قصائد وبنذة عن الشاعــــرة ( بخوت المريـــــــة ) ؟

[راعي المهدبه]

السلام عليـــــكم ورحمة الله وبركاتــــة
اقدم لكم نبذة عن الشاعرة المعروفـــة رحمها الله بخوت




نسبها

بخيتة بنت عايض ال عذبة المري المعروفه بأسم بخوت



موطنها :



عاشت بداية عمرها جنوب منطقة الاحساء مع والدها على عد (الزرنوقة) وكذلك حول بير (فاضل) وكلاهما موارد لقبيلة مرة


حياتها الاجتماعية


كانت يتيمة الام وقد تزوجت ثلاث مرات ولكن لم ترزق بذريةوقد عاشت في بداية حياتها مع والدها عايض المري
تنتسب بخوت لعائلة آل منيره ... والذي يقطن غالبيتهم في مدينة المره بجنوب قطر


شاعريتها:


كتبت بخوت الشعر وهي في سن مبكرة في الثامنة من عمرها تقربيا ولقد تطرقت لجميع اغراض الشعر النبطي من مدح وغزل ووصف ورثاء ومحاورة
والشاعرة هي عمة ( الشاعره المعروفه.. الراسيه )

ليته يناديني وانا بـس اناديـه=واجاوبه ياحسين ولو كان مره
عليه قلبي يابسـات عراويـه=اقفا ابقلبي من ضلوعي يجـره
ذالي ليال قاعده فـي حراويـه=ليننهـا زادت علـى المضـره
قمت اتوجد وجد من مات غاليه=قبوه اقبالـه كـل يـوم يمـره
أو وجد من خاوه والليل ممسيه=ينخا ولا حد من هل الهجن مره
خلي طريح والضواري اتحاضيه=بالمقطعه وامقابله ضلـع حـره
على الذي ماشفت حي ايحاليـه=شيخ على القوم المعادين شره

وفي اجمل قصايدها قالت :

جيت المنازل خاليه ما بها اونـاس=من عام الأول ارضها ما وطي بـه
ولقيت مرح أهل المـروات دراس=علمه بهم يا بو مطر علمـي ابـه
مريتهـا يـوم المعاليـق يبـاس=ونزلتها يـوم الضمايـر عشيبـه
وونس بصدري واهج الحر حماس=احسب من فارق هله لي يجي بـه
واقفيت كن ابسرت القلب مـراس=واقنب كما يقنب من الجوع ذيبـه
واعول كما تعول على البو عرماس=ومن لامني جعل حوالـه عطيبـه
باللي يفكون الطلب عقب الادماس=ربعي مصخرت العـدو بالغصيبـه
اليا منهم ركبوا على سرج الافراس=وتحيزموا من فوق قـب عريبـه
اليا اعتزوا ببعير عالـي السـاس=خلوا على جمع المعـادي حطيبـه
ذكر الموده للعرب ما بهـا بـاس=لكنهـا علـى المولـع مصيـبـه
حب الرفاقه شيب القلب والـراس=وباق المـوده لـه بديـل قريبـه
باقي العرب تلقا بديله مع النـاس=واخوك لو درت البدل مـا لقيبـه

ولها :

مل قلب ٍ فـر وأفتـر مثـل المروحـه=فرهـا فـرت جديـد قـوي ٍسيرهـا
ان ضحك لي صاحبي سر قلبي وافرحه=وان تغلى صاحبي زاد عينـي شرهـا
صاحبي ناوي يذبحني وانا مقوى اذبحه=شب في كبدي سنـا نـار زوّد حرهـا

وقالت رد على من علق على جراءتها الشعريه

العب المنكوس وارفع بصوتي ماعلي=من هل المنقود واهل العلوم الهينـه

يقال انه كانت لها قصة عشق بين أحد ابناء عمومتها ويدعى " محمد "
وكانت لا تخجل من هذا العشق الطاهر بل كانت تجهر به وكانت تذكر محمد
في اغلب ابياتها وهذه احد ابياتها فيه ...

ياهل البيت المطرف تراني يوم جيت=عندكم لي حاجة ٍواستحي ماقولهـا

ايضاً في محمد ...

المحبه لا سطت ما يعالجها الطبيب=روحتك ياصاحبي ليت ربي لدهـا
عادة الدنيا تفرق حبيبٍ عن حبيب=وقطعك يارفقة ٍوالمفـارق ضدهـا

لها في الأحلام

البارحـه والحبـايـب كلـنـا لـمـا=يوم اصبح الصبح كل(ن) راح في داره
حسبي على الحلم يكذب جعلـه الهمـا=سوّى بحالـي كمـا عـود ونجـاره

ايضاً في ابن عمها " على " وكان بمثابة الأخ لها والأقرب إليها

ياعلي ياخـوي ويـن بدوانـي غـدو=لا خبـر ولا مديـد ولا قلبـي بنيـس
راحوا العربان في شف قطعـان البـد و=في هوى الخلفات ماراوزوا يوم الخميس
نحف حالي ياعلي نحف مـدراة السـدو=وزوع قلبي زوع حر ٍ إلى شاف القنيص

ولها ايضاً في الحكمه ...

