لعلام خداع والصفحات خداعه

[فهد ال مسعود المري]

لاحل طاري القصيد وشبت شموعه=الله يحيي القصيد ومبرك الساعه
بيبان الاشعار من عامين مردوعه=مع ان جزل القصيد الراس مرباعه
الشعر مثل البحر والجزل في قوعه=احدٍ طفح فوق واحدٍ غاص في قاعه
اكبود بعض البشر ياناس مفقوعه=اتشبها من لهيب الحقد ولاعه!!
ولاعة الحقد بالتزييف مصنوعه=مالله موفق موردها وبياعه
هو يحسب انه يروع جعله الروعه=مايدري ان كل وادي دونه اسباعه
امخربين الادب ياناس مجموعه=يسعون بالتفرقه ماهم بجماعه
انشهد الناس ياعقال مقلوعه=الحبل ماتربطه بالعكس قطاعه
والجاهل اللي ماميز كوعه وبوعه=يرقص على نغمة الشيطان وايقاعه
واللي تطبع طبوعٍ ماهي طبوعه=يلقى من الناس طبيعه وطباعه
ومن يلحق الناس والاجواد موضوعه=ينحط للناس زوليه وشماعه!!
ومشاكل الناس مقريه ومسموعه=ولا على شاشة التلفاز منذاعه
والشرق الاوسط بكى من يمسح دموعه=ماغير خلف القناه انتابع اوضاعه
وكلٍ تمدح جهل ثم قال مشروعه=بعد استكانه ومالبورو ونعناعه
وصفق له ابليس والشيطان وربوعه=ثم عارضه واحدٍ طبعه من اطباعه
يهل الحكاياعن التفريق ممنوعه=الله يهدي قلوب الناس للطاعه
الدين واهله مهي لبليس مخدوعه=حتى ولو كل جاهل شمر ذراعه
اسامي الناس فالصفحات مطبوعه=ولعلام خداع والصفحات خداعه!!