من الارشيف : الامير الشاعر محمد أحمد السديري

[أبن الشدقاء]

الامير الشاعر محمد الاحمد السديري
وهو غني عن التعريف لما له من شهرة واسعة ومكانة كبيرة
وشاعرية فذة فهو اديب كبير ساهم في خدمة الادب الشعبي ورقيه وتألقه,
شاعرنا هو محمد بن احمد بن محمد بن تركي بن سليمان السديري - رحمه الله تعالى -
ولد عام 1340ه تقريبا في مدينة ليلى بالافلاج حيث كان والده اميرا عليها
ثم انتقل مع والده الى الغاط ونشأ وترعرع هناك في كنف والده
ودرس الابتدائية على يد الشيخ عبدالمحسن المنيع شغف في بداية
حياته بركوب الخيل وكان معروفا بسرعة العدو الجري حتى قيل:
انه كان يلحق الصعاب من الابل ويمسك بها مارس هوايته المحببة
ركوب الخيل والهجن كما انه كان مولعا بالقنص واقتناء الطيور النادرة,,
في السابعة عشرة من عمره اختاره الملك عبدالعزيز - رحمهما الله -
اميرا على الجوف سنة 1357ه واثبت وجوده ودرايته وكان مما قام به
تصفية قطاع الطرق والخارجين على الدولة على الحدود الشمالية
والشمالية الشرقية ثم انتقل الى منطقة جيزان عام 1363ه
وتولى امارتها ومكث هناك، وعندما ثارت المشاكل
على الحدود السعودية اليمنية بعد الاطاحة بالامام يحيى بن احمد
سيطر معاليه على الحدود بحنكة ودهاء
وعين عام 68ه قائد للفدائيين السعوديين في فلسطين
ثم اختاره الملك عبدالعزيز محافظا لخطوط الانابيب
وقرر رحمه الله ان يتخذ مدينة عرعر مركزا للمحافظة
وكانت حينذاك صحراء قاحلة وخوله الملك عبدالعزيز
للتصرف بالاراضي فأسس ثلاث مدن رئيسية
هي عرعر والقيصومة وطريف وساعد ذلك على توطين القبائل
حتى اصبحت مدن مليئة بالحركة والنشاط والتقدم,
بعد وفاة الملك عبدالعزيز نقل الى جيزان مرة ثانية
ثم اعتزل المناصب الا انه عاد وتولى قيادة الجيش
بالمنطقة الجنوبية ومكث ثماني سنوات حتى انتهت حرب اليمن
وعاد وقضى بقية حياته متنقلا بين الطائف ومزرعته الخفيات شمال بريدة
على طريق حائل حتى داهمته ازمة قلبية حادة لازم الفراش لمدة شهر
حتى توفي عام 1398ه بالرياض ودفن بالخفيات في شمال القصيم - رحمه الله -
وأسكنه فسيح جناته وقد رثاه عدد كبير من الشعراء بقصائد تدمي القلوب,
اما شعره فهو يعد من ابرز الشعراء وأرفعهم منزلة
وله مكانة في قلوب عشاق الشعر ومحبيه
اما قصيدته التي لاقت شهرة واسعة وصدى طيبا
والتي تغنى بها اخيرا فنان العرب محمد عبده
وأداها بلحن جميل واثبت ان الشعر الشعبي
متى ما وجد من يخدمه بالشكل اللائق فانه ينجح نجاحا باهرا
وان له عشاقه ومتذوقوه الذين يطربون له ويفهمونه ويتفاعلون معه
* يقول من عــــدا *
يقـول مـن عـدا علـى راس عالـي............... رجـم طويـل يدهلـه كـل قـرنـاس
فـي راس مرجـوم عسيـر المنـالـي............... تلعب بـه الاريـاح مـع كـل نسنـاس
في مهمـة قفـر مـن النـاس خالـيي............... شتاق له من حـس بالقلـب هوجـاس
قعـدت فـي راسـه وحـيـد لحـالـي............... بـراس الطويـل ملابقـه تقـل حـراس
متذكـر فـي مرقـبـي وش غـدالـي............... وصفقـت بالكفيـن يـاس علـى يـاس
