أنتي لي أجمل بشر بالكون عايدني ** والله يالولاش مالي فرحة العيدي

[عبدالله بن قنيفذ]

السلام عليكم ورحمة الله وبركاته ،،،
ـــ
أحبابي الغالين أعضاء وزوار منتدى العجمان "" كـــل عـــام وأنتــم بأتم الســعادة ""
ـــ
هنا أكتب عيدية قدمتها لأغلى بشر عندي بالكون "الوالده" الله يعطيها العافيه وهنا أيضا أضعها بين أيديكم إهداء يحفوه الاحترام.....

.

يالله ياللي بيـدك الـروح ساعدنـي=وساعد عباد ترقب فرحـة العيـدي
اسألك بالعـروة الوثقـى تجودنـي=ياللي بأساميك أبدى الشعر تمهيـدي
من بعد ذا القلب سيرنـي وحددنـي=صوب الذي عدها يسقي مواريـدي
العمر لرضاش طايع ليـن تلحدنـي=أيـادي الخلـق بقبـور مهاميـدي
قصايدي في زعل بعتـاب تنشدنـي=متى يا عبدالله بيـدك حلـة القيـدي
رتبني بصـف كلماتـك ومجدنـي=لإكرام من حقها التمجيـد ياسيـدي
وإن ما اسمعتني دخيلك كرر وعدني=على المسامع اليـن تمـل ترديـدي
جتش القوافي وحبل الفكر قايدنـي=تبارك العيد بـش ياشيخـة الغيـدي
ياللي لغيرش قوافي الشعر تنقدنـي=ومجد القوافي يلاقي فيش تخليـدي
أنتي بعيني منار الكون لـو قدنـي=ماشوف بالكون من سود الظلام إيدي
وانتي بعيني فرح الايـام يسعدنـي=لو جاء لجو الحزن زفرات تنهيـدي
وانتي بعيني سحاب ماطـر مدنـي=يسقي الضوامي ويزهر قافر البيدي
وانتي لي أجمل بشر بالكون عايدني=والله يالولاش مالي فرحـة العيـدي

وسلامتـــكم ,,, ومن العايــدين..