بسم الله الرحمن الرحيم
مساكم الله بالخير جميع هذي أول مشاركه لي في المجال الترفيهي أرجو من الله اني اكون ضيف خفيف عليكم واني احصل لي مكان بينكمخلونا نشوف الموضوع وش يقول .......
هذي محاورة بين ريفالدو البرازيلي وديفد سيمنس حارس انجلترا .... وحبيت اني أعرضها عليكم ....
يقول لكم البارح يوم كانوا اللاعبين يتعشون ... جلس حارس انجلترا ديفد سيمنس هو وسميه
ديفد بيكهام على طاولة ... ويجيك ريفالدو وكافو وجلسو قريب منهم ..... المهم ان سيمنس كان
ياكل ويطل في ريفالدو .... يوم خلصوا من العشا وجلسوا في اللوبي اللي في الفندق ... فقام
سيمنس وعطاهم ذالأبيات في حضور بعض اللاعبين والاداريين ....
يقول سيمنس :
أنا يالربع أخايل لي بروق من ورا اليابان = تشد الناظر اليا شافها سبحان منشيها
وأنا ديفد ولد سيمنس وسط الملعبة فتان = أبا ريفالدو يقرب ويعطيني معانيها
قام ريفالدو ورد عليه يقول :
تخيل البرق والا ما تخيله عورتك بتبان = من أهداف الرجال اللي محزمة حقاويها
أنا ربعي لما جا الصدق تعطيك الدروس ألوان = برازيلي وشوتاتي على مثلك بأقويها
قام سيمنس يضحك وقال خلووووووووووووووها .... وعطاه هالبيتين يقول فيها :
تمهل يا عميلي واذكر الله والعن الشيطان = ترا ربعك بالأرجنتين تبغى من يواسيها
تنشدهم من اللي في بلدهم مشعل النيران = سميي من حمولة بيكهام اللي مسويها
عصب عليه ريفالدو وقال له :
ترا من لا خذا ثار ابن عمه داخل الميدان = له السودا تعلق في البلاد وفي ضواحيها
بنهزمكم ونخرجكم ونشحنكم ورا الطليان = ومثل ما عين جبريل دمعت عينك بابكيها
قال له سيمنس قبل يطلع لغرفته :
أنا ماني بمتكلم وعلمي ياصلك يافلان = وأنا رجل أوزٌن كلمتي من قبل لا اطريها
أباعطيلك عبارة حطها في اذنك كما النيشان = اليزابيث لها سمعة حلفنا ما نوطيها
قام ريفالدو يضحك باستهزاء وقال له :
لك الله يا زمان صار فيه للانقليز لسان = بعد ما كان بيليه يتوطى في علابيها
أنا باصيح في كافو وفي رونالدو حوران = نبا الأهداف فيهم تبرد الحرة وتطفيها
الملقى في الملعب وبنشوف من اللي منهم بيصمل عند كلامه ....
انشا الله أعجبتكم ولاتبخلون علي بتعليقاتكم ومشاركتكم
تقبلوا تحياتي .....
أخوكم البيرق 
20-05-2005, 07:27 PM
العرض العادي
