. الناس كلها بالتخرج إلى انت ! ..

(وبعدين يعني .. الناس كلها اتفقت على انها تحبطني ! .. الدكتور من صوب .. والوالد من صوب .. والربع من صوب) ! ..

اصعب احباط اذا جاك من الأهل وخصوصا ابوك ..

بس الهدف لازم يتحقق لو شنو كان الإحباط ! .. قام بعدها وخذاله ورقة A4

وقام يكتب كلمة الطلبة الخريجين ! ..

محمد :: فلان ..

:: هلأ ..

محمد ::شرايك بالكلمة ؟ ..

:: حق شنو ؟؟ ..

محمد :: كلمة الطلبة المتخرجين ! ..

:: ههههههههههههههههههه أنت تخرج بالاول ولاحق عالكلمة !! ..

محمد :: راح اتخرج انشاالله .. فقلت أهيئ نفسي من الحين ..

:: من صجك ! .. ليش قاعد تسوي جذي ! ..

محمد :: بحاول اعيش الدور ! .. عشان اعطي حق نفسي دافع قوي ! ..

:: انزين شضمنك انك انت اللي تقولها ! ..

محمد :: راح اقولها انشاالله ..

:: بنشوف ..

<<< للإنجاز بقية ..

[أميرة الإحساس]

ومرت الأيام .. ووصلنا للكورس إلي قبل آخر صيفي

( كورس ثاني 2006 ) ..

:: حموود .. اليوم لازم تجي معانا

محمد ::لا إسمحلي ماراح اقدر ! ..

:: ليش ! ..

محمد :: حدي مضغوط هل كورس بالدراسة ! ..

:: ترى مصختها ! ..

محمد :: شوف مالي خلق احد يتشره .. الحين انا معذور ..
ليمن اتخرج تشره على كيفك !! ..

(وتمر اول مدتيرمات على خير) ..

و ( ثاني مدتيرمات نفس الشي) ..

الدراسة والتعب .. والكفاح متواصل .. والأنجاز متواصل ..

والهدف لازم يتحقق ..

(بعد امتحانات الفاينل ..)

رايح يشوف درجاته في الجامعة ..

:: جم خذت ؟

محمد ::لحظة باجي لي مادتين ناطرهم ! ..

:: وشمسوي بالباجي ! ..

محمد ::خذت ثلاثة A وحدة B .. كاهو الدكتور حط الدرجات ! ..
يسس ! .. A- .. يا رب يارب .. الأخيرة بعد A عشان
يكون معدلي تفوق ! ..

راح يشووف آخر درجة .. ولا ماخذ C-

محمد ::دكتور هذي آخر درجة آخذها .. وبصراحةعندي هدف
هل كورس إني اتفوق .. والحمدلله خذت بكل موادي درجات زينه
.. إلا هل مادة .. دكتور اتمنى إنك ترفع إقريدي ..

الدكتور :: مو مشكلتي هذي ..

محمد ::دكتور حرام مادتك إهيا الوحيدةإلي راح تنزل معدلي عن معدل التفوق ! ..

الدكتور :: خلاص محمد dont argue with me please !

محمد ::انزين دكتور عطني هل فرصة بس ! ..

الدكتور :: am sorry ما اقدر ..

محمد ::ok دكتور مشكور ..

:: ها بشر زادك ؟؟! ..

محمد :: إنسى ..

:: شنو يعني

محمد ::ماراح اتفوق عشان هل مادة بس ! ..

:: ايشي !!! ..

محمد :: الحمدالله على كل حال قدر الله وماشاء فعل ..

:: جم معدلك صار الحين ؟؟ ..

محمد ::الفصلي (3.3) ..

:: حسافة على جم بوينت بس ! ...

محمد :: الحمدالله يكفيني إني حاولت إني احقق هالإنجاز ..

:: وانا اشهد ! .. صراحة ماكنت حتى اعتقد انك راح تقرب من هالمعدل ! ..

محمد :: هذا كله ابفضل الله ..

:: وعؤبال التخرج يارب ..

محمد :: آميين الله يسمع منك ..

:: شراح تاخذ بالصيف ..

محمد :: ميداني انشاالله ومادتين ..

:: ويين بتاخذ الميداني ..

محمد ::بالشركة لفلانية ..

:: الله يعينك عاد يبيلها واسطة ! ..