اخــذت اعــد ايامـهـا والليـالـي............... دنيـا تقلـب مـا عرفنـا لهـا قيـاس
كـم فرقـت مـا بيـن غالـي وغالـي............... لوشفت منهـا ربـح ترجـع للافـلاس
يقطعـك دنيـا مـا لهـا اول وتـالـي............... لو اضحكـت للغبـن تقـرع بالاجـراس
المستريـح اللـي مـن العقـل خالـي............... مـا هـو بلجـات الهواجيـس عطـاس
ماهـوب مثلـي مشكـلاتـه جـلالـي............... ازريـت اسجلهـن بحبـر وقـرطـاس
حملـي ثقيـل وشايـلـة باحتمـالـي............... واصبر على مر الليالي والليالي والاتعاس
وارسـي كمـا ترسـي رواس الجبالـي............... ولا يشتكـي ضلـع عليـه القـدم داس
يابجـاد شـب الـنـار وادن الـدلالـي............... واحمس لنا يابجـاد مـا يقعـد الـراس
ودقـه بنـجـر ياظـريـف العيـالـي ............... يجذب لنا ربـع علـى اكـوار جـلاس
وزلـه الـى منـه رقـد كـل سـالـي............... وخلـه يفـوح وقنـن الهيـل بقيـاس
وصبـه ومــده ياكـريـم السبـالـي............... يبعد همومـي يـوم اشمـه بالانفـاس
فنجـال يغـدي مـا تـصـور ببـالـي............... وروابع تضرب بها اخمـاس واسـداس
لاخـاب ظـنـي بالرفـيـق المـوالـي............... مالـي مشاريـه علـى نايـد الـنـاس
لعـل قصـر مــا يجيـلـه ظـلالـي ............... ينهـد مـن عـال مبانيـه للـسـاس
لاصـار مـا هـو مدهـل للرجـالـي............... وملجا لمن هو يشكي الضيـم والبـاس
بحسنـاك يامنشـي حقـوق الخيـالـي............... ياخالـق اجنـاس ويامغنـي اجـنـاس
تجعـل مقـره دارس العـهـد بـالـي ............... صحصـاح دوِّ دارس مـابـه اونــاس
البـوم فـي تالـي هـدامـه يـلالـي............... جـزاك ياقصـر الخنـا وكـر الادنـاس
مـتـى تـربـع دارنــا والمغـالـي............... وتخضر فياض عقب مـا هيـب يبـاس
نشـوف فيهـا الديـدحـان متـوالـي............... مثل الرعاف بخصـر مدقـوق الالعـاس
ونثيـر علـى البيـدا سـوات الزوالـي ............... يشرق حماره شرقـة الصبـغ بالكـاس
وتكبـر دفـوف معبسـات الشمـارلـي............... ويبني عليهن الشحـم مثـل الاطعـاس
****
وله ابيات تظهر لنا حكمته وعقله وسعة علمه واطلاعه وايمانه بالله عز وجل
فيقول عن المعجزات الثلاث
لولا الهرم والفقر والثالث الموت ............... يالا دمي بالكـون ياعظـم شانـك
سخرت ذرات الهوى تنقل الصوت............... وخليتها اطوع من تحـرك بنانـك
جماد تكلمها وهي وسـط تابـوت............... تاخذ وتعطي ماصدر مـن بيانـك
وعزمت من فوق القمر تبني بيوت............... من يقهرك لو هو طويـل زمانـك
لولا الثلاث وشان من قدر القوت............... نفذت كـل اللـي يقولـه لسانـك
****
قصائد الأمير الشاعر : محمد بن أحمد السديري " يرحمه الله " تسجل فيض مشاعره وإحساسه
بالجمال في الحياة من حوله ، المرأة ، الطبيعه والفضاء بزرقته وغيومه وتجليات الفصول على
