الحــر .. أبعـاد التركـي ..

[البندري القحطاني]

السلام عليكم ورحمة الله وبركاته ..

صباح الشعر .. وهذي من اروع القصايد الي قريتها ..

الحــــر .. تسعى له الحـره .. لأبعاد التركي ..

ياحر ياللي على المشراف لك جره
تعاف نزل الوطى وتعانق القمه
تموج حد السما والأرض مخضره
يدله معاك الحزين وينجلي همه
جزم عزوم تريح البال وتسره
في هدتك تنثر الخفاق وتلمه
قلب الهواوي معاك يغادر امقره
لاشاف جولك دعاك ولوح بكمه
لا اقبلت شيخ يحب الشعب ويبره
ولا ادبرت برق لمع في طارف اليمه
ولا فعت من ماكرك ثم أخذت لك فره
يزمك الوجد للصمان وتزمه
الديره اللي بوبل الغيث مسمره
ريحة نفلها يتل القلب ويخمه
داري ولاجالها النسيان لو ذره
لها سلام جميل وافين كمه
ياطير روحي مع راعيك من جره
هاك السنافي كريم الاصل والذمه
أهيم لو ينذكر طاريه مغتره
ويفز قلبي على طاري بني عمه
ياطير قله يشوف الحال لو مره
راعيك ماهوب يمي مير أنا يمه
الجمر يصلي بصدر ضاق من حره
والعاشق اللي يوده فاير دمه
لبست ثوب الغرام وقلت له زره
ويمد كفه ولا كن ما نطق فمه
ياذا النداوي ابيه بخيره وشره
سمه هبال وجنون زايد سمه
الحر هوغايت تسعى له الحره
والنايفه تعشق النايف وتهتمه