أبد..ماجيت أبـارك ..ولكـن جيـت باوصّيـك=على اللـي نـاويٍ تدخـل بهـا الليله..مُعذبّتـي
ترى لولا الظروف اللي عطتك.. وحدت محاكيك=قسـم بالله ماتدخـل بهـا لـو علـى رقبـتـي
ولكنّ (النصيب) اقوى ولا ادري ويش اسوّي فيك=نعم..صـارت معزبتك..ولاصـارت معزبـتـي
كذا ..شاءت بنا (الأقدار) تحرمني لجل تعطيـك=كذا لازم عشان تفـوز إنت..أخسـر بتجربتـي =
تراهـا غاليـه جدا..وتكـفـى..والله يخلـيـك=تدللها..تدلعها..تنـسّـيـهـا مـصـاحـبْـتـي
أنا من كثر مااغليها أحس اني بديت أغليـك..=ولا تسـأل بأيّـة حـق؟ ولاّ وش مناسبـتـي؟
لإنـك لـو بتسألنـي بتسمـع شـي مايرضيـك=لـذا ياخـوي لا تسـأل ولا تسمـع لأجوبتـي
أبيك تحطها في داخـل عيونـك وبيـن إيديـك=وهي دلوعـه اعتـادت علـى كثـرة مداعبتـي
فداعبها شـوي شـوي حتـى تشتهـي طاريـك=وشاغبهـا إليـن تقـول لـك: بطّـل مشاغبْتـي
واذا هي مالها خلقك..ولا تضحـك ولا تسلّيـك=تحملهـا وإسألهـا: ياعمـري ليـه عصبـتـي؟
وبالك أسمع انّك يوم تضربهـا وهـي تشكيـك=مايحتـاج اورّي لـك بفـن الضـرب موهبتـي
صحيح انـك بتملكهـا ومعـك العقـد بالتمليـك=وانا عارف(حـدود الله) ومـن حقـك معاقبتـي
ولكن قلّها (المجنـون) وصّانـي وهـو يعنيـك=يقـول: إنـه بينتظـرك ولـو شيّـب وشيّبتـي
وانا مجنونها اللـي مانساهـا وانـت مايمديـك=تغطّي ذكرياتي فـي هواهـا.. وربـع تجربتـي
أحس اني تماديـت بكلامي..والغضـب حاديـك=لو انّك فـي مكانـي ماتفكّـر فـي محاسبتـي
كفاك اني تركت الليله اشغالـي عشـان اجيـك=دخلت القاعه برجلي ولا أدري ويش (عاقبتـي)
وانا ماجيت اخرّب عرسـك الليلـه ولا أذيّـك=أنا جيتك عشـان اخاطبك..وإسمـع مُخاطبتـي
توصى..وإنتبه..وإحـرص عليهـا والله يهنيـك=ترى كل الكلام اللي طلع مـن ضيقـي وكبتـي
ولكن ماقـدرت إنـي أقولـه وانـت مايخفيـك=اخاف اني إذا قلتـه :تقـوم (وتقطـع رقبتـي)
للشاعر/ محمد الشهري
وسلامتكم