قصيدة أبن هدلان الاولى في شاعر العرب

[حمود الحمالي]

السلام عليكم ورحمة الله وبركاته

برق .. وهبوب .. وذكريات قديمـات=وغـلا مداهيـل سقاهـا الغمـامـي
هزت شجون القلب واخـذت سجـات=وابعدت عن زخم المـدن والزحامـي
في خايع لا رحت له بعـض الاوقـات=كني علـى الدنيـا محصـل مرامـي
لـو المـرام اللـي تمنيـت بالـذات=اقفـت بـه الايـام مثـل الحلامـي
وامضيت لي في تختخ البيد ساعـات=من الضحـا حتـى ولـوج الظلامـي
ما اشوف به حي ولا اسمع به اصوات=الا هوى الغربـي ونـوح الحمامـي
اتبع هجوس البال من حيث ما جـات=وفـي شفهـا ذبيـت روس العدامـي
ومن عالي شفـت القفـار المريفـات=تشدى نقوش معورجـات الوشامـي
وهديـت فكـر ضـاري بالجزيـلات=وستل جناحـه واعتـلا ثـم حامـي
وساعة لمح بالجو للجـول حومـات=صطى على شـرد القوافـي شمامـي
وصاد البيـوت الساميـات الفريـدات=النـادرات اللـي عليهـا الكـلامـي
صيد يجمـل مـن يـروم الجمـالات=ويشبع مذاق اهل العقـول الفهامـي
هـدو يقـدم للوجـيـه السفـيـرات=مـع بالـغ التقديـر والاحتـرامـي
وللقـول فعـل وللمواجيـب حـزات=لادقـت الساعـه وشـد الحـزامـي
الطايلـه لـو دونهـا العمـر فـوات=آرد عليهـا مـثـل ورد الحيـامـي
ورثٍ ورثته مـن شيـوخ البطـولات=الشامخيـن المقدمـيـن الكـرامـي
شاعر ولي في حومة العـز وقفـات=والله يعـديـنـي دروب الـمـلامـي
والشعر وهبه مـن بديـع السمـوات=وله قيمةٍ يسمـو بهـا كـل سامـي
والعرف رحلـه لاكتسـاب المهـارات=ومـن التجـارب يستفيـد العصامـي
والرجل رامـي والمكاسيـب شـارات=ولا يصيـب الطيّبـه كــل رامــي
ولا كل من طـب البحـور الغزيـرات=يجيـب در دونـه المـوج طـامـي
ولا كل من يسرج ظهـور الاصيـلات=يثنـي ليـا منـه غشاهـا عسامـي
ولا كل من شال السيـوف الرهيفـات=يروي شباة السيف والكـون حامـي
ولو كل طير لـه كفـوفٍ شطيـرات=محدٍ فـرق بيـن القطـا والقطامـي
ولـو التمنـي يـدرك المستحيـلات=ا روت ضحاضيح الخلا كـل ضامـي
الله جعـل بيـن الرجـال اختلافـات=وصارت مقاييـس القـدر والمقامـي
واكبر دليـل ان السنيـن العسيـرات=يظهر بهـا بيـن الاسامـي اسامـي
امثال ابـن هـادي زبـون الونيـات=وشالح وذيـب مخضبيـن الحسامـي
وعقاب بن سعدون ستـر العفيفـات=وراكان بـن حثليـن زيـزوم يامـي
من وقعهم تشبـع سبـاع مجيعـات=اليا حصل بيـن الجمـوع التحامـي
ماهيـب تمثيـل وبطولـة روايـات=ودور درامي فـي مسلسـل درامـي
واليوم ياعصـر الرخـا والسلامـات=نشت قنوف الخيـر شـرق وشامـي
وقامت تزبـر كنهـا خشـم ابانـات=وهلت مطرها عقـب عـج وقتامـي
ومنها ارجعت شهب الديار المحيـلات=وصارت تزاهـى بالنفـل والخزامـي
وزانت مراتيـع الفيـاض العشيبـات=ورعى بها اللي ما يعـرف الجهامـي
فيها الجمل يمشي على غير مشهـات=وش عاد لو يبنـي عليـه السنامـي
اليـا بـرك مـا يحتمـل للثقيـلات=واليا وقـف مالـه شـداد ومسامـي
تمسي به وتصبح كبـار الطموحـات=ويزمي على شوفه من البعـد زامـي
وبينه وبين اللي زمى لـه مسافـات=يشيب منهـا اللـي بحـل الفطامـي
ماله ياكود الصبر لـو جـاه ميـلات=وعزالله انـه لـو شكـا مـا يلامـي
وهذا سبيل الوقت من ماضـي فـات=لا زان عـام ماصفـا كـل عـامـي
ولو الظروف تقـدر اهـل المـروات=مابه عزيـز مـن زمانـه مضامـي

وسلامتكم

الشاعر الاديب الاريب

خليل ابن ذيب ابن هدلان

تقبلوا تحيات

أخوووووووووكم

حمود الحمالي