هذا غرامي يايبه

[انفاس الورد]

جتني حروفٍ تايقه جتني معاني مسطّره
جتني بعد كل التعب تدف لي احطامها

جتني بنزف جروحها نزفٍ عبيره عطّره
مثل المزن لامن بعث عطورها قدامها

جتني بقايا للحلم وسط مرايا مكسّره
تشعبّت كل الصور وتناثرت احلامها

جتني وشفت بعينها نظرة حزن امقدّره
كنها على ماقد جرى ندم تعض ابهامها

جتني قوافلها حبي فيها القوافي امسيّره
جتني يخالطها الحزن جتني بكل أوهامه

قلت ارحبي ثم ارحبي دام النوايا امطهّره
على الوفا قلبي نوى وماخيبت عزامها

لأشيّد حصون وقلاع فكرٍٍٍِ وحرفٍ عمّره
تبقى شموخ لخاطرك تبقى طوال ايامها

وهبت لك دمي مداد هذا فؤادي حبّره
يدوّنك عشق وغرام قصة غرام اهيامها

ولو العشق درب الجنون واشواك فيه امنثّره
تعرض فؤادي للخطر قبل مساس اقدامها

ولو القصص نفس القصص فيها النهايه امكرّره
ولو الحكي نفس الحكي تدوّنه اقلامها

عشق وغرامٍ عشت لك الله عشقي مَكبَرَه
غطى على كل الصور غطى جميع احجامها

قصة غرام لصورتك قصه بقلبي امسخّره
نبض الفؤاد اذا نبض مسك بكل زمامها

كم انجرحت بغيبتك والعلم كلن يذكره
علمٍ جليٍ للملا لو تاه وسط ازحامها

قالوا هلي في غربتك:ياكم حلمٍ تخسره
ياكم فرحه بالخفا صدّرت حكم اعدامها

حتى ابويا لاسمع قالي هةاكم مسخره
صورة غرامٍ عاريه لو زينت هندامها

قصة غرامي يايبه حرفٍ بقلبي اشعره
في غيبته وفي حضرته في مدته وإحجامها

قصة فصولٍ اربعه وحروف فيني امحضَّرَه
مره يجود بها السحاب ومره شحيح اغيامها

صار الشتا وقت الحصاد والصيف جهّز دفتره
تساقطت كل الجمل يومن تراخى احزامها

حتى الربيع يوالدي آمال فيه امخدّره
صاب الخدر حضن الامل وتكالبت اوهامها

علم الدجل ياوالدي كذاب من هو خبّره
يبقى على دوم الصدق وتفنى جميع إجسامها

قصة غرامي يايبه:ادلال حرف امبهّره
واجب لشجعان الرجال فرضٍ علي اكرامها

ماهو غرامٍ لظبي زول العوالم نفّره
تنفر بصوت من الرياح تتبع حدس الهامها

قصة عشق لاسم الحرف ورموز فيه امشفّره
قصة رموز معقده محدن يفك ارقامها

قصة غرام بخاطري بلحظة بنت مستعمره
لو الالف من جنده الياء سن احكامها

هذا غرامي يايبه ماهو حكي او ثرثرة
والله يشهد يايبه محي رميم اعظامها

هذا غرامي يايبه
لصاحبها/مانع اليامي