مساء الخير على الجميع
عجبتني اتمنى أن تعجبكم /
الصاحب اللي كان مشغلني برد الأسئلة =حتى سكتّ .. وبعدها صار السكوت أفضل جواب
كم قلت له : مثلي عن ألوان العمر لا تسأله =أنا تساوت عندي ألوان السعادة و العذاب
أنا حياتي مالها إلا لون واحد .. واجهله =خليط من لون الهوى و النار و الماء و التراب
ما مر في عمري مراحل .. كل عمري مرحله=في كل عمري كنت طفل وكنت كهل وكنت شاب
أصير شايب ما شعرت..إن المقابيل أرمله =وإذا شعرت إن المقافي طفلة أعود شباب
أنا الغريب اللي جميع الناس في الدنيا هله =وبرغم هذا خاطره من قرب كل الناس طاب
أبكي على حالي لأني ما قدرت أبكي وله =واضحك على حالي لأني ما قدرت أضحك اعجاب
مالي شبيه إلا السكوت اللي يثير البلبله =ومالي نقيض إلا الكلام الكذب و الفعل الهباب
بين الأماني الماضية و الذكريات المقبله=أمشي وخطوات الحضور أرسم بها جرة غياب
أتمهل إن مرتني أيام الرخا مستعجله=وأقول لو تقبل علي بالمال : يا مال الذهاب
قدرت أعيش الواقع اللي ما قدرت أتخيّله =مدري أصبت العذر أو في عذري أخطيت الصواب
بس المهم إني قدرت اضرب لغيري أمثله=وشلون ما يرجي ثواب الصدق أو يخشى العقاب
ما هو غرور ولا تواضع .. كل ما في المسألة =يا صاحبي .. إني رفضت أحسب لغير الله حساب
طرد السراب لمن يحسبه ماء .. ما هي مشكله =المشكله .. طرد السراب لمن يعرف إنه سراب
للمبدع/
رشيد الدهام