محاوره شعرية بيني وبين الشاعر الكبير صاحب السمو الأمير/خالد بن سعود الكبير آل سعود

[مسفر بن حويل آل رشيد]

محاوره شعرية بيني وبين الشاعر الكبير صاحب السمو الأمير/خالد بن سعود الكبير وصاحب السمو معروف على مستوى العالم العربي ومحاورتي مع أبوسعود ليست أبراز موهبه أو تحدي ولكن للأستفاده من شاعرية صاحب السمو حفظه الله

مسفر بن حمـد آل رشيـد

سلام ياهل العرف والعـز والجـود=ياهل الوفا واهل السيوف الصقيلـه
بعض العرب ياطيب الذكـر مقـرود=يطمـع لحاجـه والمعرفـه قليلـه

الأمير/خالد بن سعود الكبير

يامرحبـا ترحـيـب ودٍ لـمـودود=رحب الشرف والمرجله والفضيلـه
ترحيـب محمـودٍ تلاقـى بمحمـود=من بينهم تحـلا العلـوم الجزيلـه

مسفر بن حمـد آل رشيـد

أبك البقـا ولكـل رجـال مجهـود=يالشاعـر اللـي ترتكـي لثقيـلـه
واللي يعزف العود يبقى على العـود=وانـا اتمشـى كـل يـومٍ وليـلـه

الأمير/خالد بن سعود الكبير

الحمـد لله كلهـا سهـود ومهـود=والنـاس كـلٍ لـه قبيـلٍ يشيلـه
الله خلق بيـضٍ وداولهـن بسـود=وكلٍ علـى مـا قيـل قلبـه دليلـه

مسفر بن حمـد آل رشيـد

اقـول كـلٍ لـه معاييـر وحـدود=بس الزمن جا فيـه عدلـه وميلـه
ابو سعودٍ ماهـو بحـول مسعـود=منـه تعلمنـا البيـوت الأصيـلـه

الأمير/خالد بن سعود الكبير

صدقت مسعودٍ ما هو بحول ابوسعود=انشـد خبيـر يعلمـك كـل حيلـه
ترى الذكي ما هيب دايم له سعـود=حتى الزعيم اللي غزى لـه دليلـه

مسفر بن حمـد آل رشيـد

احدٍ نهر واحـدٍ بحـر دايـم يـزود=واحدٍ عظامـه فللقـا مـا تشيلـه
لا يرجع اللي يبغي الصيد مصيـود=وتقصر حباله بعـد كانـت طويلـه

الأمير/خالد بن سعود الكبير

حتى البحر في بعض الاحيان محدود=والنهـر عـذب ومثمـراتٍ نخيلـه
والظبي كم جندل له نمـور وفهـود=لو هو ضعيف سهوم عينـه مهيلـه

مسفر بن حمـد آل رشيـد

كلٍ على ما قيل مـن جـوده يجـود=والزرع شفنا ويش ناتـج حصيلـه
طويق ثابت ما تحـرك مـن النـود=واللي يشوفـه مـن بعيـدٍ يجيلـه

الأمير/خالد بن سعود الكبير

عين الرضى عميا ولو شافت العـود=شافـت زهـور ناعمـات جميـلـه
وعين السخط لو شافت الظل ممدود=شافـت فنـودٍ ظاميـاتٍ هزيـلـه

مسفر بن حمـد آل رشيـد

ما قول قول مالـه أثبـات وشهـود=ولا كل هرج عنـدي أخلـي سبيلـه
هذا التواضع منـك ياميـر معهـود=عاداتكـم يأهـل الوفـا والجميلـه

الأمير/خالد بن سعود الكبير

طبع الكرم في يام يا صاح مشهـود=ولا هو غريب ان قلت نعم القبيلـه
وانا احمد الله خالـقٍ كـل موجـود=اللي وصل حبـل القلـوب النبيلـه

[الملكة]

عين الرضى عميا ولو شافت العود---شافـت زهـور ناعمـات جميلـه
******
ما قول قول ماله أثبات وشهود---ولا كل هرج عندي أخلي سبيله
*******
صح لسانك..مسفر بن حمد ال رشيد...والنعم في ..ابن سعود الكبير..

[ابومحمد الشامري]

طبع الكرم في يام يا صاح مشهود
ولا هو غريب ان قلت نعم القبيله
وانا احمد الله خالقٍ كل موجـود
اللي وصل حبل القلـوب النبيلـه

صح لسان الأمير/خالد بن سعود الكبير ولسان الشاعر المبدع مسفر بن حمد ال رشيد لا هنت يا السنافي ولا تحرمنا جديدكز

[مهرة النسيان]

طبع الكرم في يام يا صاح مشهود=ولا هو غريب ان قلت نعم القبيله

رديه رائعه جدا بينك وبين الامير ابن سعود الكبير ..

دمت على تواصل معنا يابوحمد ..

[مسعطر]

صح لسانك و لسان صاحب السمو الأمير خالد ابن
سعود و شكراً على نقلك لها .

طبع الكرم في يام يا صاح مشهود=ولا هو غريب ان قلت نعم القبيلة

شهادة من الأمير خالد نفتخر فيها

[الفرس]

قمه فالروعه ومن احلى المحاورات واذربها


تقبل اعجابي الكبير اخوي مسفر

[فيصل السليماني]

صح لسانك يا مسفر شاعر جزل ومحاورة كبار مع الامير خالد بن سعود الكبير

[سعود الخويطري]

الشاعر المبدع / مسفر حمد ال رشيد



صح الله لسانك ولسان الامير : خالد بن سعود الكبير





محاورة قمة وشعراء كبار وبيض الله وجهك




وتقبلوا سلامي واشواقي

[بندر العجمي]

صح لسانك يا مسفر شاعر جزل ومحاورة كبار مع الامير خالد بن سعود الكبير

[مسفر بن حويل آل رشيد]

المشاركة الأصلية كتبت بواسطة الملكة

عين الرضى عميا ولو شافت العود---شافـت زهـور ناعمـات جميلـه
******
ما قول قول ماله أثبات وشهود---ولا كل هرج عندي أخلي سبيله
*******
صح لسانك..مسفر بن حمد ال رشيد...والنعم في ..ابن سعود الكبير..

صح بدنك

والله لا يهينك