}.,وقفة حسـآب

[أختكـ يآصبي]

صبحهم بلخير يـآلله,.

مصأفحه أولى ولأهيب جديده ابد ,.قدلهآ حول السنتين أو أدون .,




ياليل باقي لي معك وقفة حساب
تشهد عليها ماضيات الليالي
ويشهد عليها ماكتمته من أسباب
بنت ٍالياضاق الزمن ماتبالي
كم لي وانا ياوقت بالظهر انصاب
ماقد شكيت وقلت ياماجرالي
وياكم طبت لناسٍ اقراب واحباب
قدرتهم قدر رفيع وعالي
ماكان بيني وبينهم حايل حجاب
صفَيت نياتي لْمنهو صفالي
من وين مااوجه ينادوني اصحاب
ماكان ظني بين صحبي ثعالي
اقسم قسم مايوم احدن الياغاب
منهم نسيته اوقطعت اتصالي
ولعيون ربعي ترخص ارواح وارقاب
ولوكان مايبغون صعب المنالي
شاب الشعر والدمع ياأميمه انساب
من عقب صدمه خلفتها الليالي
عيبي الوفا والجود سايد وغلاب
حتى ظلالي ملكهم!!وش بقالي؟
نذرٍعلي ماعادها لحية أصحاب
وهاذي فعايلهم يامال الزوالي
اللي لمن اقبلت فزو بترحاب
يامرحبا بك يالغزال المفالي
واليا المحوني مقفيه كلن اغتاب
شالوا وحطوبي من اردى الخصالي
انا اشهد ان الظن في طيبهم خاب
ولااشري مخوتهم بربع الريالي
بي جرح منهم ماتعالجه الأطباب
حتى ولو هبت رياح الشمالي
بسج عن جرحي على راس مرقاب
وانسى رديين الأصل والفعالي
ماني ضعيفه غير شيخه ولاأهاب
مو بس شيخه غير كالنجم عالي
حسبي عليهم عند فكاك الأنشاب
كفيلهم وحده ولاعاد أبالي
وياوقت انا صفيت وياك الحساب
وباقي وصيه لليالي الخوالي
اذا غشى جسمي وغطاه الـ أتراب
لملم بقايا الذكريات لعيالي



وسلامتكمـ {.،

*سبق ونُشرت هذه القصيدة بنّك (شيخة القوم) المعرف الأول لي ,.^_^

[((الغنج))]

صح الله لسانش وعلا شانش
لاهنتي يا عريبت الجدود
تحيااااااتي

[العـــسر]

صح لسانك


ولا هنت على هذا النص الجميل



تقبل مروري

[هادي بن فهاد]

صح لسانك


ولا هنت على هذا النص الجميل



تقبل مروري

[" مــــابه جديــــد "]

مشالله طلعت شاعر يابو الشباب
صح لسانك على ذالقصيده الرايعه

ولااهنتي ياشيخه

[M!Ss LeGeNd]

بسج عن جرحي على راس مرقاب
وانسى رديين الأصل والفعالي

ماني ضعيفه غير شيخه ولاأهاب
مو بس شيخه غير كالنجم عالي
ياسلااااام
ماشاءالله ابيات حلوة
صح لسانج اختي الكريمة
وتسلمين ع القصيدة الطيبة لاهنتٍ
ننتظر جديدج
يعطيج العافيه

[من طناخة راس]

اووووووووووووووه


وش ذا القصيده الجزله

ووش ذا الابداااع

عز الله انش شي اقشر


لاهنتي

[أختكـ يآصبي]

المشاركة الأصلية كتبت بواسطة ((الغنج))

صح الله لسانش وعلا شانش
لاهنتي يا عريبت الجدود
تحيااااااتي

هلآ ومرحبـآ .,أختي /الغنج

صح بدنش ,.

مآعليش زود

تسلمين يآلطيبه .,

الف شكر للمرور العطر ,.

[أختكـ يآصبي]

المشاركة الأصلية كتبت بواسطة العـــسر

صح لسانك


ولا هنت على هذا النص الجميل



تقبل مروري

هلآ ومرحبآ ,.أخوي /العسر
صح بدنك ,’

تسلم والله

بس كل هالزول والطول و(تقبل مروري)

يآمال الغناه المتصفح لأحدى العنآصر الأنثويه بالمجتمع


شآكره لمرورك الطيب ,.

[الفهد الهاجري]

اذا غشى جسمي وغطاه الـ أتراب
لملم بقايا الذكريات لعيالي

جعله ذا الراس يبطي حي

الله الله الله الله
اختك ياصبي
قمه في الجزاله الشعريه
ومعني ثمينه
كفو كفو كفو
ياسنافيه
صح الله لسانس
ولا تبخلين علينا
سجلي اعجابي في قصيدتس العذبه

تقبلي مروري