::. كحّل عيونك معاي .::

[غـشـام]

وأنا أسوقـ الخُطى في دربي ..
ابغىىى أسجل تواجدي ببيت شعري .. ( أحتفظ فيه لنفسي )

وأثناء شروعي في كتابته .. لقيت نفسي أتمتم مع نفسي بقصيدة .. رائعه ..
فـ آثرت أن أقدمها لكم .. ولو أن الكثير منكم قد سبق وأن ( كحّل ) عيناه بقراآآئتها ..
أو أرتقى بمسامعه من خلال الإستماع لها ..
الأكيد / عاجبتني وبس

<--- عاجز يكتب مقدمات

تقبلوها كما هي ...

البارحه جتني بها احلام نايم = حلم ٍ بعد ماطار ذقت الندايم
كني معاها شابكين الايادي = نطرب على رنة هديل الحمايم
في روضةٍ فيها الخزاما تثنى = ريحه تنفه مقفيات النسايم
اشكي عليها ماجرالي من الهوى = واسرار خفاقٍ على الود صايم
وتضحك على شكواي وتقول هوّد = وشفيك تشكي ماضيات قدايم
مثل الذي صيده يشوفه بعينه = وينقله بآثارٍ عفتها السمايم
قلت اعذريني هالني ماجرالي = فالخود سمّوا مهلكات العزايم
والحب اهله بدة الناس اسرى = تشوفهم مابين طايح وقايم
قامت تبسم لي وتشبح نظرها = بعيون قرناسٍ من الجوع حايم
قالت علامك ياالمشقى حزيني = الوقت ماهو للمواليف دايم
واقفت تجاذب في يديها يميني = وتعوج لي عنق العنود المحايم
واقفيت معها طايعٍ مستحبي = امشي على خطوة قدمها وهايم
وبنا على روضٍ بهرنا جماله = مصحي لطارف واوسط الروض نايم
فاستدرجت واستقبلت نسمة الصبا = ورزت نهودٍ في نحرها زمايم
وزفت جدايلها من الوجه للقفا = كما ذيل شقراً للعزاوي تهايم
قالت تفكر في جمال الطبيعه = وتشر بيدها للشعاب الغتايم
شعبان قاع ٍ علها رايح الحيا = سيل ٍ جرى خلا القضوف اتلايم
تسعين ليل وبارقه يقلب النظر = وحس الرعود المدويات الرزايم
وقد ريحها يعتاك في مهمه الفضا = عطر الطبيعه صانعته الوسايم
مصخي ٍ به المعبود من باب رحمته = ربي عليهم بخافيات الكتايم
قلت اعذريني يامهاة الجزيرة = الزين ماهو للجبال الصمايم
في القاع والاشجار واصناف ذا البشر = وفي الجو وبحور اللجج والبهايم
من كلهم خذتي جماله وروعته = وضفتيه للحسن اللطيف المشايم
ماشفت جنسك في حياتي ودنيتي = ايضا ولا به من وصوفك علايم
فانتي الجمال بساحة الكون والحلا = ولغير زولك الحلا ما يلايم
طالعتها لا البرق يلمع بثغرها = من مبسم ٍ تزهاه ذيك الوشايم
تشرق ملامح وجهها بفرحة اللقا = ولاعودها يرتز بشم ٍ مخايم
مدت يديها لي وقالت جبا لك = احضن مود ٍ لك ياراعي الغنايم
صدقت ما صدقت انها تقولها = وعروق قلبي من هواها صرايم
مديت ايدي عادني باحتضنها = فزيت لاني في حلا النوم نايم

للمرحـوم / محمّد العبدالله المرّي ..

[الغروب]

الاخ/ غشـــام

اهـــلا بتواجــدك الشعري ...واحسنت الاختيــــــــار الذي به ارتقت وراقت للأسمــــــاع

رحم الله شاعرها ...ويســــــلم ناقلها

شكري وتقديري

[غـشـام]

شكراً لتواجدك
لأن الجمال يكمن بتواجـدك
لاخلا ولاعدم
هنا
من تمـ تم بالقصيده في حينها

[مسعطر]

المشاركة الأصلية كتبت بواسطة غـشـام

قلت اعذريني يامهاة الجزيرة = الزين ماهو للجبال الصمايم
في القاع والاشجار واصناف ذا البشر = وفي الجو وبحور اللجج والبهايم
من كلهم خذتي جماله و روعته = و ضفتيه للحسن اللطيف المشايم
ماشفت جنسك في حياتي ودنيتي = ايضا ولا به من وصوفك علايم
فانتي الجمال بساحة الكون والحلا = ولغير زولك الحلا ما يلايم
طالعتها لا البرق يلمع بثغرها = من مبسم ٍ تزهاه ذيك الوشايم
تشرق ملامح وجهها بفرحة اللقا = ولاعودها يرتز بشم ٍ مخايم
مدت يديها لي وقالت جبا لك = احضن مود ٍ لك ياراعي الغنايم
صدقت ما صدقت انها تقولها = وعروق قلبي من هواها صرايم
مديت ايدي عادني باحتضنها = فزيت لاني في حلا النوم نايم

ليت الحلم طوّل



صح لسااانه و الله يرحمه و يغفر له ,,,,



غشّام


نشفق لـ كتاباتك يا مبدع




صح لسانك و قلبك يا ذووويق



تقبل مروري ,,
أستودعك الله ,,

[محمد الغيثاني]

ارحب ياغشــــــــــــــــــــــــــــــــام تحف لابو عبدالله الله يغفر له

لاهنت

[الفرس]

على قولة مسعطر ليت الحلم طوّل ... زين بعض الاحلام ..


تحفه نادره ..

غشام لاعدمنا جياتك ..


تسلم يمينك ..

[غـشـام]

الغالي / مسعطـر ..
مرحـباً بك .. وبتواجـدك ..
ولاخلا ولاعدم

[غـشـام]

الغالي / محمّد ..
هلا بك يا غالي ..
شاكر لك تواجـدك
ولاخلا ولاعدم

[غـشـام]

الفرس ...
تسلمين يا غاليه
حـيّاك الرحمن ..
ولا عدمت جيّاتك ..
شكراً لهذا التواجـد

[حـــوران]

الله الله الله

عزالله ان به قصيــده , الله يرحم إبن الأسود عزالله انه مبدع

,., غشـام ,.,

الشهـاده في ذوقك يقطر دمها , مبدع في أفكارك وذوقك

دمت كما تحب ونحب

احترامي ياغالي