القصيدة التي نشرتها جريدة الجزيرة في صفحتها الأخيرة ليوم الأحد 16/11/1426هـ الموافق 18/12/2005م ... أبكت الجميع وحركت المشاعر وأثارت الأحاسيس ... أم نايف من رحيمه(رأس تنوره) تحكي معاناتها في ابنها القابع بين قضبان سجون أمريكيا في ولاية كلورادو... هي بحق قصيدة تستحق التشريف وقد توجتها بمدح وثناء لم أر مثله لصاحب السمو الملكي الأمير سلطان بن عبد العزيز ولي العهد طالبة منه التدخل في القضية .
نسأل الله أن يفرج عنه وأن يسعد والديه وذويه برجوعه
وتلكم هي القصيدة...
أصيح باعلى الصوت نايف فقدنـاك=عساك تسمع صرختي يـوم أناديـك
أنا أمك اللـي عيدهـا يـوم لقيـاك=يا سعد نفسي لـو عيونـي تلاقيـك
والقلب ناره تشتعل عقـب فرقـاك=ما تطفي النيران يـا كـود أياديـك
لبست ثوب الحزن بعدك ولا انسـاك=والنـوم ودّع يـوم غابـت لياليـك
تاهت بي الخطوات وادروبي أشواك=والدمع من عيني على الخـد يبكيـك
أراجـع الماضـي واعيـد ذكـراك=تشدني الذكـرى وابكـي لماضيـك
سجيـن بالغربـة وياكبـر بلـواك=الله يعينـك دايـم فـي بـلاويـك
هذا القدر مكتوب ... مكتوب ما جاك=اصبر عسـى الله بالنهايـه ينجيـك
بديار ( بوشٍ ) سجنك الموحش هناك=ياليت لي قدره على الدرب واجيـك
يا سجن ارفق مسندي وسط مبنـاك=ما شاف شمس ومظلمـات مبانيـك
مدري يا عمري كيف الأحوال ويّاك=طمني عنك طمـن امـك تحاتيـك
من يغسل اهدومك ومن قام يرعـاك=ومن يطبخ الوجبات منهو يواسيـك
ومنهو الذي بالليل لا نمـت غطـاك=خوفي عليك البرد بالحيـل يوذيـك
ودي قبل موتـي مشاهـد محيـاك=ودي أضمك فـي يدينـي وحاكيـك
يا حافر قبـري دخيلـك رجينـاك=تحط فوق النصب نيشـان بوصيـك
يمكن يحين الوقت ترجـع لمربـاك=وتزور قبري مسرع في خطاويـك
يا سيـدي سلطـان تكفـى طلبنـاك=يا راعي الفزعات تشكـر مساعيـك
شـلال طيـب منبعـه دوم يمنـاك=خيرك مغطي كل بيـت باراضيـك
وقت الشدايد ما لها غيـر شـرواك=يبشر بعزه كل من جـاك ناصيـك
يـا سيـدي سلطـان حنـا فدايـاك=بارواحنـا نفديـك نفديـك نفديـك
الجود وانت الجود يمشي ببمشاك=يمشي وراك ويتبعك ما يجاريك
يتعبني مدحك لـو أعـدد سجايـاك=والشعر يرفـع رايتـه مـا يوفيـك
يالله عسى المولى يصونك ويرعـاك=ويعود نايف يـا عسـى الله يخليـك
أبختصرها يا ذرى كل مـن جـاك=شكوى تجيلك تنتهـي مـا تعديـك
17-01-2006, 11:16 AM
قصيدة أم نـــــــــــــايف
العرض العادي
المواضيع المتشابهه