صفحته الرائعة وتمثل الجانب الآخر من حياة الفارس الأمير الذي لم تستطع هموم المسئولية وأعباء
القيادة أن تحول بينه وبين خفقات القلب وخلجات الوجدان ، فهو رجل آتاه الله صلابة الفارس ورقة
الشاعر ، وموهبة التعبير عما يحسه ويراه بأدواته وقاموس مفرداته الشعبيه .
إبداع الأمير محمد السديري في قصائده ومدى غوصه في ثنايا النفس ونظرته الثاقبه إلى الأمور .
* يا روح روحـــــي *
يا مبعدِ عني خيالـــــــك قريبــي
بالحلم زولك حاضــرِ ما يغابـــي
يا روح روحي منك شقيت جيبي
عليك صحت ونحت من حر مابي
يا صاحبي صار العنا من نصيبي
وهلّت دموع العين والراس شابي
من لوعتي من حسرتي يا حبيبي
من دمعتي من عبرتي من صوابي
عالج فؤادي يا هــواي وطبيبـــي
يا غايتي يا سلوتي يا عذابــــــــي
إن غيبت عنـــي كل شي يغيبــــي
وأن كان شفتك فاز قلبي وطابـي
با الله شفني من غرامك صويبــي
كني عضيض الغلـــث ممـا جرابي
أونست من فرقاك حــرّ اللهيبـــي
وناديـت يالمملوح من ما صطابي
ناديت لكن مالصوتي مجيبـــــي
وعضّيت راس إبهام كفي بنابي
** ** ** **
* روحـــي من أسابـــه *
العين رفــرف جفنهــا من عنـــاهــا
والقلــب جضّ وماج والرجل ساجت
والصدر ضاق وعبرتـه ما قواهــــا
والوجــد زاد ودمعت العيـن هاجـت
على الذي زوّد بكبدي ظمـــاهـــــا
اللي لــه النفــس العزيـــزة تلاجت
ما أنساه دام الريح يذري هواهـــا
حيّ جروحــه بالمعاليــق لاجــــت
روحي من أسبابــه تدانت خطاها
ولا لغيره وطيــة الرجــل داجـــت
عليه عينــي نثّـــرت كل ماهـــــا
وروحي وروحه بالموده تناجت
ابعد وحـالي جور حبه براهــــا
وأوجست أنا دنياي ياعمير ماجت
تغطلست ما عاد أميز سماهـــا
وكثر الهموم لخالق القلب فاجت
** ** ** **
* قالـــوا تنــــوح *
قالوا تنوح وقلت قبلي نمـــر نــــاح
قالوا علامك قلت بالقلــــب لاحــــي
قالوا ترى نوحك يسبب للإجـــــراح
قلت إعذروني مغلق الســــر باحــي
بلاي من سيد المها ظبـــــي الإبراح
عني بعيــد ويمـــه القلـــب شاحـــي
والدمع من عيني على الخد سفــــّاح
امشّ دمعي كل ما أقبــــل وساحــي
عن جيت أكف الدمع من ناظري فاح
من مشــةٍ بين النواظـــــر مــلاحــي
على الذي له في حشا الرّوح مسراح
حبّه صبغ ما عاد يمحــــاه ماحـــــي
غيره بعيني حلم ليــــــلٍ به أشبــــاح
وزولـــه بعيني سلوتي وانشراحـــي
يومِ اشوفـــــه فيه يــــومٍ به أفـــراح
وإن غاب من فقده تضيق المشـاحي
وللقصيده بقيه ...........
** ** ** **
* نـــور خـــدّك *
كل مـــــا جــريـــت ونـات الحشــــا
زادت الونـــات في قلبــي جــــروح
من هــوى اللي ما على الدنيـا مشـا
مثــل زولـــه لا ومنجــي فلك نــوح
يوم شفته فـــاز قلبــــــي وإنتشــــا
وابدلت روحـــي بعد شوفه بــروح
قـــال طامـع قــلت لا لا لا حشــــــا
بس أبي من فاك يالغالي صبــــوح
نـور خـــــدك مثــل براق نشــــــا
ضـاح لي نور وجهـك نور ضوح
يا حبيبــي لا تطــاوع من وشــــا
من حكــي بفراقنـــا قلّـــه يروح
** ** ** **
* يا زين أنا أحبك *
