الربيع وهدة الفرخ القطامي = والحباري والأرانب في دحلها
والفشق طابور في مقدم حزامي = والدلال الصفر والنوق وفحلها
كلهن معهن حضوري وانعدامي = بالزمن ما غيرهن عيني كحلها
ومن فعل يمناي لي قدر ومقامي = والدروب أدْرك سهلها من وحلها
ما تـِسَمْوىمن ورى كبار الأسامي = هيبة التزييّف طبعي ما انتحلها
وانت ياللي لا حلال ولا حرامي = الحساني منك لك ذنب ٍ محلها
تجهل إن الطق فكاك اللحامي = وما ينوش الكبد يلحق في طحلها
واعتبرتك رمية(ن) من غير رامي = رحلة(ن) ما تاه فيها من رحلها
وامتساوي بالبدايه والختامي = حال ما تسمن وحال(ن) ما نحلها
وان تحالف مري وعجمي ويامي = الخليه ما دخلها إلا نحلها