السلام عليكم ورحمة الله
وبعد
اخواني في هذا المنتدي الطيب اود ان اذكر قصيده قلتها في صديق عزيز علي نفسي. ومناسبه هذه القصيده ان خوي سوي لي حاجه عن طريق اخوه والحاجه هذه مو كل واحد يقدر يسويها ومو لاي واحد وبصراحه حبيت انني اشكره في الابيات المتواضعه وارجوا من الله انها تنال اعجابكم وتشرفني عند خوي
من هاجسٍ يختار من جزل الأشعار
ينقى جزيلات البيوت الفرايد
يشفق على الدرة وهي وسط الابحار
تزين فــي معنــاه كل القصايد
ما خانه التعبـير في نظم الأفكار
لا من كتبها ما غدى له شرايـد
بنات فكـره فـي معانيـه وأبكـار
من بدع راسه بالبيوت الجدايـد
سلام يا حراً ومن ماكر أحـرار
يا الصاحب الوافي وسيع البنايد
سلامٍ أوفى من وفى الجار للجار
واصدق من الفزعة ليوم الشدايد
سـلام يا خـالد عدد ما الهــوى دار
و عداد ما بالخير معـروف زايد
يا الصاحب اللي لو قسى الوقت مابار
الطيـب عاده والوفـاء له عوايد
له وقفـــةٍ تكسيــه هيبـة ومقــــدار
وتنشر له البيضاء وبالطيب زايد
والله يا بـوراكان لو قلـت تكــرار
ماوفيك حقك و أنت بالطيب سايد
أنت الأخو لصار بالوقت ما صار
وقفتـك تشـهد لك وموقفك رايـد
أشكرك واشكرمن ورث طيب الأخيار
أبو الجمايــل سيــد الطيــب قايد
أخوك طيبـــه قبل أعرفه له أذكار
سمعتــه وصلتني و بالطيب كايد
انتم هل الوقفــة بعيدين الأنظــار
اشهـد ولو مانتم بحاجــة شهايد
لكن للعرفــان و الشكر مشـــوار
وقلنا نهنيكم عسى العيــد عايد
و ترى معرفتكم لنا عز واصرار
تشرى معرفة صـادقين العقايد
ما ينقص التقدير قنطـار قنطـار
و الفايده تلقــى مع أهل الفوايد
واقبل تحياتي وشوقي بالاشعــار
اعداد ماتقرى حروف الجــرايد
ودمتم
31-01-2006, 03:31 PM
العرض العادي
المواضيع المتشابهه
