بدون حل ..... جديد وحصري للعجمان

[الرحال2006]

بسم الله الرحمن الرحيم

تحية ود بعد طول غياب مبرر لي اتقدم اليكم بما اتمنى ان يرقى لمستوى ذائقتكم


واقول

بين البشر وش قيمة الرجل يا حسين=لو ضاعت اسلومه ونعم افتقدها
حتى العمود اللي يقوّم به الدين=خلاّه ما ركعه لربه سجدها
غاوي وله شلّه تقوده وغاوين=يارب تقطعها وتقطع تلدها
لاهم على كسب المراجل حريصين=ولا فيهم الصادر ولا اللي وردها
المرجله في صوب وهم عنّها وين=لا هم حواليها ولا في وعدها
فرق الثريا من ثرى القاع والطين=ما بينها واللي سلومه وأدها
لا تحسب ان ذولا مع الناس حيّين=الحي من تبقى علومه بعدها
الرجل وش هو ؟ غير بعض العناوين=اسلوم ..واخلاقه ..ودينه سندها
يا شين هذا الحال واشين من الشين=لا شافته عيني تزايد قهدها
اقولها والناس تفهم ودارين=لكن وين اللي عزومه حشدها
الخيّر اللي قال خله بعدين=والمشكله تبقى ولو طال امدها
مثل الذي يبغا قضا الدين بالدين=لاحلّ مشكلته وثبّت عمدها
قارنت وضع اول مع الوضع ذلحين=وشفت بعض احوال امرّ وادها
شفت القرايب صار ما بينها البين=كذب ونفاق وزاد فيهم فسدها
وين الرجال اهل العقول الحكيمين=اللي ليا كبرت تحلحل عقدها
واللي ليا جات المهمه سديدين=وان طالت القاله يبيّن جهدها
ما اقول غير الله رب المصلّين=يرجع نفوسن غاويات لرشدها
اللي سبق يا حسين مشروح حالين=والثالثه بين الجحيم ورغدها
لها ثمان اعوام نشأه وتكوين=ما عين غير الله بعينه رصدها
وميلادها في عام سبعه وعشرين=الروح دبّت في نواحي جسدها
لكن وقبل العمر ماتم حولين=جاها البلا من عين زايد حسدها
يارب يا والي على كل والين=انت العوض للي حقوقه فقدها
والبارحه حلو الكرى فارق العين=وامسيت اخيل بروق مسمع رعدها
يالله عساه بدار سيد المزايين=تنشي مخاييله ويصدق بردها
دارن بها غالي ومن ناس غالين=يطرب بها قلبي وعيني سعدها
وعلى النبي المرسول رحمه وتلقين=صلاه ما تحصى لمحصي عددها

وسلامتكم ,,,
للـ :- الرحـــــــــــال