الـمـرحــوم : الـشـاعـــر // عـبــيد بن بــريــثــن

[منصر بن سالم]

مسيكم بالخير جميعا



المرحوم هو جدي من امي عبيد بن بريثن بن مسعود بن هادي بن حرضان آل سـفـران



توفي الله يرحمه في الثمينات سنة (88) وهو شاعر كغيره من الشعراء الأولـيـن




وحاولت اني ابحث من والدي الله يطول بعمره عن قصائد جدي الله يرحمه فلم نستطيع ان نذكر الا القليل ولو انني كنت اريد أكثر واكثر ولكن انشالله اللى اضعه لكم يحوز على رضاكم



وياليت كل واحد يبحث عن ماهو مسطر من الماضي لان هذى أمور نفتخر فيها ونعتز بها




نبدأ مع جدي الله يرحمه



هناك قصيده تركها الله يرحمه وهي عندما أتى للكويت ليأخذ الجنسيه مثل غيره مالقى جواب شافي وان اغلب الأسئله اخطأ فيها وليس مكتوب له هذى الجنسيه وقد تضايق ومل من الكويت بعدها


ثم أنشد يقووووووووووول :



يامل قلبٍ كثيرات طواريـه = من هاجسٍ لابغيت النوم قزٌانـي


لالي بمصده ولالي بالعضيليه = والعين ماتنبسط لاشفت خيطاني



ابعد من (....) وقوم العراقيـه = واللى في وطنهم صار غلطانـي



شـفـيٌ ديارٍ جنوب من النعيريـه = مدهال ربعٍ نهار الضيق فرساني


كم واحدٍ من سببهم طاح بالهيـه = خـلـي عـشـا للثـعل والذيب سرحانـي


كم واحدٍ صبحــوه (.......) = بمـشـوكٍ من صــنـع نـصــرانــي



ماهوب أهل موقفٍ عند الشريطيـه = اللى تبيع المعز وتولف الضانـي


ولااهل موقفٍ عند الحسـاويــه = اللي تبيع العشا وتحط ميــزانــي



وسلامـتــكم





وهذى قصيده آخرى وقصتها انه كان مار وضاف عند امراه من بني خالد ويوم جاها الا ماعندها أحد ووقت عشا ولاجابتله الا لبن وزادت على اللبن مــا ويسمونها (شنينـه ) والمرأه الخالديه أسمها شبـنـه وكان عندها راعــي أسمــه حـــمـــاد


ثم عاد يقول الله يرحمه


جعل شبنه والردي من الدلاها = في بحر تسعين ترميهم سفـيـنه


وجعل فتاق الذرى يفتق ذراها = ماتغير سلمها اللي خابريـنـه


الراعي حـماد والراعي كلاها = ضيفها لاجاها اتعشيه الشنينـه


وهي اطول من كذا بس انا جبت اللى حافظه من الشايب



على فكره الدلاها هم الصبيحات من بني خالد وترى بني خالد ماهوب بسيطين وترى الشطر الأول يدل ان الشاعر اجاد بالتصوير ولم يذم بني خالد جميعهم ولكنه خص بالبيت وقال الردي من الدلاها والبيت واضح


لان بني خالد لمن اسمعوا جدي عبيد بن بريثن يوم قال القصيده قالوله انت تقول رديين قال وقعوا وقعوا انا قصيدتي واضحه وانا خصيت وماعميت وقالوا صدقت يابن بريثن وخلك مع الردي الله يجزاك خير



وكان جدي مع بني خالد في الساحل وربعه من بني خالد ومعاشرهم فتره طويله



يقول في العماير من بني خالد


انا في الجزيره وارفع الصوت من ضيقات = محل كسيف والعماير يخلونه


ادكك علي ابليس وأجر بالونات = وترى المنبلي يااهل الوطن لاتلومونه


من تريض عقبهم في خراب وظلمات = يعيف المنام وينظر الغبن بعيونه


واسف اني مااحفظ الا هالابيات




وهنا ايضا يمدح ربعه العماير من بني خالد


لانهم مع بعض في الربيع ولاجا القيض وطاح الرطب راحوا صوب عنك


وهنا ينشد الشاعر ويقول

ديرة عقب العماير مانبيها = اظلمت بيبانها واقفى حلاها


خبرة تنقل كبيرات الخساير = طيبها ماتقصره دون اقصراها


والله اني مرفق ماني اباير = اترك اللي رفقته لابعد نساها




وهذى ايضا




ديرة عقب العماير مانبيها = جعل تمحل والقرايا مرجعاتي


خاربٍ بيبانها والفار فيها = والمساجد صككوهن خالياتي


ياهني اللي بعيدٍ مايجيها = سيفةٍ فيها القباقب عايشاتي



وصح لسان شاعرها


اسف على الأطاله والتقصير في الأبيات ولكن هذا الى يحضرني وانشالله اوعدكم بالقريب العاجل ان آتي
بالكثير والكثير



وتحياتي للجميع

[الحظ جـابكـ]

صح لسانك انت وجدك الله يبيحه

[الشيخه]

صح اللسانك ولا هنت يالسفرانى

وجعل شايبنانن ربوك بالجنه

تقبل منى خالص التحيه

[منصر بن سالم]

أشكركم على مروركم


وصح بدنكم


تحياتي

[فهد بن محسن]

لاهنت اخوي منصر

على ذكر هذه المعلومات والقصائد

تحياتي لك ,, والله يرحم جدك

[متعب بن فهد]

الي نسمع ان جدك يامنصر شاعر وانت ماجبت الا قصيدات كلها عادية وفيها امور البعد عنها افضل وكان لو انك سالت من الناس الي يعرفون قصيد جدك الزين الي فيه وصف والا مدح للرجال الي فيهم خير افضل لك من الي ذكرت