محمد ::حتى التدريب يبيله واسطة !! .. شل مسخرة ! ..
ديره مو ماشية إلى بالواسطة ! .. مالي شغل بقدم بدون واسطة ..

:: صدقني ماتنقبل .. قبلك سووها .. مانقبلو إلا يوم جابو واسطة ! ..

محمد :: شسالفة انا داش تدريب عندهم .. مو كشغل او وظيفة رسمية ! ..

:: إيي هالشركة حتى بالتوظيف صعبة مو أي واحد يقبلونه ! ..

محمد :: الله كريم بروح وبشوف شصير ..

::
::

محمد :: السلام عليكم ..

::وعليكم السلام ..

محمد :: لو سمحتي مهندسة إذا بقدم حق الميداني عندج ؟؟ ..

:: إيي عندي .. خذييت اللسته مالت الشركات ..

محمد :: إيي شفتها .. بس ابي هل الشركة انا ..

:: هذي حدها صعبة .. الكورس إلي طاف ماقبلو ولا واحد ..
والي قبلها يابو واسطه ياالله انقبلو ! ..

محمد ::انزين مايخالف انجرب انقدم هالكورس يمكن يقبلوني ! ..

:: عندك واسطة فيها ؟؟ ..

محمد :: هممم .. عندي بس مابي اكلمهم ..

:: ليش !! ..

محمد ::بس ابي التوفيج من الله ..

:: جم معدلك ؟ ..

محمد ::معدلي الكلي 2 وجم نقطة ! ..

:: وبعدجم نقطة ! .. عبالي بتقولي 4 نقاط على هل ثقة ! ..

محمد :: ليش شكو هم بالمعدل !! .. يدققون على هل سوالف ؟؟ .. يعني إلي معدله نازل مايقبلونه ؟ ..

:: إيي اكيد لأن عندهم إلي معدلة مو عالي .. يعني مو شاد حيله ولا يشتغل ..
فليش يتعبوون نفسهم ويدربونه .. وبعدين إلي معدله نازل
careless واكيد ماخذ المادة عشان يبي يرفع معدله بس مو مهم عنده الشغل ! ..

محمد :: مشاالله منو حط هل تحليل ؟ ..

:: اغلب الشركات الكبيرة رفضت كثير طلبة تقدمت لهم بسبت هل شغله ..

محمد :: بس إذا مكتوب لي هالمكان راح يصيير تدريبي فيه انشاالله ..

:: على راحتك انا قتلك عموما عشان تكون بالصورة ..

محمد ::انزين الحين في اوراق مطلوبة مني إني ايبها ؟ ..

:: اول شي الحين لازم اقدم كتاب رسمي وابي الدكتور المسؤول يوقع عليه ..
وعقب مايردون علينا بالموافقة .. اقولك شتسوي .. ok

محمد ::الله يعطيج العافية ..

(بعد جم يوم) ..

:: الو محمد ..

محمد :: هلا مهندسة ..

::ارفضت الشركة الكتاب إلي مقدمينه !

محمد :: أفا .. ليش ..؟؟


>>> لنهاية بقية

[أميرة الإحساس]

"عندما تتحد الصعاب والظروف مع الأصرار والمحاولة .. عندما يتحدث الألهام .. ويبدأ الطموح بالنطق .. عندما تحبو الهمم .. ويبدأ الأمل بالمسير .. عندما يكون الصبر عنوانً .. والأنجاز شعارا .. تأتي رياح الكلمات لتسطر لنا قصة كفاح"
(محمد)

[أميرة الإحساس]

:: الو ..

محمد :: السلام عليكم ..

:: وعليكم السلام ..

محمد :: شلونك عمي معاك ولد اخوك محمد ..

:: هلا حبيبي شلونك ؟ ..

محمد :: الحمدالله بخيرالله يسلمك ..

:: وشلون الوالد ؟ ..

محمد :: الوالد الحمدالله تمام واموره طيبه ..

:: عساه دووم ..

محمد ::اجمعين يارب .. عمي بغيت اسئلك .. انا كنت مقدم تدريب بالشركة لفلانية ..

بس رفضو الكتاب .. عشان سالفة واسطة ماواسطة .. وانا صراحة نظام الواسطة مو داش بالي ! ..
ودي اعتمد على إلي الله يكتبه لي .. بس المشكلة انا لازم اتخرج صيفي واذا ماخذيت ميداني الحين راح
اتأخر كورس على مادة ! ..

