ما قبل الوداع!

[عـسـاه خـيـر]

بسم الله الرحمن الرحيم الجمال حتى وان كان في الشعر, لايحتاج له مقدمات فهو كفيل نفسه!

دقيقه قبل آقول إن الوداع يغيّر الآحوال = ويسقط دمعة الرجال من قلبه ومن عينه
تعالي وإسمعي صوت السكوت وصمتي اللي قال = بأنّه يرفض التوديع والتلويع ويدينه
هدوئي لا يغرك يختفي في عالمه زلزال = وزلزاله يخفي بين طياته براكينه
أنا اللي مالعب في مبتدأ عمره مع الأطفال = ولا حس الحنان ولا شعربه في شرايينه
لإنه طفل لكنّه يعيش بداخله رجال = طموحه غير لو إن الطموح يموت في حينه
وبعد مازاد عمره صار له بين الرجال إجلال = كسب بالفعل حسن الصيت وإزدادوا محبينه
ودخلتي في حياته وإبتدأ فالرحله الرحال = وطار الطير في صدره ورفّت لك جناحينه
وطفولته القديمه جالها في داخله موال = ومارس شيطنة لعبه وغنت لك شياطينه
لعب معك أبجديات الغرام وعلّق الآمال = وعرف معنى الحنان اللي جهل معنى عناوينه
وصار أكبر طفل لو كان مايحسب من الجهال = طموحه تشتبك مثل الصغار .. يديك ويدينه
يشاكس ويتشبث ويتدلل .. والدلال أشكال = ويفرح كل ما زاد المواصل بينك وبينه
براءة كلمته تكشف لك اللي يختفي فالبال = ولا قال لك "أحبك" لين حسّ إنّك تحبينه
على يدينك تعلّم كيف ينحت للغلا تمثال = وكيف يغني الإحساس من شعره .. وتلحينه
رسمك وصارت اللوحه من وصوف الحلا تختال = وحبّت ريشة الرسام .. لعيونك تلاوينه
هذا ماقلت وإن قلتي بقاءك والغرام محال = اقول "بحزن " جعل الخير تفتح لك ميادينه
عسى الله يسعد أيامك وساعاتك على أيّة حال = وعسى الله يلهم القلب الحزين الصبر ويعينه
ولكن / قبل هم البين ياقف بي على الآطلال = دخيلك حبنا اللي كان لا تكفين تنسينه!

لـ / ناصر تراحيب