بالروح بالدم نفديك ( ‬يا بن حثلين)

[سياسي محنك]

باردين على التأبين حارين على القبايل
خالد صالح العبيدي
يالأجاويد ‬يالغاليين هدوا أعصابكم ولا تجون من أقصاكم، ‬ترى مو حِنَّا إللي ‬سوينا مجلس تأبيني ‬على الآنسة مغنية ولا حِنَّا إللي ‬متهمين بقلب نظام الحكم ولا حِنَّا إللي ‬تكلمنا بقناة (‬العالم والمنار) ‬وقلنا الكويت فيها وفيها، ‬ولا حِنا إللي ‬قلنا إن الكويتيين (‬طفيليات) ‬أو (‬سفهاء)‬، ‬ولا حِنَّا إللي ‬ننتمي ‬لحزب الشيطان الرجيم، ‬الظاهر الأمور اختلطت عليكم بالعربي ‬حِنَّا ما نتلقى أوامر من (‬بره) ‬علشان نكون منظمين، ‬وكل واحد ‬يعرف قيادته والدليل على عدم الإنتماء الخارجي ‬هو تفرق الجميع مع إطلاق أول قنبلة صوتية، ‬باختصار حِنَّا ناس ننتمي ‬لهذي ‬الأرض وقيادتها ولما سمعنا إن بعد شهرين انتخابات قلنا ليش ما نجتمع ونستطلع رأي ‬بعض، ‬ونشوف كل قبيلة منو تبي ‬يمثلها بالمجلس والموضوع ما تجاوز قضية التشاور، ‬وأنا هنا أصر على أن القانون لا ‬يمنع التشاور إطلاقاً ‬ومستعد لمناظرة أكبر القانونيين في ‬هذا الشأن، ‬عموماً ‬لو كنا ندري ‬إنا بنزعلكم كان ما سويناها، ‬ولو ندري ‬إن عندكم مرشحين محددين تبونهم ‬يوصلون كان ما سويناها، ‬والمفروض تفَهّمونا إنكم ما تتغشمرون معانا لأن بصراحة إحنا ‬يوم شفنا (‬جماعة أنصار مغنية وحزب الله) ‬احتشدوا عند مبنى أمن الدولة ومحد سوالهم شي، ‬قلنا سلامات الجماعة طيبين وما ‬يسوون شي ‬ويوم شفنا الموضوع صار أكبر ونفس الجماعة ‬يتظاهرون عند وزارة الداخلية ويهتفون بالروح بالدم نفديك ‬يا (‬حسين) ‬إللي ‬هو المتهم الرابع في ‬قضية أمن دولة ‬يوم شفنا الموضوع هالشكل قلنا السالفة خرطي ‬والدعوة كلها سهود ومهود، ‬علشان جذي ‬راحو أهلنا أبناء القبايل وتجمهروا عند المباحث ‬يبون ‬يشوفون وضع عيالهم، ‬وبعدين محد فيهم قال بالروح بالدم نفديك (‬يا بن جامع) ‬ولا أحد فيهم قال بالروح بالدم نفديك (‬يا بن حثلين) ‬ولا أحد فيهم قال بالروح بالدم نفديك (‬يا بن شافي) ‬ولا راح ‬يقولونها ولا راح تسمعونها لأنهم هذيلا أهل الكويت وراضين بحكامها، ‬وأميرهم، ‬واحد ما فيه ‬غيره صاحب السمو الشيخ صباح الأحمد الله ‬يحفظه، ‬وموطنهم الكويت، ‬وما منهم خطر ولا خوف ‬الله ‬يستر عليكم، ‬يالأجاويد الظاهر البوصلة عندكم افترت أو إن جماعة معتوق إسحروكم بسحر أسود، ‬لكن على العموم إن شاء الله حِنّا ما راح إنتعودها ولا راح نَقرب صوبكم بس خلوا بالكم علينا ترى مثل ما انتوا سندنا حنا سندكم وإلا الجماعة إللي ‬خبركم ... ‬الله ‬يستر علينا وعليكم منهم.‬

صاروخ إبدوي ‬موجة
حِنّا ندري ‬إن الأب ‬يقدر ‬يضرب إعياله، ‬بس ما ‬يقدر ‬يضرب اعيال الجيران وخصوصاً ‬لا صارو الجيران قشران، ‬وندري ‬إن الأب مهما ‬يقسى على عياله ‬يظل ‬يحبهم ويحبونه، ‬وراح ‬ينسون الضرب إللي ‬كلوه من أبوهم، ‬لكن إن طق اعيال الجيران إبتلش فيهم، ‬كلنا مع حفظ الأمن وفرض هيبة الدولة ولكن على الجميع فظلم بالسوية عدل بالرعية.‬
http://alshahedkw.com/index.php?opti...5851&Itemid=42
_____:

تعليق: سلمت اناملك يا استاذ خالد على المقالة الرائعة

[المـفلحي]

هذا الكلام الي يثلج الصدر

[أبو مسعود]

بيض الله وجه على الكلام الطيب والرائع



ولاهنت على النقل

[طبعي عنيد]

كلام في محلة نعم جميع قبائل الكويت ولاء للكويت واميرها

تشكر على النقل والكلام الذي يثلج الصدر

[فيصل أل هتلان]

يأسلامي عليـك . فديت نخـرك كلامك وافي من راس وافـي

تحياتي

[الفيصل@@]

الرد الشافي من المحنك السياسي ......!!!

مشكور على الموضوع الجميل ...

[عبدالرحمن آل ضبان]

بيض الله وجهك ومن أول وتالي وأهل القبائل مع الكويت وأغلبية الموظفين بالسلك العسكري اللي يحمون الكويت هم من أبناء القبائـل .....!!!!

[طمن قلبي عليك]

الله لايهــينك على هالحكي الطيب واللي بينت فيه معدن واصل ااهل الكويت المخلصين لها

وهذا الشي مهوب غريب على جميع ابناء القبايل الموجوده بالكويت



تقـــــــــــــــبل مروري مع تحــياتي

[alfares]

بيض وجه كاتبها الاستاذ خالد صالح العبيدي وناقلها الاستاذ سياسي محنك كفيت وفيت يا استاذ خالد هذا الكلام اللي يبرد القلب ورد صريح