مجالس العجمان الرسمي

العودة   مجالس العجمان الرسمي > ~*¤ô ws ô¤*~المجالس الأدبية~*¤ô ws ô¤*~ > مجلس الشعر النبطي

رد
 
أدوات الموضوع طرق مشاهدة الموضوع
  #1  
قديم 02-06-2010, 08:30 PM
سعد عيد سعد عيد غير متصل
 
تاريخ التسجيل: Aug 2009
المشاركات: 3
معدل تقييم المستوى: 0
سعد عيد is on a distinguished road
004 سعد مخلد يجاري قصيدة الزلامي لبن بديع والشله

قصيده للشاعر / رشيد الزلامي ,.موجها للشاعر / عبدالرحمن بن بديع
واستثار فيها نخبه من كبار شعراء الساحه الخليجيه وهم
( سلطان الهاجري و مانع بن شلحاط و مدغم ابوشيبه و ضيدان بن قضعان و فلاح القرقاح و محمد ابن الذيب)
وقد توالت مسلسل ردود الشعراء المذكوره اسماهم على هذه القصيده وسنلحقها بـ تابع متى ماحصلنا على اي ردود.
.

قصيدة رشيد الزلامي


يابن بديَع وقفت بي على الشاط = الموج عالي والسباحه مخيفه
تعبت ماباقي من الجهد قيراط=دفيتها لين ابركت في النصيفه
في رحلةِ مابين تموز وشباط=عنوانها واضح بصدر الصحيفه
راحت سدى باسباب تفريط وافراط=واستنزفت دم القلوب النظيفه
لوكنت من شيد حضارات الانباط=فوق الجبال الشامخات المنيفه
ولو كنت بالحكمه منافس لسقراط=باح الكلام , وصدرتبي امعيفه
طال الزمان وجرح الايام ماخاط=ينزف وعيا لايوقف نزيفه
فقدت وقفات السدارى هل الغاط=اهل المواقف والنوايا الشريفه
الياطرى لي شخص ابوزيد , تنساط=كبدي ,,وقلبي مايهود رجيفه
وقدام يدخل خاطري ياس واحباط=او يقتحمني سيل وادي حنيفه
افزع وناد الهاجري وابن شلحاط=ومدغم وابن قضعان وايضا ابن ريفه
ولابد لك بمحمد الذيب تحتاط=يكفيك عن عنتر ورمحه وسيفه
انا بذلت الجهد في كل الاوساط=لكن دنيا خاتمتها ضعيفه
ماتصفي الا مع منافق وخراط=ومعوقِ باقي لجده خليفه
رزقه حرام ولايجي غير نقاط=وغير النذاله مالقى له وظيفه
يجعل يلقطهم من القاع لقاط=ومن الغضب تنزل عليهم قذيفه
تضرب جماجم روسهم ضرب مخباط=لين الوليف يقوم يلعن وليفه



رد الشاعر / عبدالرحمن بن بديع

معا بداية شعري وشاربي خاط=من قالي الشعر ، ويش اتعريفه ؟
قلت الزلامي ماخذِ كل الانواط=حسان الأول ، والزلامي وصيفه
صفت له ابيوت الشعر صف ضباط=وتاتي قوافييه على كيف كيفه
لو كان شطر عشرة احروف وانقاط=مثل المخيل اللي غزير قنيفه
سندت للغطغط وحدرت لرهاط=ويانعم بالشاعر ونعمِ بقيفه
اللي لهم في غبة الحرب مقلاط=على الرمك وملاعبات السفيفه
والحين ياللي شعركم غنج واهياط=وين الحرير القرمزي والقطيفه
اليوم صارت ريحته ريحة اشياط=دام اجتمع مشهاب نارِ وليفه
قصيدكم ملى ملفات واشناط=بس الوكاد انه قصيدِ نعيفه
لو تدخلون القدس من باب الاسباط=حياتكم فيها حياةِ كسيفه
واللي نكب لبنان وليد جبلاط=والمشكله حزب السياسة حليفه
يا بو جميل ، العلم من دون فقاط=ما تعرف اهل العزم حاجه كليفه
ابشربنا حنا قويين وانشاط=حتى ولو ان المزاهب خفيفه
ولا نقول ابنسبق الريح ببساط=ولا بنطلق شوف عينِ كفيفه
والآدمي وان عاش حياته انماط=فيها الليال الهينه والعنيفه
اللي ما دامت لهل بابل والاسباط=قد قالها النعمان ابو حنيفه
ومن دون ذي الخلصه ومن ذاتا انواط=الله جعل للناس كعبه شريفه
ذكر نبي الله للساعه اشراط=وفي هالزمن قد بان منها نصيفه
والكل يخشى يالزلامي ، ويحتاط=والله يغفر .. عند نشر الصحيفة




