قصيدة العتيبي في الاستاذ حجرف بن محمد العجمي

[العضياني]

يوم القلم بالحبر سالت حروفه= جا هيض صدري بالقصايد من اقصاه
ومن شذ منها قلت جعله ذلوفه= واللي بقى من زرع الافكار جبناه
وسويت منها للقصيدة بروفه= وقطفت من زرع البساتين مشهاه
واليا بدعت القاف بالفكر احوفه= واختار منه اللي جزيل بمعناه
ابني القصايد طوفة فوق طوفه= واليا بنيت الساس جودت مبناه
ماهو طرب للشعر والا طروفه= والا التغزل ويني اليوم وياه
لكن وقتي صادفتني صدوفه= وقت تحداني وانا ازريت لاحداه
ونصيت قرم من رجال معروفه= قرم ولد قرم تنومس سواياه
ذخر الرجال اللي ترد الحسوفه= ابومحمد جعل الانذال تفداه
من روس قوم للمراجل شغوفه= على الكرم والطيب نفسه مضراه
عجمي وفعله كل حي يشوفه= ونعم بربعه في نهار الملاقاه
اهل الوفا والجود واهل المروفه= الكل منهم تكسب الطيب يمناه
عجمان منهو يحتدنه ظروفه= ويزبن لهم ياصل لشي تمناه
رجالهم في العسر يكرم ضيوفه= وان جات حزات المواجيب تلقاه
ابو محمد مانسيت معروفه= ومادام راسي حي ماوالله انساه
مانسى معاريفه ولا انسى وقوفه= وياسعد منهو فالمواقيف ينخاه
دايم على الامجاد نفسه شفوفه= ويحفظك ياعود على الخير رباه
ياذخر حر يشبعنه كفوفه= حر ولد حر بعيدة مداياه
ويابو محمد لو كتبت معزوفه= كل القلم مايكفي اللي كتبناه
مار العتيبي قال شي بجوفه= ولك عهد معروفك فلاوالله انساه
ويحفظك رب البيت من كل خوفه= ويوفقك للي يحبه ويرضاه

[مسعطر]

أولاً : حياك الله أخي العضياني في منتداك بين أخوانك.



وصح لسان الشاعر العتيبي و أشكرك على
النقل و يستاهل حجرف العجمي.

[الفرس]

حياك الله اخوي العضياني

يسعدنا وجودك بينا ويا مرحبا بك الف


تقبل ترحيبي ولاهنت على القصيده الرائعه

[اميرة الرووح]

اخوووووي العضيااااني صح لساااااااااااااااااان الشاعر
وتسلم على نقلهااااااااااااااااااااااااااااااا

[بندر العجمي]

صح السانك



ولاهنت على الجزاله


ودام حضورك


اخوووووووووووكـ

[عـسـاه خـيـر]

لاهنت يا العضياني على هذا النقل الطيب وصح السان شاعرهـا ,,

[سعود الخويطري]

لاهنت على القصيده الجزله



وبيض الله وجهك ونعم بالمادح والممدوح




وتقبل سلامي واشواقي

[شايش العجمي]

لا هنت يا أخي العضياني وما عليك زود..

ولا على الشاعر زود صح لسانه..

يستاهل الأستاذ حجرف العجمي.

تحياتي..

[مسفر مبارك]

لاهنت على القصيده الجزله



وبيض الله وجهك ونعم بالمادح والممدوح




وتقبل سلامي واشواقي