السلام عليكم
قم يا نديبي فوق وارد شفر ليت=قديم لكن تونا مشترينه
يعني على فكسار ولا يا بلفيت=إنك على رنجٍ يروعك زينه
عليه قبل تسير شيك على الزيت=أبلوفه من الضيق زادت رطينه
أبيك تأخذ مني اليوم كم بيت=قليلة الحسبة ولكن ثمينة
تلقى عليها من فنون الأتيكيت=أجمل تعابير البيوت الرزينة
أبيات حابكها وأنا كل ما أرهيت=بالقافية فكيت سجن الرهينة
من كفي اليمنى لكفك وإذا جيت=حط الورق بيده وقبل جبينه
قصيدةٍ تثور مثل الديناميت=تسمع صداها البدو وأهل المدينة
لا قمت أرددها وبالصوت غنيت=يطرب لها اللي دوم نفسه فطينه
في مدحه يضيق الفسل والهلافيت=يغيضهم ذكره وبصمة يدينه
وجهه يبشر بالسعد لا تعنيت=في لازمٍ منه تبرا قرينه
يوم أن ولد اللاش بيته لمريت=لك حاجةٍ عنده عقد حاجبينه
هذاك أبو منصور فارق وله صيت=غطى على ذكر الخبيث وعوينه
الصيفي إن ضاقت عليك وتمنيت=أنص الجبل وأزبن عليه بعرينه
يفز لك ويشتت الضيق تشتيت=والهم بأمر الله فطر غصب عينه
فيه أفتخر ويسد نقص السرابيت=اللي شعيب المكر متسيدينه
ما همهم يا كود جمع الفتافيت=والكل منهم بين الوقت شينه
اللي مثل شرواه يشفرش له البيت=يقلط بصدره وتنحر سمينه
في كل موقف مر يحتاج تصويت=أثبت بأن الحر محدٍ يهينه
ثابت جبل سنجار من قبل تكريت=ومن بعدها ثابت وربع بطينه
تفخر به العجمان من بيته لهيت=فخرٍ يدفه للسحاب بيمينه
فعله ينومسني ولو فيه عديت=قصايد الإبداع تبقى هجينه
أعانق سهيل وعلى ذكره أحييت=شيطان فكري والمشاعر دفينة
الله يفكه من عيون الطواغيت=ويدوم عز اللابه اللي تعينه
وسلامتكم