ابن شريم ينصح أبنة

[راجح الفهادي]

قصيدة الشيخ سليمان بن ناصر بن شريم رحمه الله التي يوصي بها ابنه
وهي تشبة قصيدة بركات الشريف المشهورة

منقولة

يـا مـن لعيـنٍ فـي محاجيرهـا شـوك =والقلـب بـه عـن لــذة الـنـوم تـكـاك
لا دك فــي قلـبـي مــن الـهـم داكوك=جـاوبـت طـربـان الحمـايـم والاديــاك
عـزي لحالـك يـا عزيـز وانـا ابـوك=كـان الـزمـان الـلـي وطـانـي تـوطـاك
امشـي وكنـي يـا عزيـز بتابـوك=فـي حـبـس جـبـارٍ تـحـت حـكـم الاتــراك
عـلـى عشـيـرٍ دونــه الـبـاب مصكـوك=مـا غـيــر امـــره واتـعــداه مـنــاك
بــابٍ وراه حــروس مــا هــو بمفكـوك=ومـبـرزٍ دونـــه مـكـايـن وشـبــاك
وبقيـت انـا فـي حضـرة الوقـت مملوك=دولـة زمــانٍ بـيـن جــاك وتـعـداك
افهـم وصـاتـي ياعـزيـز وانــا بـوك=دامـك صغـيـر وغـايـة العـلـم يـقـراك
تـراه مـا ينفعـك خالـك ولا خــوك=لا صــار مــا تقـضـي لـزومـك بيمـنـاك
وربعك الـى بـان الخلـل فيـك عافوك=اقـرب قريـبٍ لـك مـن النـاس يشنـاك
ان كثـر مالـك صدقـوا لـك وطاعـوك =وان قـل مـا بيديـك شانـت سجايـاك
لو تطلب الما عندهـم كـان مـا اسقوك=ابعـد مـزارك عـن وطنهـم ومربـاك
ان جـاد حظـك صدقـوا لـك وزاروك=وان بـار كـلٍ مــا يـبـي غـيـر فـرقـاك
والى اعترض لك من صـروف النيـا صوك=كـلٍ تبـرا منـك مـا هـو بويـاك
وهـراجـة المجـلـس الــى جـيـت وروك=مـنـازل تـطـرب نظـيـرك بـدنـيـاك
والـى قضـوا منـك اللـوازم وخلوك=تفرقـوا وانــت احتـمـل كــل مــا جــاك
كنـك سـراج البيـت للنـور شبوك=والـى قضـى الـوارد حــدا الـربـع طـفـاك
والا كمـا ليمونـة الحمـض مصوك=والـى قضـى منـه الطعـم فرغـوا لــذاك
واللي يجـي مـن رفقتـه ريـب وشكوك=احـذر عنـه ليـاك تصـدق بمسـراك
والـى جفـوك اهـل الوطـن واستخفوك=قلّـع غريسـك منـه واهـدم ركـايـاك
تراك لو تنجع على الرجـل صعلوك=احسـن مـن اللـي تلتجـي لـه وياطـاك
عطهـم وضيايفهـم الـى منـهـم جوك=وغـلّـق ضمـيـرك لا تعـلـم بقصـيـاك
وخدمتـك شيـخٍ كنـك العبـد مملوك=يـامـرك فيـمـا يشتـهـي وانــت ينـهـاك
اعـرف تـراك مبرقـعٍ منـه مشبوك=حـدّرك فـي حـبـل المهـالـك ولا ارقــاك
واصحا لخلان الرخا لو تغالوك=اعرف تـرى اطيبهـم الـى احتجـت يجفـاك
كنك خـوي مقيـط دهـووك واغووك=وحقـك عطـاك رشـاك واقفـى وخـلاك
واحـذر عـن العيلـه تـرى الحـق مدروك=مثـل العمـل يـدرك مـا منـه فكـاك
وان كـان عدوانـك علـى الضيـق حدوك=اخصـم طلابتهـم بعجفـاك وقــداك
وان كانهـم لمشـرّف الـحـق ماشوك=نـاظـر مطالـيـع الـفـرج قـبـل مـبـداك
وان طوعوا شيطان الانفس وهانوك=فاصبر على البلـوى ودفنـت رزايـاك
زرهــم تــراك الــى توانـيـت زاروك=امــا بـديـت بصـاحـب الـسـو يـبــداك
مادامهم ماطاوعوا لـك وعرفوك=اضـرب علـى الكايـد الـى عمسـت اريـاك
لـو هذبـوك مــن المصـايـب وضـدوك=مـا يذبحـونـك قـبـل تـدنـي منـايـاك
واحلم عن الجاهل ترى الحلم مبروك=وقم للضعيف اللي من الضيم ينخاك
وادمح خطا جيران بيتك الى اوذوك=تـرى القصيـر وحرمـة الجـار بحمـاك
عطهـم رواتـب حقهـم لـو تناسـوك=فـي كــل مــا يصـلـح لديـنـك ودنـيـاك
وقم للضيوف الـى عنـوا لـك وضافوك=اغلـى كرامتهـم حجاجـك وبشـراك
واعرف ترى ما لك من الضيف مشروك=لولاه يطلب حاجتـه فيـك ماجـاك
وقـم للرجـال ان ريعـوا لـك وحبوك=واحشـم خويـك واكرمـه عنـد ملـفـاك
والـى اعتبـرت بسيـرة النـاس كفوك=مـا كـثـر مــن شــي تعبـتـه وعـنـاك
ولا تـبـات بـهـم دنـيـاك مضنـوك=مـا طــاب لــك مــادام لــك وافتـهـم ذاك
لو يطلبون اخفايك الناس ما اخفوك=والرجل مثـل النجـم فـي كـل الافـلاك
وصـلاة ربـي عــد الاوراق والشـوك=مـا نــاض بــراق ومــا هــل سـفـاك
عـلـى الــذي مــا فـيـه ريـــب ولا شكوك=مـحـمـد مـــادك بالـقـلـب دكـــاك

[الملكة]

كنك سراج البيت للنور شبوك---والى قضى الوارد حدا الربع طفاك
والا كما ليمونة الحمض مصوك---والى قضى منه الطعم فرغوا لذاك
الله يعطيك العافية..يا راجح..ويرحم ابن شريم..قصيدة مواعظ..

[راجح الفهادي]

هلا بالملكة شرفني مرورش

[مسعطر]

هذا والله القصيدة اللي تحفظ

كل ما جيت أبي أحدد بيت أحترت

بس شي في الخاطر حددت بيت أعجبني :

و بقيت أنا في حضرة الوقت مملوك=دولة زمانٍ بين جاك و تعداك

القصيدة جزلة و مواعظ ثمينة.

الله يرحم ابن شريم و يسكنه الجنة.

أشكرك اخي راجح الفهادي على الأختيار الموّفق

تقبل مروري و سجل إعجابي بالقصيدة.

[راجح الفهادي]

ارحب يامسعطر تمدح القصيدة قومك والله انك عارفٍ معانيها
ولاحطيتها الا أني عارف انها بتعجبك انت وشرواك

[عـسـاه خـيـر]

صح الله السانه على هذا النص الطيب وشكرا لك اخي راجح على هالنقل الرائع .

[راجح الفهادي]

جزاك الله خير أخي عساة خير