(مابقى لسهـــــــــيل كـــــــود اربـــــع لــيــال )

[شيخ قحطان]

هب ذعذاع الصفاري من شمال = وانعش الخفاق في نسناس ليل
مابقى لسهيل كود اربـع ليـال = واكثر العربان ماهمـه سهيـل
لانشا من يمـة القبلـه خيـال = كن لمع بروقها لمـع الصقيـل
حس رعاده تلـج بـه الجبـال = منذر بالخوف والخير الفضيـل
هل وبله وانتثر في كـل جـال = سالت الوديان والشعبان سيـل
جاك علمه وانبسط راع الحلال = والطيور الها تغاريـد وهديـل
كن ريضانه تصوت لـك تعـال = ريحها عقب المطر يبري العليل
والحطب والنار مع صفر الدلال = ريح رمث وريح بن وريح هيل
والشراع وجمعة قـروم العيـال = ماتوسط بيننـا خطـو البخيـل
والقنص خوة مشاكيل الرجـال = والحرار اللـي فعايلهـا تهيـل
ماحلا لا حركن عقـب الـزوال = أربع الجيبات خامسهـن دليـل
ثم نزلنا وسـط روضً توسـال = باذره بيّن مع العشب الحويـل
ثم بنينا خيمة المعـزاب حـال = والتهينـا ذا يحـط وذا يشيـل
والعشا والفـال يقفـاه العقـال= والوكيـل الله ولاغيـره وكيـل
لاصدفنا عقب شق النور فـال = خربً ازرق صيدته تشفي الغليل
فرغوا مع قولة الـزم باحتمـال = هاقي بالطيـر ماهـو بالذليـل
بكرً ارقط ماعلى فعلـه جـدال = قد طرحها فرخ هدّوابه فصيـل
الموامـي لاقصـار ولاطـوال = والكفوف جلاف والعاتق طويـل
والحباري طربة في كـل حـال = عند راع الكيف منظرها جميـل
لـذّة الدنيـا وتاليهـا الـزوال = وانت يابن آدم كما عابر سبيـل

[wolf]

صح اللسانك يا صلب جدي

[نفسي اتعلم الشعر]

لله درك على هذه القصيده المبدعه يا مبدع صح لسانك ولسانك شاعرها



تقبل صادق الود مني يا شيخ قحطان


نفسي اتعلم الشعر

[شيخ قحطان]

wolf لاعدمتك اشكرك على المرور بيض الله وجهك

[شيخ قحطان]

نفسى اتعلم الشعر

الله لايهينك على المرور اتشرف بمرورك وتعليقك بكل جد انت شعله المنتدى

شيخ قحطان

[الشيخه]

لاهنت على القصيده الرائعه

لاجاك سهيل لا تامن السيل

تقبل منى خالص التحيه

[شيخ قحطان]

ارحبى ثم ارحبى يالشيخه ( والله يستر)
الشيخه اشكرك على مرورك الذى يزيدني شرف
تقبلى منى الرق التحايا

[ليال الحنين]

والحطب والنار مع صفر الدلال
ريح رمث وريح بن وريح هيل
والشراع وجمعة قروم العيال
ماتوسط بيننا خطو البخيل



شيخ قحطان ..صح لسانك . . قصيده رائعه ..

تسلم يمينك ..

[شيخ قحطان]

ليال الحنين
اشكرك على المرورلاهنتى يالغاليه
تقبلى خالص تحياتى