رد الشاعر / محمد ابن الذيب


الجمر حامي غير مافيه ملقاط=لكن ننوشه باليدين ونحيفه
ولكل شوط سابقه ياهل الاشواط=وانا معا رشيد ماني رديفه
لاتجذبك شرد القوافي وتشتاط=وانته رشيد اللي علومك طريفه
كانك على اهل الشعر بتعد الاغلاط=مانته بناعم في الحياه المريفه
من الوطوايط ابيبلشك وطواط=جناحه اطول وجنوبه رهيفه
ويولع البرميل من عود مشخاط=لوكان عيدان المشاخط نحيفه
انعرف ابو واطين وانعرف ابو وااط=وانارة الثاني تراها ضعيفه
مانته مثل موسى لكن حن لك اسباط=وانفوسنا لمناوشاتك عجيفه
وبغداد لازالت اذا جاز الاسقاط=تقول هارون الرشيد الخليفه
والثانيه يالغاط واللي ورى الغاط=رشيد نياته تراها نظيفه
ليتك تشرط يالعتيبي تشراط=وانا لعسرات الامور الكليفه
امن الذهب لو مامتلك غير قيراط=بيني وبينك قسمته بالنصيفه
فرقتي قدر ومحبه ومسفاط=فرق السهل عن الجبال المنيفه
وشعر اللحى ماهو مثل شعرة الباط=الثانيه وسخه والاولى نظيفه
ولاني بحب امغط العلم مغاط=رديتها جزله ولاهي كسيفه
وطرشت لك فكسار ماهو بالاقساط=ومن الطلاق ان النوايا شريفه
ماني بتاجر ادبل الغاط بالغاط=ولا اجمع الدينار وانا حليفه
لكن في امثال العرب قبل الاقباط=قد مات ابورغيف ماكل رغيفه
وانا نمط شعري ماهو مثل الانماط=خذته مراجل ماخذيته وظيفه



رد الشاعر / سلطان الهاجري

شوط الزلامي جر له عدة اشواط=وعرض سماري الجيش حزم وحتيفه
سندبها منا اليا وادي ارهاط=وحدربها تومي عليها السفيفه
واهدت له الدوله من خيار الانواط=وبطله اثليم المسمى مضيفه
وصفت له الدنيا عساكر وضباط=وعين الرضى عن كل عيب كفيفه
يوم العرب كانوا قووين وانشاط=وديارهم في كل عام مريفه
واليوم راحت كنها خيط مطاط=وراعي العسيف ازرى يروض عسيفه
تخبطوا في المهبل تخباط=وصاروا سوا راعي الشداد ورديفه
يابوجميل ارسالتك راس مشخاط=ومظرفه في عود سمره وليفه
ومضمونها بس اربع احروف وانقاط=ياثقل معناها لو انها خفيفه
تنجح لحم وتشعوط الروس شعواط=يعني حريقه والحرايق امخيفه
مخطوطة ِ ماخطها كل خطاط=الا انت ياللي مفرداتك عنيفه
لو ربطت كل الشياطين برباط=ماشالت الانفس اذنوب كليفه
اقلط ولك في مجلس العز مقلاط=واللي مايعرف كيف خله بكيفه
واسلم عدد رحلات تموز واشباط=مالاح براق يشوق رفيفه
ومايسكن الطائف من جعيد وسواط=والي هنا ماعاد عندي ماضيفه



هذا رد الشاعر / مانع بن شلحاط
كلن لقرصه حاش جمره بملقاط=ما ظل لي ما يشعل اعواد ليفه
شاعر ولي منهج ومبدءومقلاط=ونفسي لجمهري خضوعِ وليفه
عايش بخير ولا عليّ نقص واقناط=بسم السعودي وابن زايد خليفه
بين التميمي مجلسي وابن مواط=والشيخ جاسم لا لحقني كليفه
وارتب الساعه بلسعات الاسواط=بعداذن منهم يحتمون السقيفه
اللي تساعدني بتعديل الأغلاط=جزاه من يحسب على الشعر غيفه
صوت الزلامي يوقض الفاهي الغاط=شعفِ يرج اهل القوافي وحيفه
على نمط وترد له كل الأنماط=حيث البروز منين وجه حليفه
يشري بكاش وما يعامل بالاقساط=ساع الفقير يقوم يمضغ رغيفه
ابو جميل اعتاظ من عقب الاقباط=قوم العوالي في الديار المريفه
ربعِ خذوا في نجد صولات واشواط=وجاوا الحجاز وخر بره وسيفه
داواء جروحِ صكها ريحة مشاط=ببيوت شعرِ مبهرات طريفه
أستدغم الشعار من تحت الاباط=والخنجر المسنون بسفل شفيفه
رشيد متحرفن بتزوير الابناط=وعن كم بشته كل عين كفيفه
لو تحدر الشعبان مايحدر اوراط=ايسند الحاله ربيعه وصيفه
اختار له خمسه وجاء عنده اسقاط=في الأحتياطي يوم برك عسيفه
وجاء الاحتياطي خير من ينزل ارهاط=لوِ ان رشيد أهوى عليه برهيفه
يوم انه قال بسادس الربع تحتاط=ما قال عن عنتر بشعره وسيفه
لكنه قال بسادس الربع تحتاط=يكفيك عن عنتير ورمحه وسيفه
جرده من شعره على شاش شمشاط=هروج عود(ن) ما يمد الكسيفه
والسادس اصبح خير من رز قسطاط=وانا مع الخمسه وانا اخو لطيفه