يا زين أنا أحبك و لا فيه منقــود
ولا لي على فرقاك صبر وجلاده
أنا لك المملوك قدني معك قـود
وارحم مشقّـا القلب يلحق مراده
ويا زين خذ مني مواثيق وعهود
منساك لين العمــر يكمل حصـاده
محدٍ يلوم اللي من الحـب ملهـود
فقده لمن يهــواه غبن وزهــاده
يالايمي قلبي رعى قلبك الـــدود
وعسـاك بالدنيــا تشوف القراده
إن كان عقلي شارد الذهن مفقود
تراه في جيد الجدايه قـــــــلاده
في عنق ملهوف الحشى ناعم العود
يزيد مع زايــد سنينــــــه وداده
الحب عند الناس له سلم وحدود
وحبٍ مثل حبي عظيم حهـــاده
والحــب قبلي ما سلا عنه داوود
أذنب وواصل بالغرام إجتهـاده
** ** ** **
* لا واعشـــــــري *
ونيـــت يوم الناس تضحك وتطـرب
وسهرت يوم الناس نومـا هجوعـي
على الــــــذي حبّـــه لقلبـي تشــرب
فـي ضـــامري صكّــت عليه الضوعي
عنّي بعيــد ودونــه الشـــوف ســرّب
وأنا على فرقـــاه قلبـي جــزوعـــــي
لا واعشــــــري كل ما قلــــت قـــرّب
قفّـــت نجومـــه عن حــراوي نجومي
هواجســــي يمّــه خفـــاف وهـــــرّب
وذكراه للقلـــب المعـــــذّب متوعـــي
في وليتــه يا زين مــا راقب الــــرّب
وأنا تجــرع من فراقـــه دموعــــي
يا زين عني مغزل العيــــــن غــرّب
ومن الفيــافي بيننــا مـــا يـروعــي
يا زبن يابو عمير يا ابـــن المعــرّب
أثـر الهــوى يا زبن جرحه يروعي
ان جيـت عن بحـر الغــرام أتهـرّب
يطـرى على بالـي حسين الطبوعـي
أنخــاك ياللي بالمراجــل مجـــــرّب
يا فزعتي وان كان قلـــت فزوعــي
** ** ** **
* لولاه ما روّضـــــت *
لولا الرجاء واعلل القلب بوعود
بوعود خلٍ صار شوفه شفاقه
لولاه ما عوّدت نفسي على الكود
ومن بد خلق الله عشقته عشاقه
اختار قلبي بالهوى ناعم العود
ما غيره أحدٍ بالمخاليق شاقه
طفلٍ عليه من البها ستر وعقود
زين القوام أشباه وجهه دقاقه
ان كان شفته فتح القلب بورود
وان غاب دايم دمعتي من فراقه
طفلٍ سحرها هاروت بشفاه منضود
اللي نهب مكنون قلبي سراقه
ما دام هو ماجود فالحب ماجود
وسط الضماير مبهمات حلاقه
يا ناس أنا احبه ولا فيه منقود
وقلبي لغيره ما يعرف الصداقه
يا ناس حبّي له بلا سلم وحدود
وفراق روحي من سبايب فراقه
** ** ** **
* وإن باعوا الشيمــه *
ان صار زود المال بيديــــن الأنـــــــذال
حنا من المعـــــروف تنـــدا يدينــــــا
وإن كان هم شرهوا على طيب الافعال
حنـــــا وردنـــا جماهـــا وارتوينــــا
وإن فكروا للجود يمشــــون رحــــال
حنا قبــــل يمشون يمه خطينــــــا
ياما لبسنا للشــــرف كـــــل سربال
وعلى البسيطه للفضيلـه مشينـــا
في دوحة العليا لنا مجد وظــــلال
وحنا على درب المكــارم غذينـــا
لو نجمع اللي فات منا من المــال
إن كان شيدنـــا القصــور وبنينا
نعطي ولا نتبع عطانا بالأقـــوال
نعطـي ونسكت كننا ماعطينـــــا
وان باعوا الشيمه بدينار وريـال
حنا دخلنا سوقهــا وشترينــــــا
نطلع لها لوهي رووس الأقذال
لوهو عسير دربهـــا مانثنينــا
بافعالنا نرســم دروب للأجيــال
