|
محاوره بين عبدالله بن منـصّر وبـدر الجـذعّ العتيبي 0!!!
السلام عليكم ورحمة الله وبركاته
هذه محاورة بين عبدالله بن منـصّر وبـدر الجذع العـتيبي
عسى أن تحوز على أسحسانكم 0
* * *
عبدالله بن منصّر
سلام رديه على منقع السيل = الصايمه والحايمه قد رواها
الكيل لامنه حضر يوفي الكيل = شغموم ربعه لاحداها بلاها
* * *
بدر الجذع
يامرحبا ياراعي البن والهيل = ترحيبة(ن) تضفي على من قراها
لأجلك يابومنصّر نعيد المراسيل = أرسل ومال العله ألا دواها
* * *
عبدالله بن منصّر
دام البقا يامحلل القول تحليل = ياشاعر(ن) ذود الشعر قد قناها
الذيب لامنه عوى تالي الليل = وش حيلته من عويته لاعواها
* * *
بدر الجذع
الذيب ياعبدالله يقنب من الويل = من جمرة(ن) بأقصى الضماير لضاها
روّح وفارق من يود التعاليل = أبو جديل(ن) لاسرى الليل جاها
* * *
عبدالله بن منصّر
أنا جمل ماعاد يقوى على الشيل = دنيا عطتني ياعميلي قفاها
أن جيت ابذكر مهرتي وانكر الخيل = الله من النكبات يامن نباها
* * *
بدر الجذع
ارقا سنود العزم موجود والحيل = والارض ماشحت علينا بماها
مدام لك ربع(ن) قروم ومشاكيل = أبشر بزهر الدار واللي حماها
* * *
عبدالله بن منصّر
مهره خطاها ماتعثر من الميل = مضمارها يشهد على مستواها
شريتها في محكم القول والقيل = يوم الشكاوي عند ربي قضاها
* * *
بدر الجذع
كل(ن) على ليلاه جر المواويل = والعالم الله كيف ينسى هواها
عندك خبر ولكل علم (ن) مداخيل = مير الحراسه كيف ندخل علاها
* * *
عبداالله بن منصّر
أشوفها تسبح معي غبة النيل = لو لدّت عيوني لقتها وراها
مهره شرفها في عصر صاحب الفيل = لاوحسافه يازمان(ن) خذاها
* * *
بدر الجذع
ياغايص(ن) غب النهر ورّد الحيل = يمكن على الله ترتوي من ضماها
يوم اننا باالطيب سقنا الفناجيل = غصنا بحور الشعر وحمنا سماها
* * *
عبدالله بن منصّر
ماقصدنا مدح الشعر والتماثيل = حورية(ن) او مهرة(ن) أو حداها
ياصاحبي بدر الدجا والقناديل = ليت الولي يرزق جنابك سواها
* * *
بدر الجذع
ابنشدك ياصاحبي وانت حلحيل = تحلحل العقده وتصلب مداها
لاشفت من دنياك عد البهاذيل = هات العلوم اللي بصدر نباها
* * *
عبدالله بن منصّر
العلم يمسي في قلوب الرجاجيل = والدين والسنه مضى مقتضاها
ياكيف ابشكي والليالي مقابيل = أشرف عباد الله قبل ماشكاها
* * *
بدر الجذع
اختامها مسك(ن) وعود ومخاييل = تبرق وترعد في ديار اقصراها
لاهنت ياطب القلوب المعاليل = الطرق وافي والمعاني وفاها
* * *
سلامتكم
 |
التوقيع |
 |
| |
كريم العرب لو مد لي يافهد 00 مسواك = جسور الوصل يبنى على دربه ،، أكثرها
طراة الخوي ينسى عيوبك 00 ولاينساك = على طاعة الله خوة الطيب ،، يذكرها
عبدالله بن منصّر |
|
 |
|
 |
التعديل الأخير تم بواسطة : راشد العتل بتاريخ 11-09-2008 الساعة 01:46 AM.
|
05-09-2008, 05:01 PM
العرض الشجري
المواضيع المتشابهه
