لاتحتس يازايد ترى ماني بزعلان=ولايزعلك ماصار في شاطي الراحه

[رشيدالهديرس]

قصيده قويه للشاعر المبدع فالح بن محمد بن قشعم الهاجري
بعد خروجه من مسابقه شاعر المليون

لاتحتس يازايد ترى ماني بزعلان=ولايزعلك ماصار في شاطي الراحه
مدام الروابع طيّبه والحصان احصان=ليا من تعثر شال عمره من الطاحه
نسفنا العلوم اخلاف ماكن شيٍ كان=وقدنا الركايب واخلت العد وامراحه
تقدمت والموقف يبي مثلي بليهان=ليا كبرت القاله مايومي بمسباحه
لو ان الفشق توّي وخلفي وانا النيشان=نطحت الجموع وغلقة الصدر منساحه
شموخي وانا فالح ولد مكرم الضيفان=علي والله انه اغلى من البنك وارباحه
ماضريت نفسي للمهونه ولا الحقران=اعزومي عصاميّه ولي نفس جمّاحه
ماجينا نمسّح جوخ وانراضي الشيخان=مطاليق واعزوم المطاليق شوّاحه
ولايشغل العقّال ماقالو الخبلان=تسير القوافل والنوابيح نبّاحه
يكفيني ان عقلي من الثقل شانه شان=ماني بهلوانٍ يوذي الخلق بصياحه
مدام ان ماء وجهي حميته ونجمي بان=فلاهمني قفلٍ مايدري بمفتاحه
تشوم الحرار وتكسر الحوم فالجنحان=ولا عاد يغريها الملوّح بملواحه
عزيزين لو مانملك اللول والمرجان=الانظار عليا والطواريق صدّاحه
اغوص البحر واجيب من غالية الأثمان=الأفكار غبّه والهواجيس سبّاحه
اصب المثل صب الذهب واحكم الاوزان=واداري عليها من قلم ناقد الساحه
ولاهو بحقٍ تحجب النور ياغسّان=عشان العلاقه بيننا شبه فوّاحه
نقدت القصيده نقد ماهو على برهان=ومديت لي كفٍ من البغض مجتاحه
على شانني غنيت في قبلة الأوطان=وكشفت الحقايق بين مزحه ورزاحه
صحيح ان عين البغض ماتعرف الصفطان=وعين الرضا تغني من الاش واشفاحه
يانفدا القروم اللي لهم موقفٍ بطران=مساء ليلةٍ فيها الموازين رجّاحه
اهل وقفةٍ يطلق بها الخاطر العمسان=تزاحم عزاويهم والافعال سفّاحه
تقول ان فيهم من سريع الحمايا جان=على الشات يدوي فعلهم دوي قدّاحه
مواريث قومٍ فاللقا تنطح الفرسان=مقابيس حربٍ تلطم الشره برماحه
بني هاجرٍ لاضاق صدر الحليم وشان=لاعاجت على دق المقاهير طيّاحه
يروون حدٍ يفصل الروس من الامتان=الين العدو يبطي وهو ينقل اجراحه
رواسي عبيده والنسب روس من قحطان=ماحن لحقةٍ تكتب وتمسح بمسّاحه
وعسى الله يبيض وجه من مدوّ الايمان=ولاقصرو وابروق الاجواد لوّاحه
من احلافنا واصحابنا والكريم امعان=لهم ترفع البيضا على هضبة الباحه
لكن جعلها خيره فما اختاره الرحمن=تطيب الجروح وعرضة ابليس منزاحه
معا خالص التقدير والشكر والعرفان=ياهل فزعةٍ يشهد لها شاطي الراحه

[شيخة الغلا]

ولايشغـل العقّـال ماقالـو الخـبـلان ..... تسيـر القوافـل والنوابـيـح نبّـاحـه
يكفيني ان عقلي من الثقـل شانـه شـان .... ماني بهلـوانٍ يـوذي الخلـق بصياحـه

ااالله ااالله

عزى الله إنه صدق القرم .. وبيض الله وجهه

قصييييدته رهييييبه وصح لسانه.. وأشهد إنه شاعر ومبدع

لاهنت أخوي رشيد عالنقل

تقبل مروري

[مهرة النسيان]

والنعم بـ فالح بن قشعم وباللابه اللي هو منها ..

وخروجه من شاعر المليون لا يقلل من قدره وجماهيرته في اعين عشاق الشعر ..

تقديري لك اخوي ..

[جابر الخواطر]

يكفيني ان عقلي من الثقـل شانـه شـان
ماني بهلـوانٍ يـوذي الخلـق بصياحـه
مدام ان ماء وجهي حميته ونجمـي بـان
فلاهمنـي قفـلٍ مـايـدري بمفتـاحـه
تشوم الحرار وتكسر الحـوم فالجنحـان
ولا عـاد يغريهـا الملـوّح بملـواحـه
عزيزين لو مانملـك اللـول والمرجـان
الانظـار عليـا والطواريـق صـدّاحـه
اغوص البحر واجيب من غالية الأثمـان
الأفكـار غبّـه والهواجيـس سبّـاحـه
اصب المثل صب الذهب واحكم الاوزان
واداري عليها مـن قلـم ناقـد الساحـه

صح الله لسان فالح وعزالله انه مثل لابته خير تمثيل

ومجمل ويكفي انه كسب قلوب الملايين..

ونعم ببني هاجر وقحطان وكل القبائل..

ولاهنت يارشيد،

[الشيخه]

رشيد


لاهنت على ماطرحت وابو محمد اكبر من ذا البرنامج


الذيب ذيب


شاعر وجزل ومتمكن من ابياته الهاجرى


تقبل منى خالص التحيه


الشيــــــــــــــــخه

[مسعطر]

صح لساااااانك يا ابن قشعم ,,

و انت شاعر من دون برامج و خرابيط ,,


رشيد الهديرس ,, إخترت فأبدعت ,,

و أتحفتنا بما دوّنت هنا ,,

تقبل مروري ,,