إلى فخامة الرئيس إيميل بن لحود
صبـاح الخـيـر فخـامة الرئيس .. أنا مواطن خليجي مـخـلص للبـنـان .. أبـعـث هذه الـبـرقية إلى سـعـادة فخـامتكم المـصـون .. و أتـمـنى مـنـكم قرائتها بـتـمعـن و تفـهـم وجهـة نظري التي تـخـدم شعب لبـنـان المخلص .. الموحد بجميع أطـيـافه من مسلمين و مسيحيين ودروز وكل اللي عندكم ....
يا بو لحود ... ترى الشعب الخليجي يعيش حالة من الغضب ... بسبب ماحصل قبل أسبوعين عندكم .... بعد ما كان الشعب الخليجي مضبط عمره في الصيف عندكم .. الحين كل واحد خايف ... اللي صار عندكم خرب خطط كل طبقات الشعب الخليجي... خرب خطط الشيبان يروحون بذا الجبل يشمون الهوى ... خرب خطط العوائل تروح هناك و أنواع الرحلات بين الجبال و خرب خطط متزوجين جدد يروحون هناك يتعشون لهم بكم مطعم مع دق طبول و رومانسية ... و خرب خطط الدشير إللي يروحون يبون يرقمون وتعرف عندنا نسبة ضئيلة جدا جدا من الشباب ( إمحق ضئيلة ) يحبون شغلات النص كم ...
يا بو لحود ... إنت و الأخ كرامي رئيس الوزراء ... لازم تشوفون لكم حل ... داخلين على الله ثم عليكم ... لا تخربون سفراتنا في الصيف ... ترى حنا نجمع بذا الراتب ... وحاجزين من شهرين التذكرة و الفنادق ومزينين عمرنا ..
إللي يبي يودي زوجته أسبوعين أبها و بعدين يبي يرجعها و يهج لكم .. و إللي مصرف أهله و قال لهم رايح حائل و مغطها لبيروت واللي يقول في رحلة عمل لدبي.... وإللي و إللي ... دبر عمرك ياخوي .... شف لك حل مع السوريين .... لف عليهم و إلا إلعب الأكة وقدم الخسارة ...
( هذي حق مطفوقين البلوت ).... ترى جنبلاط قاعد لكم قعدة... و بصراحة معه حق ياخوي ... السوريين جايبين فيكم العيد .... محكمين على ولد الديمن و عندهم أربع إكك!!.... (هذي بعد لنفس الربع )....
في آخر هذه الرسالة يابو لحود .. أتمنى منك إيجاد حلول سريعة ... و ياليت ترسل لي الرد بأسرع وقت .. علشان أضبط الحجوزات .. أبتل على لبنان ... و إلا أدور لي ديرة ثانية و الله يعين ... ترى والله ديرتكم ديرة الحي يحييك .... و ماودنا بغيرها .. بس تكفون نبي نروح و نضمن روحنا .. ما تسوى علي أتفجر وأنا بحفلة بونورة ... و إلا يتفجرون ربعنا في قهاوي السوليدير و تضيع مشاريعهم إللي في البلوتوث...
عموما الوضع مو عاجبني .. وشف لك حل