(((ضمة غلاااا)))

[ابراهيم آل ربوع]

بسم الله الرحمن الرحيم




اخواني واخواتي







السلام عليكم ورحمة الله وبركاته


قصيده متواضعه ..




اتمنى ان تروق الى ذائقتكم

البارحه .. يالله عسى ترفق لما بين الضلوع=البارحه .. يالله دخيلك من ظنون ٍ غاويه
البارحه .. يالله بامان الصبح ماقبل الطلوع=البارحه .. حالي كما حال الذياب العاويه
ذبيت انا رجم الفرايد والشرايد نوع نوع=واستدرجت قلبي سهوم المهتوي والهاويه
يوم التفـّت ودقـّت اجراس اللقااا من عقب جوع=استرجفت ضيق الصدر باجراس شوقٍ داويه
لبيه ياللي عثرّتك خطاك في يوم الربوع= لبيه .. ياللي عثرّك شوق النجوم الضاويه
ليه امتنعت وغرتك دنياك تبطي بالرجوع ؟؟=ولااّا السفر،، يامن عشقت رضاه ناره كاويه ؟؟
عزالله ان قلبي جزوع وطاري الفرقا يلوع=إلا دروبك.. لو تهقيني الدروب الهاويه
بامشي على ضو القمر مادمت في حبك طموع=لجل الكفوف اللي دفت ..تبطي وهي متخاويه
كنت احسبك تبطي علي وتقيس غيبتك الشروع=كنت احسبك .. كنت احسبك ..مدري بنفس ٍ ناويه
يامحجر الدمعه كفااا .. لا تنتحر فيك الدموع=كف العباير واسترح .. نفس الشقاوي خاويه
والله لو انها بالفراق امداه يهناني الهجوع=لكن عشقتك واصبحت بك دنيتي متساويه
امسى غرامك باسفل الخفاق ياحلو الطبوع=واصبح مابين اقصى عروق ٍ بالغلا متداويه
واستغفر الله منك .. حتى ماسليتك بالركوع=يجتاحني طيفك .. وانا قلبي عزومه قاويه
الحقتني في غيبتك لوم الخلايق والجموع=ماغير اداري حيرتي( من زاويه لى زاويه)
الله حسيبك يازمن .. يقطعك ياوقتٍ قطوع=ابعدتني مااسعدتني .. بام الخدود الراويه
هذا وانا اللي تنحني له هامة القيفان طوع= حارت معاك أسمى حروف ٍ للمشاعر حاويه
وهذا وانا من يمتلك نفسه ولايقبل خضوع=وهذا وانا اللي شايل ٍ حمل السنين الطاويه
لكن على قول المثل (ماضاع كنزٍ للقنوع)=وانا صبرتك وآتحدى كل كف ٍ لاويه
وان قالها الله تلتقي عينك وعين (ابن الربوع)= من بعدها تذكر معي (ضمة غلا) بالزاويه

وســــــــــــــــلامتكم ...


ابراهيم آل ربوع