(((( عمتــــــي انســـــــــاك .... ده كــــــــــلام ))))

[سواح]

عمتــــــــي

حوار مع عمتي تم قبل سنوات ..
تذكرته ولا أدري لماذا تذكرته الأن ...!!!
ألغيت معظم كلاماتي ... لتستمتعوا بكلماتها

حيا الله وليدي ... حيا الله الغالي ولد الغالي
شلونك و شلون أمك واخوانك ...........!!!!!!!!!

هذاك اليوم جابتلي جارتنا أم خالد صور حفلة عرس ولدها
وشفت صورك شكثرها فيها وانت تضحك وتسولف ويا ربعك
عن شئ ما اعرفه
بس شملحك وشحلاتك طالع بهالصور ويازينك ويا زين ضحكتك فيها

كبرت والله يا وليدي .. كبرت والله يا ولد أخوي الغالي الله يرحمه أنشاء الله
مسرع ما كبرت
سبحانه اللي مد بعمري وخلاني أشوفك و انت رجال
واظنتي ما راح ياخذ أمانته أقريب
مليت ياوليدي من هالدنيا
أبوك مات .. وعماتك ماتوا ... وآنا الكبيره .... قاعده
يا الله حسن الخاتمه
منت متزوج انت ..!!؟ اٍلى متى يا وليدي ..!!؟؟
يا وليدي تزوج .. قعدتك هالشكل عزوبي ما تنفع
وجيب لك عيال ... صج انهم ما ينفعون بهالزمن الأغبر
بس على الأقل شي من ريحتك بهالدنيا
حبيبي انت والله يا وليدي
سبحان الله لشفتك كني أشوف أبوك الله يرحمه قدامي
حنون .. وتنحب ... على كثر مشاغلك ما نسيت عمتك العجوز
مو مثل اللي نسو اٍني ليلحين ... عايشه
وانت كل ما تجيني تجيب وياك شي ..!!
اشجايب لي اليوم ....!!؟؟
رهش وحلوى ....!!!!؟؟؟؟
ويييي ... يابعد عمري يا وليدي .... تدري اٍني أحبه
بس مانعينه عني على ابو السكر .... وآنا روحي فيه
قوم صك الباب لا أحد يشوفنا ...... خن ناكل آنا و انت
ومثل ما قلت ... ما فيه اٍلا العافيه
ويييه يا وليدي ما شفت عمتك على شبابها
انت ما شفتني اٍلا و آنا عجوز
آلحين تعرفط وجهي ... يا الله حسن الخاتمه
يا وليدي ... لا تخلي البيزات والفلوس همك وأنا عمتك
ترى ما تسوى دوسة ارجولك
والله يهديك لبنية الحلال اٍللي تعرف قدرك
ويرزقك منها الذريه الصالحه
واٍذا جاك ولد .. سمه على المرحوم أبوك
واٍذا بنيه خل أمها تسميها على امها
بعد اميمتها تعبت فيها و لها حق بعد
وهالله هالله في بنت الحلال والناس الأجاويد يا وليدي
الله ورسوله وصاكم بالقوارير
لا تهاوشها على أدنات الدون وسمعها الكلمه الحلوه
ترى الحريم قلوبهم صغيره ... مسرع ما ينقص عليهم
والله يا وليدي هالدنيا ما تسوى
وما لها طعم بدون الناس الي نحبهم
بناتي .. ماتوا على حياتي
هم ماتوا وآنا ليلحين قاعده .. سبحانه اللهم لا اعتراض
بس يا شين الدنيا و انت تشوف عييلك يروحون على عينك
يازينك يا وليدي يومك اصغير و يا زين شطانتك
من بد كل الجهال .. انت غير سويت كل شي كل بلوى اكبر من الثانيه
شاق القاع وقايل انباع
بس طول عمرك حقاني حتى لو على نفسك ... وحنون بعد

أخليج الحين .. عمتي

وين بتروح يا و ليدي .. خلك اقعد وياي ....!!!!؟؟؟؟

والله يا عمتي بمر واحد من الربع مواعده يبيني بشغله
وبعدين بروح الجمعيه .. أمي موصيتني على أغراض تبيهم

اٍييي ... سلم على أمك يا وليدي ... و هالله هالله فيها

تامرين على شي ... عمتي ...!!!؟؟؟

لا يا وليدي .. حافظك الله ... ناطرتك .... لا تنساني مثل غيرك

أنساك ده كلام .. أنساك يا سلام .. أهو ده اللي مش ممكن أبدآ
ولا أفكر فيه أبدآ ... أبدآ
آنا ما أقدر أنساك يا جميل

هيهيهي ... حسبي الله على اٍبليسك

ويوم الأثنين الجاي آنا عندج اٍنشاء الله .. بس زهبي القهوه
وآنا أجيب الرهش والحلوى بعد

وصار يوم الأثنين .. ورحت شريت الرهش والحلوى
ورحت لعمتي ... واٍلا القهوه زاهبه
و هي نايمه يمها ولكنها كانت
النـــــــومه الأخيــــــــره

و

طـــــــــــاب يـــــــــــــومكم