{ العقل صاحي لكن القلب مجنون }

[شيخة الغلا]

الشاعر المبدع والجزل / سداح

غني عن التعريف وحروفي تعجز عن التعبير عن مدى إبداعه وانا متابعه لكل جديده

وهذه رائعه من روائعه نالت على اعجابي واتمنى ان تصل لذائقة الجميع

ياوسع صدري مير للضيق مرهون = وإن ماتوسع كله يضيق كلَه
يمشي تحت رهن الإشاره على الهون = وترمي عليه من السلوك وتتلَه
وسلوكها ما بين ناشف ومدهون = وصدري ليا قامت تلامس تعلَه
أحيان أجامل وأترك السد مدفون =وأضحك ما بين الخطَر المسفهلَه
وأحيان أجي مشحون وروح مشحون = وأقول من يعقد احجاجي يفلَه
ثلاث تحكمني ولا قلت وش لون = المعرفه 00العاطفه 00والجبلَه
العقل صاحي لكن القلب مجنون = والكل منهم نظرته مستقلَه !
ياصاحبي ما للمحبين قانون = والحب لغز 00 ولاعرفنا نحلَه
قلبك مثل قلبي مكبل ومسجون =أحرار مير اقلوبنا مستحلَه
عسى الغلا لازال بالحفظ والصون = والله يبيحه لاتغيرمحلَه
أهديتني جمره على راس غليون = وأهديتك من العمر شيحه وفلَه
ورغم اختلاف المد لازلت ممنون = والشوق ياخذني على كل ملَه
فوحت دمي لين صار أشقر اللون =وأخذت من مجراه فنجال دلَه
ماغير أغني فيك لو كنت مغبون = يامل قلبي من غرامك يامن لَه !
دايم ضحايا العشق لإجله يضحون = كم فاض من كثر الضحايا سجلَه
وأنا غديت بحكم فاتن ومفتون =راضي بحكم الحب 00والحكم لله
وإن قام يكبر بيننا شاسع البون = أرفق علي وشاسع البون قلَه
عز الله إن الشك ماهوب مامون =سيف الجفا البتار يمكن يسلَه
أقنع لو أن الحال من دون في دون = وآخذ الكلام اللي عليه الأدلَه
لاتشتكي لي والعرب وش يقولون = شكوا لغير الله تراها مذلَه