عامر ابن نوطان في الشيخ فيصل ابن شريم

[مسعطر]

الشاعر عامر ابن حمد ابن نوطان في الشيخ فيصل ابن شريم :

اليوم بلعب و المثل تو ما زان=و السد جاني ما كشف خافياته
يا الله يا اللي كل يوم ولك شان=علام ما بالكون من كايناته
إنك تمهل في ليالي كحيلان=يا اللي لك المخلوق يحسن صلاته
ابن شريم اللي له المجد عنوان=عون الضعيف اللي تهل أعبراته
يزبن بوجهه كان وجه الدهر شان=عنده ليالي العسر كنها غناته
مشهور في كسب الجمايل و الإحسان=و عن كل عيب مثبتين براته
يا اللي تعرفون المثايل و الألحان=غنوا بفيصل و أشهروا طيباته
عز الله إني بمدحه سر و إعلان=النادر اللي ما تعد إحسناته
ما هوب في ماله شحيح و منان=جزل عطاه و عارف موجباته
ما كل شيخان القبايل بشيخان=الشيخ فيصل طول الله حياته
ما أذم خلق الله ولا أقول رديان=لا شك فيصل من يسوي سواته
كل يمد يديه و الجو ميدان=و من قدم الجودات يظهر أصياته
شيخ على خيه عمام و جدان=و كل الصفات الطيبة من صفاته
ما هوب خاطي واحد تو ما بان=يبغي يشيخ و شيخته وين جاته
إذا تردى الساس ما شال بنيان=و مبنى بلا ساس قليل ثباته
و مدحك بمن يستاهل المدح برهان=و مدح الردي ما ترتفع شايعاته