:: افا عليك ولا إهمك ! .. بس جذي ! .. الحين اكلملك مدير الشركة بنفسه ! ..

محمد :: عمي إذا فيها كلافه السالفه لا إتعب نفسك ..

:: شتعب نفسي فيه .. قولي شنو الإدارة إلي بتاخذ ميداني فيها ..

محمد :: ابي الإدارهلفلانية ..

:: شمعنا ..

محمد :: قريبه من مجالي ..

:: خلاص انا اكلمهم وارد عليك

(بعد يوم) ..

:: الو محمد ..

محمد :: هلا والله ! ..

:: معاك فلان ..

محمد :: هلا والله بوفلان ! ..

:: كلمني عمك عشان التدريب في الشركة عندنا ..
المشكلة الإدارة إلي تبيها عليهم ضغط هل فتره فماراح يجابلونك عدل ..
بس راح احولك الإدارة ثانية ..

:: خلاص انشالله ..

(وتمر الأيام .. واندش بالصيفي) ..

:: ها حموود بشر شلون الميداني ..

محمد :: اسكت ملوعين جبدي ! ..

:: ليش ! ..

محمد :: يا معود فرق بين الجامعة والشغل ! ..
المعلومة بالغصب تاخذها ! ..
ومحد يبي يساعدك ! .. كل واحد نفسي نفسي ! ..

:: إيي هذاالقطاع الخاص ! .. اجل شكلك كله قاعد ! ..

محمد :: عيب عالرجال .. لا تشوف واقف بلعوهم ! ..

:: شلون ! ..

محمد :: ما كو شي ما اسئل عنه شقيتهم ..
كل ما طرى شي ببالي اروح اسئلهم ! ..
قمت اداوم وياهم ليه ال 5 ! ..

:: والله لك خلق ! ..

محمد :: ذاك اليوم يقولون لي انت خلص دوامك ليش ماتمشي !
اقولهم عندي شغل لازم اخلصه ! .. مصدق نفسي ! ..

بعد جم يوم .. في الشركة

:: قوة ..

محمد :: هلا والله ..

:: بعد اشوي ابيك عندي في المكتب ..

محمد :: إي انشاالله .. (بقلبه .. الله يستر شيبي مدير الإدارة فيني ؟!) ..

(بعد شوي) ..

محمد :: السلام عليكم ..

:: وعليكم السلام حياك تفضل ..
انت طالب بالهندسة عدل ؟ ..

محمد :: إي عدل ..

:: إي مشاالله .. ماخذ ميداني عندنا جنك ..

محمد :: إيي نعم الشركة قريبه من مجالي ..

فقلت آخذ فيها الكورس الميداني ..

:: إنزين انا بكون صريح وياك وبدش بالموضوع ..

محمد :: إيي تفضل ..

:: شرايك بالشركة ؟ ..

محمد :: الحمدالله مرتاح منها ..

:: لك خاطر تشتغل فيها ؟ ..

محمد :: نعم !! ..

:: شفيك مستغربت ..

محمد :: لا بس تفاجئت بالسؤال ..

:: الشباب مشاالله يمدحونك .. و Altitude مالك كانممتاز ..
وهم رشحوك انك تشتغل وينا .. خصوصا انه في واحد راح يطلع ..
وراح يكون مكانه شاغر فنبي احد يكون زيين مكانه ..
واحنا نحرص على الشباب إلي مثلك وشرواك ...

(وتمضي لأيام .. وينتهي الصيفي .. ويتخرج محمد من الهندسة)

:: ها وين رايح الحين ؟ ..

محمد :: رايح آخذ نسم عمييييييييييييييييييييييق

واسجد سجدة شكر حق ربي .....

ومع تخرج محمد في صيف 2006 .. نطوي صفحة من صفحاتالكفاح إلي كل

واحد فينا قاعد يعيشها بحياته ..


ونبدأ نسطركفاح جديد لمستقبل جديد ينتظرنا بفارغ الصبر !

>>وللنهاية نهاية<<

The End

[ناصر الحميداني]

مجهووووووود رائع وومميز اختي اميره


ومتابع بصمت

[راكان الحثلين]

يسلموو على القصه
انا مره جاني نفس موقف المهندس كل الطلابه ومع الاستاذ يا كسلان بصوت عالي بس للاسف
مافي فايده ما شدية حيليــ