قصيدة الشاعر صالح بن سالم آل مانعه (( حنا لها امها بها .. ولا بقطع ارقابها ))

[مسفر مبارك]

حضرت وعيون الرجال حراب وعيوني حراب=ووقفت من بين النشامى وقفة(ن) يدرى بها
اقدر وجية(ن) تقدرني واحسب لها حساب=واصد عن بعض الوجيه ولا حسبت حسابها
جات البدايه هكذا .. يا اما خطا ولا صواب=لكنها فكره عسى ربي يجملنا بها
حمستها فـ الراس حمس البن يوم الكيف طاب=من طيب نكهتها طمع في شربها صبابها
وفوحتها بين المحاني لين فيها البن ذاب=وقندتها من فكري اللي ما يطيب الا بها
يوم استوت قدمتها لوجيه سمحين الجناب=ما كنها الا دلة(ن) تبري خوى شرابها
صحيح شاب الوصف لكن من يقول القاف شاب=الا على روس الطوال النايفات ارقى بها
شاعر واحقر الهينه ويشوش راسي للصعاب=مانيب حيا الله ليا شاف الصعاب يهابها
اغرف بحر واقطف زهر وانحت على صم الهضاب=مثايل(ن) تبطي وهي عند العرب يحكى بها
السبع كانه لا عدى ماله على الشدات ناب=تعشته شهب السباع اللي تحد انيابها
واللي مايلقى من يمينه لا طعام ولا شراب=تصبر على جور الليالي لحيته واشنابها
واللي معه قلب(ن) شجاع وعزم ذيب وعين داب=وبين الجبال الموحشه دربه وبين هضابها
ومنين ما هب الهوى لقاه لخشوم الركاب=من سطوته ماهو يخليها تعوج رقابها
ولا يكل ولا يمل ولا يضيق ولا يهاب=ويعقب اللي ما يقول النار من شبابها
ان كان ما جاه السعد يسبق مراويح السحاب=قولت كفو في حق مثله ما يطول غيابها
وانا احتزمت بمحزمي واخذت سيفي والزهاب=وشقرا(ن) عليها البندق اللي بين(ن) مضرابها
من دار ابو مشعل سديد الراي حلال الصعاب=حليت في دار الرجال اللي تعز اصحابها
واخذت من غيري كتاب وشفت مضمون الكتاب=ماهو كتاب الا وصاة(ن) ما طلعت الا بها
من ثقلها يمكن يبين الشيب في راس الشباب=مافيه واحد من عيال العود ما وصى بها
اتباع من دون الوطن والملك الانفس والرقاب=مافي خساره روحة الارواح دون ترابها
والجادل اللي لبسها ندر الجواهر والثياب=موضوعها اكبر من جواهرها ودق خضابها
تلد لي كنها تقول ادخل عليك من الذهاب=تراك يامي ستر من تبغى الستر بثيابها
قد غارت القعبان تبغيها وعداها عقاب=حول عليها يوم شامت لأجله وقفى بها
خذها ببيت وحكمه ومعنى ووزن ورفع اداب=لو ما معه قوه وعزم ومعرفه ما جابها
وانا حضرت وحضرتي ماهي سوى هي والغياب=حضور من يجني فوايد طرقته واتعابها
وان كان في الدعوه بيارق فاللوازم ما نهاب=حنا لها امها بها .. ولا بقطع ارقابها

[راشد العتل]

صح لسان صالح
وتسلم مسفر عالقصيده

[غـشـام]

الله يوفقه
وبيّض الله وجهك
هناا
غشّام

[شيخة الغلا]

قصيده فيها جمالـ الحرفـ وجمالـ المفرده والمعنى

للإبداع رونق خاص في متصفحك


اختيار قمه

وقصيده ذوووق


والاجمل ذوقك فوق هذا كله

ابدعت وامتعت

ولاخلا ولاعدم

تحيتي لك

[عبدالله بن شيبان]

صح لسان صالح ال مانعه

والله يوفقه انشالله

لاهنت على القصيدة

[الشيخه]

حنا لها امها بها .. ولا بقطع ارقابها



صح اللسان شاعرها وعسى فاله البيرق


مسفر لاهنت على النقل الرائع


تقبل منى خالص التحيه

الشيـــــخـــــــــه

[مسعطر]

تلد لي كنها تقول ادخل عليك من الذهاب=تراك يامي ستر من تبغى الستر بثيابها

الله الله .. كفووووووووو

صح لسان ابن مانعه و فاله البيرق ..

و صح نقلك يا ابو مبارك ..

تقبل مروري ..

[فـارس]

مسفر مبارك

لا هنت على نقل القصيده للشاعر الرائع ابن مانعه

والله يعطيك العافيه وفي انتظار جديدك

و دمت بود

[مسفر مبارك]

هلا ومرحبا بك يبو محمـد أسعدني مرورك يا غالي لا هنت

[راكان بن فيصل الحثلين]

كفو كفو ؟؟

صح الله لسانه ولاهنت يامسفر ؟؟.؟؟

بالتوفيق وعقبال ماانشوفه رافع البيرق ؟؟

لاهنت