ضربة من يد معلم على راسي عقال

[فهد آل مخلص]

هيه يابنت جمالك تعدى اقصى الخيال=الجمال إللي عرفته جمالك فايقه
إن بغيت اوصف جمالك فلامثلك محال=عن جميع البيض والله إن وصوفك فارقه
من غلاك ابدعت في الشعر لين اصبح زلال=سلسبيل فكرته من مزاجي رايقه
قلتها من شان عينيك ياوافي الجمال=قبل آعرف الجوهر إللي انت فعلا حايقه
احسب إن هرجي يثمن وبرقابه جبال=اثربعض الهرج شمس علينا شارقه
واحسب إن مزحي معك مافتح صوبي مجال=اثر مزحك شين بعض النوايا سايقه
مانويت آنزل النفس وامشي في الخبال=وكل من هويرخص الغاليه بافارقه
شيمتي تاج على الراس ولراسي ظلال=من سموم الصيف ومن الشموس الحارقه
ابعدي عني وانا ببتعد والشك زال=انكشف خافي نواياك يااسرق سارقه
سلعتك مغشوشة ماتبي روح وتعال=ابعدي لعن الله ابوعشرتك يالمارقه
اذهبي واذهب وانا الظاهر الممشى شمال=صوب دار مدهل للقلوب العاشقه
آتمشى في الفيافي إليا ماالظل مال=في الرياض الخضر بين الغصون الوارقه
وإن برق برق نصيته ولومالي حلال=البدو قبل الحيا يشبحون لبارقه
إبدوي بصخر القاف وارقى في التلال=وفي ظلال الغار باشب نار شاعقه
ومن خيار دلال رسلان بشري لي دلال=يفتخر فيها المقهوي وفعله شايقه
حيث لامنه لفاني كريم من رجال=ادمر البن المنقى وغيره لاحقه
قبلها الترحيب وافعال تفعل ماتقال=وإن حكينا فألحكي والفعل متوافقه
وعاد شفي مع رجال الوفاء في كل حال=وكل رجال فعوله تدون سابقه
الغناه وعزة النفس عندي راس مال=وغير عز النفس مالي رفيق آرافقه
كون كفو في المراجل فعوله ماتطال=مايوطي الراس لو إن عداه تضايقه
وضربة من يد معلم على راسي عقال=افتخر فيها لو السم منها ذايقه
والهروج تروج بين الشفايف والذبال=وراعي النمه وشلالها ماآصادقه