وجه نظر ومجاراه لشاعر رشيد الزلامي وتقبلوا تحياتي



الشاعر / سعد مخلد العازمي
ذيـــب تـنـحـر نـجــد مـــن قــمــة رهــــاط=مـاقـصــه الـقـصــاص يــوحــي هـريـفــه
اليا وطى صم الصخر يضرب اشواط=يــقــدح كــمــى بــــرق يــشــوق رفـيـفــه
مــــن قــــو بــاســه والـسـطــر ولـتـعـبـاط=اومـــالــــه بـقــطــعــان بــــــــدوٍ مــريـــفـــه
امـحـيـطـهــم يـــــــومٍ مـامــنــهــم احـــــــاط=ويـسـجـهـم ســــج الـنـضــا بـالـصـريـفـه
وتناقـلـو علـمـه عـلـى هـاتـف اسـقــاط=وصــجــو ولــجــو والاشـــــاره ضـعـيـفــه
تـخــبــطــو مـــــــع جــــرتــــه والــتــخــبــاط=فــــــرق الــعــقــول الــنــيــره والـخـفـيــفــه
وتـعـلـقـو قــشــرٍ تــبــا الـفــيــن مــمـــراط=لـــووجـــهــــة لـــلاعـــزلــــي مــاتــخــيــفــه
نديبـهـا يـوبـص كـمـى عــود مـخـشـاط=وميقـاعـهـا دون الــهــدف فالنـصـيـفـه
ويـوم ايسـو كلـن عـطـا عــدة امـشـاط=وادنــاهــم الــــي حـطــهــا فـــــي رديــفـــه
وتشتـتـو مــن عـقــب مـاكـانـو اخـــلاط=وبانت حقايق من كمـى الوقـت زيفـه
الـــي يـخـيـط الـجــرح مــاهــوب خــيــاط=وفــزاعــتــه كـــلـــن ســلــوكــه قـضــيــفــه
والــي طـلـع طلـعـة كــرا يـشـقـح الـغــاط=وفـرق الـعـرب فــرق الجـبـال المنيـفـه
ومــن عـقـب مارددتـهـم عــدة اشـــواط=ارتــــح ومـــــد الــرجـــل يــابـــو حـنـيـفــه
رد مع اقتباس
  #2  
قديم 03-06-2010, 01:18 AM
بندر العجمي بندر العجمي غير متصل
 
تاريخ التسجيل: Apr 2006
المشاركات: 2,680
معدل تقييم المستوى: 21
بندر العجمي is on a distinguished road
رد: سعد مخلد يجاري قصيدة الزلامي لبن بديع والشله

سعد عيد




حجززز لقراية القصايد والمعلقات ولي عوده

 

التوقيع

 




يالله ياكريم
 
 
رد مع اقتباس
  #3  
قديم 03-06-2010, 02:16 AM
king الوادي king king الوادي king غير متصل
 
تاريخ التسجيل: Jan 2010
المشاركات: 3,862
معدل تقييم المستوى: 18
king الوادي king is on a distinguished road
رد: سعد مخلد يجاري قصيدة الزلامي لبن بديع والشله

ارحب ياسعد والله ماتجيب الا الزين جعلك تسلم

والله اني احترت بين القصايد اي شي منها ازين من الثاني ولاكن شعار عمالقه لاكلام لانقاش فيهم وصح لسانهم كلهم

والله لايهيهنك

رد مع اقتباس
رد


الذين يشاهدون محتوى الموضوع الآن : 1 ( الأعضاء 0 والزوار 1)
 

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع إلى

المواضيع المتشابهه
الموضوع كاتب الموضوع المنتدى مشاركات آخر مشاركة
قصيدة ابن بديع الشهراني رد على ابن شلحاط العجمي ... يمدح قبائل العجمان حمــد الشهــــراني مجلس قصائد قيلت في قبيلة العجمان ويام كافة 19 09-09-2009 03:34 AM
رسالة من محمد الشمالي إلى محمد أبن الذيب وبران المري مجلس صوتيات ومرئيات الشـعـر 8 05-06-2008 06:09 PM
قصيدة الشاعر / عبدالهادي ال كحله في الشاعر / محمد الشمالي ،، راكان المحفوظي مجلس صوتيات ومرئيات الشـعـر 4 16-12-2007 03:17 AM
مسابقة الشاعر الكبير رشيد الزلامي 50 الف ريال لمن يجاري ابياته محمد الهتلاني مجلس اخبار الشعراء و مسابقات الشعر 9 21-07-2007 10:36 AM

 


الوقت في المنتدى حسب توقيت جرينتش +3 الساعة الآن 05:01 PM .


مجالس العجمان الرسمي

تصميم شركة سبيس زوون للأستضافة و التصميم و حلول الويب و دعم المواقع