السلام عليكم ورحمة الله وبركاته
عزيزي القارئ .. هذه نبذه عن شاعرنا الشيخ / بطيحان بن محمد بن بطي بن منيخر ال سفران (رحمه الله)
وهو من بيت إمارة العجمان المشهود لها بقوة البأس والشكيمه في الحروب عند القبائل في الجزيره العربيه
وكتب عن ذلك عدد من المؤلفين والكتّاب العرب وقد لقبهم / امين الريحاني بـ ( المـــان العـــرب ) ،،
وقد قال شاعرنا رحمه الله في مدح ربعه وقبيلته :
ذولاك ربعي صفوة الانجاب=اللي لهم بالضيق وردٍ وتصدير
اللي لهم بالحرب صولات واحساب=لا ثار عج معسكرات المسامير
واسأل قبايل نجد لاصرت مرتاب=اللي تميز ربحها والمخاسير
ولد شاعرنا سنة 1331 هجريه في وادي العجمان وبعد ذلك انتقل إلى الرياض في سن السابعه مع والده
حيث أراده ان يتعلم القرآن الكريم وتجويده والاحاديث النبويه والقراءه والكتابه على يد المشايخ في الكتاتيب
وتم له ذلك ثم انتقل مع والده إلى هجرة ( حنيذ ) الواقعه في الوادي ،،،
وفي سنة 1351 هـ امر الملك عبدالعزيز بفتح نجران وكان الشيخ بطيحان من الملبين لدعوة الملك عبدالعزيز وشارك فيها حتى تم فتحها
ثم ذهب إلى الحجاز بصحبة اميرها آنذاك الامير فيصل بن عبدالعزيز رحمه الله وبعدها رجع إلى حنيذ
ومن ثم انظم إلى الملك عبدالعزيز رحمه الله وكان من اخوياه المقربين إلى ان توفى ،،،
ثم انظم إلى الملك سعود بن عبدالعزيز رحمه الله
وكان من صفات شاعرنا فصاحة اللسان وقوة المنطق وأنه لا يخشى لومة لائم في قول الحق ،،،
توفى رحمة الله عليه سنة 1424 هـ عن عمر يناهز 94 عاماً ،،،
وسوف نذكر لكم بعض من قصائد الشيخ / بطيحان بن محمد بن منيخر (رحمه الله) ،،،،
هذه القصيده عن المقانيص وهدة الطير مما له اثر كبير عند الصقّار ، ويسندها على ابن عمه / عبدالله بن نايف العويض ،،،
يقول الشاعر :
يابو فهد ما حلا هدة الطير=حِلّ العصير ولا بعد غابت الشمس
فارضٍ خلا ما داج فيها صقاقير=ما داج فيها راعي الجيب والجمس
في خايعٍ متخالطٍ بالنواوير=تلقي الحبارى فيه خمسٍ مع خمس
اطيورنا فدع الحرار المغاتير=متعلماتٍ ما تفرقع من اللمس
يصخرن ما طار بالجو تصخير=ويقابلنه قبلة البن بالحمس
والا ركبنا فوق زين الحناتير=نبغي لنا ذكرٍ خذيناه قبل امس
ياما قطعنا من فوقها من دعاثير=والصيد لو نازحٍ نرمسه رمس
ما حن نحسب للتعب والمخاسير=والراي ما حن ناخذه لا غدى عمس
واللي ورد لابد له من مصادير=دنياك هذي كلها همس في همس
وهذه القصيده قالها الشيخ/بطيحان بم منيخر في الخمسينات عندما كان بالمستشفى بالكويت ،،
وجهها لابن عمه الشيخ والفارس المشهور / ناصر بن سرحان بن منيخر ( ابو كروز ) يقول :
يامن يودي لبو كروز خط= فيه السلام إعداد وبل المخيله
ويبشره يومه شفوقٍ ومشتط=إني بحمدالله حالي جميله
ويبشر اللي لي صديق ويصفط=والطيب من اربوعنا والقبيله
والا الردي هذاك ما نيتي خط=في خاطره لي شحنه لو قليله
من عقب ذا يا عيد هجن تخلفط=هلها جياع والنجايب هزيله
نطّاح من هو دون ربعه تقلّط=ومشهر بالجوخ يبغي النفيله
شوق الذي قرنه على المتن يمشط=والمسك والعنبر حشابه ثليله
ريحه زبادٍ وزعفران إلى عط=واحيا عروق القلب وابرى غليله
يشدي لعود الموز يوم يتعلفط=لاهبه النسناس مثناه ليله
وجدي عليكم وجد من هو تخمط=يبغي الرشا واخطاه وعزتي له
او وجد من هو في المضامي تخربط=ضاعت ذلوله والتفق مع صميله
ولولا الحيا ويقال مجنون لفعط=فعطة قريص شاف دمه وشيله
والقلب كنه بالقديمي يشعط=والعين دايم في سنعكم تخيله
يالله انا طالبك يامجري الشط=ومنجي يوسف بحسن الوسيله
انك تنجي من صوابه توسط=متمكنٍ به له اسنين طويله
يازين شوف الروض لا منه عطعط=والنبت به متبين عقب سيله
فيه الحباري رتّعٍ كنها البط=في خايعٍ راعي الغنم ما يجيله
