قصيده ليبيه على احوال الناس

[المبشر]

بسم الله الرحمن الرحيم الحمد لله رب العالمين وصلي الله وسلم وبارك علي نبينا محمد وأله وصحبه أجمعين
إخوتي وأخواتي الاعزاء الكرام الطيبين
السلام عليكم ورحمة الله وباركاته
هذه القصيدة أخوتي وأخواتي هي للشاعر سعيد شلبي من المنطقة الشرقية ليبيا وقد أطلعت عليها في كتاب للشعر الشعبي قد نسيت عنوانه ولاكن الذي أذكره تم نقل هذه القصيدة يوم الثلاثاء السادس من الشهر الثامن من العام الف وتسع مائة وسبعة وتسعون ولازلت حتي الأن أحتفظ بها لما فيها من كلمات معبرة ورائعة وأترككم مع القصيدة

هناك ناس تكرهم من أول ليله ـــــــــــــــــــــــ وهناك ناس مايهونوا سنين طويله
هناك ناس حبايب ــــــــــــــــــــــــــــــــــــــــــ وهناك ناس تكرهم بغير سبايب
ولاعقل عامر كيف عقل الخايب ـــــــــــــــــــ ولاوجوه تندي كي وجوه بخيله
هناك ناس يامحلاهم ــــــــــــــــــــــــــــــــــــــ وهناك ناس ماتقدر تعيش بلاهم
وهناك ناس حسدية وسود أنياهم ـــــــــــــــــــ أثياب بيض من بره وجوه نيله
هناك ناس غوالي ـــــــــــــــــــــــــــــــــــــــــ حتي أن باعدوا ماكيفه لاوالي
حمالين للسية بطوعة بالي ـــــــــــــــــــــــــــ علي خطهم ماعندهم تحويله
وهناك ناس عشرتهم خطا طوالي ـــــــــــــــ مكتوب في جباهيهم خراب العيله
وهناك ناس تعزم واليدين خوالي ــــــــــــــــ وهنال ناس تبخل والجيوب ثقيلة
هديات م الرب الكريم العالي ـــــــــــــــــــــــ وبوطبع ماتنفع معاه الحيلة
هناك ناس ماتقبلهم وهناك ناس ــــــــــــــــــ لك غاية تجول لهلهم
وهناك ناس لاداروا خطا تحملهم ـــــــــــــــ وهناك ناس في عقلك لهم تجفيلة
وهناك ناس ع الحيين لاتجملهم ــــــــــــــــــ اللي تجيك منهم مالها تبديله
ولايفرقوا ظني الابعملهم ـــــــــــــــــــــــــــ ماحد علي التسعة مزود ليلة
وهناك ناس ماينسوا اللي صارلهم ــــــــــــ يردوه بعباره ووافي كيله
وهناك ناس لاهب الهبوب خبلهم ــــــــــــــ ونسيوا اللي عدي وضاع جميله
ولاخير في اللي مايبات عللهم ــــــــــــــــــ ولافي الخليل أن كان فات خليله
هناك ناس يامبهاهم ــــــــــــــــــــــــــــــــــ وهناك ناس توعدهم وماتلقاهم
وان قابلتهم تلقي العدار معاهم ــــــــــــــــــ مجهزينه ماعندهم تعطيله
كلام اللي قالوه ضد أنياهم ـــــــــــــــــــــــ أن كان بحروا ينوا علي التقبيله
أحتار في مودتهم اللي ماشاهم ـــــــــــــــــ مربيينه شاطب وحار دليله
لصحاب كيف في صف العدو تلقاهم ــــــ صحبتهم معاك مغير نصب وحيله
قريب نقصهم منك بعيد وفاهم ــــــــــــــــ مشيول ع الدبر في حملهم تميله
مفتوح ع الخسارة بيعهم وشراهم ـــــــــــ الستره مع بو صاحبين قليله
هناك ناس أماره ــــــــــــــــــــــــــــــــــــ وهناك ناس مظني يساوا باره
وهناك ناس تلقي سعيهم في الكاره ـــــــ وارزاق واجده غير النفوس بخيله
والمال في قليل العزم راه خساره ـــــــــ حتي مهو حكيم بعلم في تعديله
وهناك الفقير ومايسيب عاره ـــــــــــــــ حتي ان كان ماعنده اليد طويله
وان ما كان في جيبه قضي من جاره ـــ علي قيس نيته ربنا يعطي له
موكار الصقوره ماتجيه حباره ــــــــــــ ولامرومه تلحق ثمن لصيله
وحظك اللي توميه م البداره ـــــــــــــــــ يطلع بعينه تحصده وتشيله
والجدي لو تقوي نين فات حكاره ــــــــ ان يبقي علي شيل الحمول هزيله
وشوف الجمل حتي ان خف عباره ـــــ صليبه علي حمله اخري ترميله
مولا العصب حمال في مشواره ــــــــــ قطاع الفيافي وين مد رحيله
أن راد ربنا ماحد إسيب كاره ــــــــــــــ الراس راس والواطي ان زالو ذيله
هناك ناس ماتحملهم ــــــــــــــــــــــــــــ لاغريب يقبلهم ولامن هلهم
وهناك ناس في الحيين شين عملهم ـــــ ذكر نخيل لارميه ولاتظليله
علقم وحنظل وين ماتاكلهم ـــــــــــــــــ وان رافقتهم يبقوا عليك عديله
وان نازلتهم بالدار جار لهلهم ـــــــــــــ علي عيب عيل يجردوا بالعيله
علي جارهم ديما يزيد عللهم ــــــــــــــ قلال العنا لاجت الدلو ثقيله

نأمل أن تكون القصيدة قد نالت أعجابكم واستطعتم فهم اللهجه وهو وزن الطرقي

[الغروب]

المبشر

اشكرك على نقل القصيدة المعبرة

والشكر لكاتبها الشاعر سعيد شلبي

وننتظر الكثير من الادب الليبي العريق .

[عمر الرشيدي]

يعطيك الله العافيه اخوي ][ المبشر ][

صح الله لسان شاعرها قصيده جـزله

لاهنت

تقـبل تحيـآتي

< عـمر ألرشـٌيدي

[ليــه يازمـــن]

وعليكم السلام ورحمة الله وبركاته

مشكور على نقل القصيده

والله يعطيك العافيه

تقبل تحياتي

[المبشر]

شـكــ وبارك الله فيك ـــرا لك ... لك مني أجمل تحية . على المرور