قصيدة الشاعر جريد بن عوض العنزي قيلت في الشيخ هادي بن غريب ال راكه الوعلة اليامي

[مانع الوعيلي]

السلام عليكم ورحمة الله وبركاته

اخواني الاعزاءاهدي لكم هذي القصيدة من الشاعر جريد بن عوض العنزي في الشيخ هادي بن غريب ال راكه الوعله اليامي

ياسعود لاجالك من الربـع ضيفـان=رحـب وقابلهـم بنفسـا سهيـلـة
وقلط لهم ياسعود عيتا مـن الضـان=واحـذر يطمعـك الثمـن بالهزيلـة
خمة تري الدنيا تقل مشـي عجـلان=يبغـا مباتـة عقـب مانهـا مقيلـة
خمة تـري ياسعـود للعمـر ديـان=نقفـي عـن الدنيـا كثيـر وقليلـة
رحب ويرزقك الولي عالـي الشـان=وباكرام ضيفك لاتستشيـر الحليلـة
ولاترافق الانـذال شينيـن الالـوان=اهل الميوعـة والكعـوب الطويلـة
رافق مثل هادي سلايـل كحيـلان=خلفة غريب عز مـن يلتجـي لـة
خلايف ابـن عميرطويـل الايمـان=اميـر يـام اللـي تزبـن دخيـلـة
غريب ابن عمير علمـة لنـا بـان=شيخا علي الطولـة فعولـة جميلـة
شيخ البوادي لة مقـام ولـة شـان=من صكتـة سـود الليالـي يجيلـة
سجل لة التاريـخ بالمجـد ديـوان=الشيـخ شيـان الحمـول الثقيـلـة
اميـر قومـا بالملازيـم شجعـا ن=صيبان يام اهـل الصخـا والنفيلـة
خفلة وعيل الهاشمي نسـل عدنـان=اليـا تبـرا مـن عميـل عميـلـة
نعما بهم لا قيـل مـرة وعجمـان=تاريخهـم جيـلا يـعـدة لجيـلـة
قبايـلا فيهـم سلاطيـن وعـيـان=عدوهـم بالحـرب يعلـن رحيلـة
واللي جهل يذكر جريس ابن جلبـان=شيـخ الحبيـش مزبنيـن الدخيلـة
وجابر المرضف عز من جاة بلشان=الطيب لة من سـاس جـدة نحيلـة
المري اللي لة علي الطيـب عنـوان=بـن شريـم اللـي فعولـة جزيلـة
والنعم بابن منيف هووبن خرصـان=ربعـا سوالفهـم سمـان وجليـلـة
وابن نصيب الي غشا الجـو دخـان=مواقفـة تبـرا الطـنـا والغليـلـة
والنعـم بابوسـاق ببـلاد نجـران=تتليـة دكـلات الجمـوع المهيلـة
والشيخ ابو صلعا الة المجد برهـان=علـي اللـوزم بالوفـي ينعنيـلـة
ونعما بخالد مع عقيل ابـن عجـران=وضاري الي عـدو رجـال القبيلـة
كلا علي كسب النواميـس شرهـان=من لابتن بالطيـب ماهـي بخيلـة
كم واحد جاهم من الوقـت حيـران=كلا يقـول ابشـر وحملـك نشيلـة
ارجال يام الي علي الطيـب اعـوان=دخيلهـم راعـي الطلـب مايجيلـة
دخيلهـم محشـوم مكـرم ولايهـان=ومن يطلبة طشـوة وسـط الشعيلـة
هرجا موكد ماضيـا فيـة برهـان=كـلا سمـع باسعيـدا مـع عميلـة
ابن السلوم اللي عن الضـد مزبـان=ترفع لة البيضـا بـراس الطويلـة
وحزام ذيب الخيل والشيـخ راكـان=اميـر يــام مرتعـيـن الدبيـلـة
مرتاعهم يشبع بة الذيـب سرحـان=ستيـن رمحـا ركــزا بالنثيـلـة
راكان ابن حثلين كان اللغـي شـان=مدباس ظلما كـان ضـاع الدليلـة
مدباس دهم الخيل فـي كـل ميـدان=الي اعتلوا قـب المهـار الاصيلـة
وعقب فلاح وعقب الشيـخ سلمـان=وسلطان ابن سلمـان يذكـر جميلـة
سطان لة مواقفـا تبـري الاحـزان=لايابعـد راع الضلـوع الهزيـلـة
اميريـام كـان نـو الدهـر شـان=غـدا لهـم مثـل العلـم بالطويلـة
سلطان لة في قمـة المجـدمسكان = شيـخ ابـن حثليـن كـلا دريلـة
مقدام قومـا بـة مشايـخ وفرسـان=يصعب علينـا عـد باقـي القبيلـة
تاريخهم معروف في ماضي الازمان=تشهد لهـم جـرد السنيـن السميلـة
ياسعود لي مع هل الطيب صدقـان=ولاالـردي لاعــل دارة محيـلـة
من الكويت الـي خليجـة ونجـران=هـذي منازلهـم سقتـه المخيـلـة
احبهم حيث ان لـي معهـم اخـوان=مـن عزهـم نحـب ذيـك القبيلـة
قلتة ونا ياسعود من نسـل ويـلان=اهل الفعول اللـي اخطاهـم طويلـة
عنازمن خيبر الـي حـدود عمـان=وماحـدة البحريـن لحـدود نيـلـة
ماهـي مهونـة للقبايـل وخـذلان=كلا علـي ماقيـل صاعـة مكيلـة
وصلواعدد ماغـرد الطيـر بلحـان=علي الرسول اللي مشـا بالفضيلـة

الشاعر جريد بن عوض العنزي




اخووووكم

مانع الوعيلي

[ابونايف الوعيلي]

لاهنت يامانع الوعيلي

ويعطيك العافية على النقل

وصح لســان العنزي

ويستاهل ابن غريب رحمـه الله



مع تحيــات اخووووك



ابونايف الوعيلي

[علي ابوشوارب]

نقل طيب ولاقيلت الافي رجل يستاهل اللة يرحمة واموات المسلمين

[مانع الوعيلي]

لاهنتم على الردود ويعطيكم العافية
اخوكم
مانع الوعيلي

[ابن عويره]

الاهنت يامانع الوعليي وال غريب بن عمير معروفين وراوس عرب

[مانع الوعيلي]

لاهنت يابن عويرة على المرور ويعطيك العافيه

[هادي بن فهاد]

الله الله



صح السانك يا مانع الوعيلي
وصح لســان العنزي


ويعطيك العافية على النقل القصيده الطيبه





ويستاهل ابن غريب رحمـه الله

[بندر العجمي]

مانع الوعيلي


صح الله لسان جريد العنزي ويستاهل الامدااااااااااااااح بن راكه والله لايشينك

[مانع الوعيلي]

هادي
بندر العجمي
لاهنتوا على المرور ويعطيكم الف عااااااااافيه

[ابن طفله]

صح لسان الشاعر ويعطيك العافيه
تقبل مروري