من عقب خمسينٍ به الفقع يلقط=وللي يرد الزمل يملا شليله
ويا ما حلا لا قالوا الطير يربط=شوف الدلال مقلطه بالمسيله
تلقا الندا في مدهرك يتعبط=سيله جديد له ليال قليله
ولا عندك الا كل ما هو مسلط= على عدوه والغنم والجميله
ما هو من اللي بالكلام يتنطط= مكاله الهرجه خباث الدغيله
هذا هواي اللي له القلب ينشط=مدام باقي الروح ما جا عميله
دام الفتى في حفرته ما تورط=والراس ما هالوا عليه النثيله
وهذه القصيده قالها الشيخ بطيحان بن منيخر وهي حول العيال ومنافعهم لوالدهم وطيب افعالهم
والفرق بين الولد الردي والولد الطيب يقول الشاعر :
الوالد اللي ما يخلّف مشاكيل=عزي لحاله لا غدا كنّه القوس
مثل الذي يبذر ولا به محاصيل=راحت حياته كلها هم وتعوس
خطوى الولد مثل الجمل ينقل الشيل=يصبر على حمله ولو حسه حسوس
هذا لعله ما تجيه الغرابيل=وعساه من فجعات الايام محروس
وخطوى الولد لاهوب صبحٍ ولا ليل=لا فيه فودٍ ولا فيه ناموس
اوامره في البيت زجرٍ وتنكيل=ومن الزعل جوفه من الغيظ متروس
كل شي يبيه مولمٍ له بتعجيل=ومن والدينه واسرته كنّه منفوس
مضيعٍ وقته مع سافل الجيل=ومن المراجل كنه الجحش مركوس
والكلب ما يطهر ولو دخل بالنيل=تراه كلب لا هو بالشط مغموس
لا واهني اللي عياله رجاجيل=يجلون همه لا غدا كنه مضروس
يقضون حاجاته بليا مراسيل=وافعالهم وعلومهم ترفع الروس
هذا زمانٍ ما نبي نكشفه حيل=ولاني على عروات الانذال جاسوس
ولا تراني ماهرٍ بالتماثيل=وعندي لسانٍ قاطعٍ كنه الموس
لاشك ما ودي نزود المكاييل=ونبيّن اللي حدر الاسلاب مدسوس
حيث المعنى بيّن كنه سهيل =ما يجهله كون اخرق الفكر مطموس
دنياك هذه كل ابيها غرابيل=الشد مايل والهواء غادي كوس
ذعذع هواها للهمج والمهابيل=اللي طبايعهم خبيثات ونجوس
صارت سوى اصقورها والبلابيل=وسباعها تجفل إلى شافت العوس
والله ماني ظالم كل حلحيل=اللي طريق المرجله راكبه قوس
قصدي على اللي يشبهون البراميل=اوادمٍ مير انهم صاروا اتيوس
ولكل منهم جثةٍ كنه الفيل=تلقاه من كثر العلف كنه جاموس
عقب التصعلك صايرينٍ زناقيل=ومن الهلل ربوا تجارات وفلوس
عسى لهم عند الضحى طير بابيل=ولا حدقوبه فوقهم حاسهم حوس
وهذه بعض المرثيات التي قيلت في شاعرنا بعد وفاته رحمه الله :
مرحوم ياشيخٍ ثوى بالنسيم=ليلة خميسٍ ودعوه الجماعة
قفوا وقالوا في جوار الكريم=وداعته اللي ما يخون الوداعة
وداعة الله يابن كل الزعيم=فرسان نجد أهل الكرم والشجاعة
وداعة الرحمن يومه رحيم=غافر ذنوب اللي رجعله وطاعة
يالله تمن وحشته ياكريم=بجاه الذي ربه عطاه الشفاعة
وتبدله بالأهل جنة نعيم=في عالي الفردوس تبني شراعه
الشاعرالشيــــخ/محمد بن فهد بن منصور بن منيخر
وهذه قصيده أخرى رثاء في الشيخ بطيحان بن محمد بن منيخر رحمه الله وأسكنه فسيح جناته:
يبكي عليك القلب والشعر يرثيك=بمفرداته والقصايد حزينه
ياأبو بطي حتى المشاعر تعزيك=فرقاك يا رجل المواعظ غبينه
يكرم كريم أخلاق تعطي ويعطيك=ربٍ وهبك إيمان طيب وسكينه
وجه الرضى درب التسامح يقديك=فيك الخصال الطيبات الثمينه
نذكر مواقيفك ونبكي لياليك=طويت بغيابك شراع السفينه
الجود جودك والمبادي مباديك=انت الاصول الواضحات المبينه
انت التقي انت الشدليد تسميك=فراغك اكبر من حصونٍ حصينه
مستقبلك حافل على اطلال ماضيك=يالوجه الابيض يا سحاب المدينه
نبكي وندعي لك إلى حل طاريك=يالله يالمعبود عبدك تعينه
هذا اولك يالوقت ينعاف تاليك=العين تدمع والعباير سجينه
الشاعر / ناصر بن كروز بن منيخر
وفي الختام اعذروني على التقصير فهذا ما استطعت ان اجمعه عن شاعرنا رحمه الله
تقبلوا كل الشكر والتقدير
19-09-2006, 03:51 PM
العرض العادي
المواضيع المتشابهه
