بستان الأشعار
الشاعر الجزل عبدالله بن عمارة الذي تمت استضافته في العدد الماضي في لقاء رائع كتب هذه القصيدة المتميزة بمناسبة إقامة الشيخ سلطان بن حثلين أمير قبيلة العجمان حفلاً للشيخ حمد بن حمدان آل نهيان أثناء زيارته للكويت نهاية العام الماضي وسبق أن قمنا في العدد الماضي بالتنويه عن نشرها.
لقاء عبدالله بن عمارة : ليس كل مشهور بشاعر.. وليس كل شاعر بمشهور!!
لا قمت امثل بني عمي ووجهي طويل=سلام الإسلام ما قبله سوى البسمله
ما للجزاله ليا حلت ياكود الجزيل=بستان الاشعار فاح ونقطف من اجزله
نستطعم القول هذا العام وإلا حويل=عدن وله محمله والشام له محمله
وتهب صلف الهبوب ولا تحرك ثقيل=أن جات متأخره وأن جات مستعجله
يكفي طرفنا ليا ذعذع نسيم العليل=عن معضلات الليالي معضله معضله
والكلمة الهزله اللي طاح فيها هزيل=في حلق ذيخ المقاطر كنها السلسله
النبح ما نلتفتله دام فينا صهيل=لا مشكله يا انكر الاصوات لا مشكله
لا احدٍ يدوّر شهود ولا يدوّر دليل=يا مدوّر البلبله ما عندنا بلبله
رمحة قعود البدو يضفي عليها الشليل=وان ما ضفا بانت الجوزا على مقتله
مقدم الشر ماله غير شره بديل=يعيش في معزله ويموت في معزله
من عاري العقل لو يزرع ما حصل حصيل=دايم تجي غلطة الجاهل بقدر اجهله
ويا زين نكفة شجاع وشين غزوة ذليل=سبحان من يمهل الطاغي ولا يهمله
والصبح ما عقب نوره كود حندوس ليل=فالليله المدبره والليله المقبلة
واليوم ف احلال (ابو راكان)زبن الدخيل=وفي مجتمع ربعي العجمان مستكمله
في ضفنا يا الفلاحي مرحبا هيل سيل=ترحيبةٍ من جذور الجود متسلسله
تنساق مع فكة الارياق كالسلسبيل=وتستاهل الطيب وأنت اللي بعد تفعله
ذبيل دنياك حطيته لدينك ذبيل=وترقى على سلم العليا ولا تنزله
ملكت جزل العطا وان بار فيك البخيل=تأشر عليك المراجل كنّها بوصله
يا (ابن نهيان) معلمكم يحط ويشيل=والعود الازرق دهل جناب من يدهله
من ربع (زايد) وزايد زادبه كل كيل=ثابر وأخذ في مجرات الفخر منزله
وأنت ابيض الرايه اللي للنشامى سليل=ذراك يذري ودرعك يا (حمد) مسدله
وترحيبنا يا ولد (حمدان) عذب وأصيل=اقلوبنا تحفظه وايماننا تنقله
ارحب يا راع المضيف اللي بدا به سهيل=(راكان أخو بيّنه) شيخ السعد واقبله
يصل حثلوم خيل ويخلي سروج خيل=بـ آلاد مرزوق لا عدوا هل المرجله
ميراد مزراق ابو زرجه وحد الصقيل=لا صار للأرض من مركاضها زلزله
تعدل الميل وأن ميّل طلبها تميل=عليه ميلة خدوم الوقع ثم تعدله
والمجد ما حكر فالهيجا مشاع القتيل=المجد ماضي وحاضرنا ومستقبله
من قبل ذا الجيل جيل وبعد ذا الجيل جيل=ننقل وفا فالمراحل مرحله مرحله
والصف واحد عوال (عجيم)والا (وعيل)=يا (هشام، مذكر) يا (يام) الريب ما يدخله
والله ختمها بقرآنه وهدي الخليل=عن كتبه المنزله او رسله المرسله
رابط القصيدة في جريدة الوطن