اليا نساها غيرنــــــا ما نسينـــا
نسود سادات تسجل للاشبــــال
فضايــل شمنــا لهـا واهتدينـــا
بيض نسجلهن جديدات واسمال
حفايــــــظ لحفادنـــا اللاحقينـــــا
نصبر على الشدات لو شيلنا مال
ولو سال دم كتوفنـــا ماشكينـــا
نخاف يلقى سدنــــا كل ختـــــال
ويبني هزيلات المعاني علينـــــا
الليل يا خالد على والـدك طــــال
وهنيت نـــاس بالكــرى نايمينــــا
ياعز راسي شفت ماخبــث البــال
شي يهــــــول وشي بالجاهليــنا
الناس بالأيـــام راحـــل ونــــزال
تفجعهم الدنيــا وهم دالهينـــــا
وحياة رب نزل أيــــــات الانفال
عالــــــــم خفيـا نيــة الحاقدينــــا
ما اترك طريق العدل في كل الأحوال
لو يرحــــل المريـــخ للفرقدينـــــا
** ** ** **
وهذه مقتطفـــــات من قصائده : ـ
* حي جرح قلبي *
جرح الهوى يا عمير ما حـــدٍ يداويه
غيـــــر الذي دمّــاه مالــه مـــــداوي
يا عمير أنا جرحي من العام شاكيــه
با قصي الضمير بثومت القلب هاوي
حيٍ جرح قلبي ونجـــض مكاويــــه
قل له بحق الحـب يا عمير يـــاوي
قل له يعف ولا يعـــذب مصـافيــــه
أن كان قلبـــه مثل قلبي شفـــــاوي
** **
* أنا من نجــد *
أنا من نجد يكفينــــي هــــواهـــــا
ويبري لوعتــــــــي شربــي لماها
وشوفي من نبيــــه ومن نــــــوده
غـــزال تابعٍ قلبـــي هــواهـــــــــا
غـــزالٍ ضيعت عقلي وروحـــــي
رمـــت قلبي وقلبـــي ما رمـــاهــا
لها بالـــروح وفــؤادي مـــــوده
ولا شـــي من أحوالــــي خفـاهــا
تعرف إني لها مملوك طايــــــــع
إبيع الــــروح في دورة رضــاها
** **
* يا معذبي بالحـــب *
قلّــت خطـــا كــأنك تمشيــت برضـاي
وأخطيــت كـــأنك ما مشيــــت بهوايه
يا نــور عيني وأنت صبحي وظلماي
يا فرحتي يا سلوتــي يا ضحـايـــــه
يا معذبي بالحب يا قـــــدوة إهداي
يا روح روحـــي يا رجــأي وعمـايه
يا اللي لي أغلا من قرايـــب دناياي
ياللي ودادك ســــاكن في حشــايه
** **
* قلبي نهبتـــه *
يا قاتلـــــي من غيـــر ذنـب جنيتــه
الله يبيحــك لو توطيّــت بدمـــــــاي
والله لمشــــــي لك على ما بغيتــــــه
يللي من أجـل إرضاك ترخص مناياي
لو أنـت تطلبنـــي فــؤادي عطيتــــه
بلا ثمن يا مـــورد الخــد برضــأي
شرفك عن عيب ينوشه حميتــــــه
وذنبــك بقتلـي والرضـــا منك مداي
** **
أتمنى أن أن تنال هذه الوقفـــــة إستحسانكم ..
مع كل الحـــــب

[بطاح]

الله لا يهينك يا ابن الشدقاء وصح السان الامير الشاعر محمد الاحمد السديري وعز الله اني ادور قصائدة لي فترة وجبتها يالذيب ,,

[عـسـاه خـيـر]

لاهنت وصح السانك ولسانه يا ابن الشدقاء وشكرا لك على النقل والاختيار الرائع .

[شايش العجمي]

الله يرحم السديري عز الله شاعر و قصايده كلها جميلة و قوية...

لا هنت أخي ابن الشدقاء على النبذة و القصايد اللي نقلتها..

إختيار موفق تقبل مروري و تحياتي..

أخيك : شايش العجمي..

[أبن الشدقاء]

أرحبوا بطاح ، عساه خير ، شايش العجمي

وشكرا على مرروكم ومشكورين على الثقة .