تل قلبي تل طيرٍ على الجول مهـدود=يطرد المقفي وطرد المقافـي كايـده
مهبلك ياللي تبي الوقت الأول لك يعود=من يرده كود محيي العظـام البايـده

نوادر من قصائدها

جعل وبل الغيث يسقي ديار المفرعين=منزل اللي كن حديثة حليـب معدّيـة
ضيقيتي في خاصري دايم ماهوب زين=قومي اللي سم حالـي وبيـح سدّيـة
ان سجنته قام يتبـع دروب الدالهيـن=وان نشدته قال انـا علتـي متعدّيـة
ان بغى خلي جنابي فلا غيره ضنيـن=وان بغى يقفي فيقفي مـراح مودّيـة

ومن نوادرها ايضا هذة القصيدة اللي تشبه فية الحرية واستعادتها مثل طير شاهين ربيطة السبق

زوع قلبي زوع طير قطع قد هو حكير=من شياهين البحر واستخل اهجارهـا
كل ما صاح االمصيح تعلوت تستديـر=عقب ما هي حكرة سعدهـا بطيارهـا

وقالت في الحزن )

انا دمع عيني بالدقايـق وبالساعـات=ولا هي على فرقا المحبيـن مستـره
هواجيس قلبي كل ما أقول راحت جات=تعود علي باليوم خمسة عشـر مـره

وقالت كذلك في وصف ناقتها التي كانت تسميها (ذروة)

كن ذيل ذروة راس بنت على زيان=يازين شوفه في العراقيب يجتالـي
يازين شوف حوارها بارك ريـان=في حرف روض والمضاهير نزالي

تقول بخوت المريه وهي أشهر من تكلم عن السيارات من النساء :

حن قلبي حن (( ماك )) على سمر العجل=عشق السواق والـدرب ممسـوكٍ وراه
ما بشفي لا دريـول ولا ريـس عمـل=شفي اللي كـل ماشـاف بـراقٍ رعـاه
ونتي ونة خلـوجٍ ولدهـا مابعـد جـدل=تشرف المرقـاب للـذود وتعـود وراه

وتقول أيضاً :

ياحن قلبي حن ماكٍ مع الطلعات=ليا عشقه بالعايدي والدبل جره
جرمة ثقيل وحملوا فوقه البيبات=ويدعس عليه ببنزينه ولا سرّه

والماك : هي السيارة الكبيره ..

أما في وصف السيارات فقد برعت الشاعره فيه

تل قلبي تل فرت ٍعلى سبر العجـل=عشقه راعيه والحوض تحته قد ملاه
ان تسنّد عشّقـه ثـم لـده بالدبـل=وان تحرر ريّحه لين ياصل منتهـاه

ولها بوصف المرسدس

المرسدس محلاه في طلعت ام حويض=اليا عطي ثالث جاوب السير شكمانه

ونلاحظ هنا دقة التعبير والوصف في هذا البيت


وقالت في الفراق

ياجماعة وإن عزمتوا على أنكم راحلين=غمغموني عـن مظاهيركـم لاشوفهـا
كن في قلبي لهب نـار ربـعٍ نازليـن=اشعلوهـا بالخـلا والهبـوب تلوفهـا
ول عودٍ لاش رحمه ولا قلـبٍ يليـن=عسى ذودك في نحر قومٍ وانت تشوفها
عيدوا بي في الخلا والفريق معيديـن=وكل عذرا نقشـت بالخضـاب كفوفهـا
مايقرب دارهم كـود صنـع الذاهبيـن=كود حمرا عزمها من صفـاة بلوفهـا
كن حنين الويل يشبه لخلفات القطيـنلين=وا له بالقدم مـع طمـان اجروفهـا

وتقصد بالحمرا : السيارة ..


وقالت في التوجد :

ياوجودي وجد من حط معروفه وضاع=بين بواراً ومن بين جحـاد الجميـل
اووجود اغريراً فاقداً حلـو الرضـاع=ماتت امه والمنايح حلال القوم حيـل
او وجود اللي فقد خوه ابن عمً شجاع=محزماً فالضيق وان جاه مختف الشليل

كما لها بالتوجد على حياة البر والباديه:

وجودي على بيت الشعر عقب بيت الطين=وجودي على شـوف المغاتيـر منثـره
وجودي على خوة هل الموتـر المقفيـن=وجودي على شوف السهل من ورا الحره
ليا حلوا البدوان وصاروا علـى بيتيـن=ومن كـان لـه خـل مـع ذاك ماغـره

وقالت ايضا :

ما بشفي لا دريول ولا ريس عمل=شفي اللي كل ما شاف براق رعاه
قاطنين فوق عد على جاله عبـل=طيب للبل وراعيه ما يقطع ضماه

وفاتها

عندما تقدم العمر بشاعرتنا استقرت بقية عمرها في مدينة الدمام يمنطقة تسمى ( كمب البدو ) وحاليا اسمها ( حي البادية) حتى توفيت هناك عام 1995 ميلادي.

الله يرحمها ويسكنها فسيح جناته...


أتمني أن لا أكون أخطائت أو بالغت أو قصرت في حق الشاعرة رحمة الله عليها

سامحوني على القصور


أخوكــــــــــــــم




راعي المهدبـــــــــــــة