السلام عليكم ورحمه الله وبركاته
ماودي أذكر أي مقدمه للقصيده
بخلي القصيده تقدم نفسها لكم وأتمنى إنها تنال إعجابكم
حبر القلم وكتاب أبيض به سطور=نقشت حرفي الزخرفي في سماها.
طولي دروبي في طريق(ن)به جسور=دام الهجوس مرافقي وإبتداها.
خل نضرب القمه ونرجع للبحور=هذي نغازلها وهذي نباها.
نقلط مع النجمه ونسمر مع الحور=أما تقهوينا ونسكن حشاها.
وإلا سبينها في ظلم(ن)مع جور=حتى تقر بسطوتي من أساها.
دام الهجوس مرافقي جيت مجبور=أسعى ورا الفكره وأطلب عطاها.
من طنختي رميت أنا السهم مكسور=لسهيل والقمره وصوب حداها.
نبدا القصيده دون ملعب وجمهور=نعمل بلنتي ثم نضرب جزاها.
عد الليالي وأقظب العلم والشور=اليمنى اللي تقصر إقطع مداها.
لابارك الله في زمان(ن)غدى بور=ياما سقينا وغيرنا هو جناها.
من طالب العليا لاماينزل الدور=يمشي صعيب الدرب يكسر قساها.
وإحذر رفيقي لاتجي درب محذور=دام العفن والسوس خيب رجاها.
بعض القساوس تفتنك دين وطهور=وأحبار في صمت وأدب ماوراها.
بعض الشيوخ تجيك في قول مأثور=أفضل علاج الكي للي بغاها.
الرفقه إللي ساسها منبع النور=ماهمها ليل(ن)تجبر كساها.
والصحبه إللي تنبني كذب(ن)وزور=مسهل تشتتهم لادارت رحاها.
والعذر لأهل العذر منته بمعذور=واجه قساه الريح وإكسرعصاها.
كل شي عند الله في كتاب منظور=إحسب دروبك وإنتبه من خطاها.
لاتقصر الخطوه ولا تمشي مغرور=ترى العرب إتعرف ولاهو يخفاها.
أشباه ناس(ن)تمتلك برج وقصور=ورجال ماتملك ثمنها وبناها.
وأهل القصور تعيش في هم محسور=وأهل القصور تموت محد(ن)بكاها.
إبدأ نهارك رايق البال مسرور=وإبدأ صلاتك وإزهم إللي وراها.
تلقى الحبر وكتاب أبيض به سطور=يملي حياتك حب يسقيك ماها.
27-01-2007, 09:19 AM
العرض العادي
المواضيع المتشابهه
