ســــــــــــــلام
اسعد الله اوقاتكم
ليــّن جناب الود يا ليـّن العود =وألطف وأساليب المحبـّه عديده
خل القسـا لاهبّ تستاقه النود=وأحذر بعد ما ساقتـه تستعيده
بإسم الوفا والحب والطيب والجود=الصح عيده والخطــا لا تعيده
عليك حلّ الحبل والحبل معقود =تعقــّدت روس الحبال الجويده
وراك ساكت والسما بروق ورعود=والليل موحش والهبايب شديده
مدري حداك الصمت وأصبحت محدود=وألاّ أنّ صوتك فيه نبره جديده
تنقل كلام شفـاك بعيونك الســود =وفي كل نظره منك .. جمله مفيده
كم قلت لك مأمون والسدّ مسدود =والشك زايل والهقاوي بعيده
خوفي من اهل الرقص والنقص والزود =وبثـّي يا إذاعه وأنشري يا جريده
قلبي لهد كبدي وعبرّت ملهود =وأنته حجر قلبك وكبدك حديده ؟
خليّتني فـ الشعر حاوي ومردود =وعلــّـقتني في باب بيت القصيده
وأزريت أغنّي فيك يا باشة الخود=مما بدالي .. ما بقا لي شريده
جوارحي لرضاك مقتادها قــود =تقول حاكمني بشرع وعقيده
لاشك حكم العشق ماعنه منشود =وحكومة العشــّاق ماهي رشيده
أنت اعتبر ما صار ماهوب مقصــود =وأنا أعتبر ما صار فرصه سعيده
الدكتور (( سداح ))
وسلمتم